ХIялалли гIямру дуркIуси

ХIялалли гIямру дуркIуси

Дахадаевла районна КIишала шилизир гьанналис 85 дус гьалар акIубси ПатIимат Ильясовала гIямрула гьуни гьамадси ахIенри. ИтхIели илкьяйдали бахъалгъунти хIербирутири.

Мас-хIяйванти адилкьули, хъумачи анкIи, мухъи, мяхIяр, набадури, кьехIни, картошка делгIули, халаси гъаза бирусири. Итди дургъбала гIергъити дусмазиб гушти ва гьаргти бахъал лебри. ГIямрула риштIаси ПатIиматра беркеси кьацIлис хIенкь бикули дуки рашусири.

ПатIиматли гьанбуршули сари: «Гьачам ну школала директор РабаданхIяжини ва шила советла председатель АсхIябли хIенкьличил чераили, набзи хьарбаибсири ручIес хIейгулрив или. Нуни жаваб бедира дигулра или. ХIебиалли, ГIямархIяжихъала гIелабси мижитлабси школализи 2 ибил класслизи рукьен или буриб илдани. Набра багьуди касес дигулри, амма я кьалам я лукIес тетрадь аги итхIели. Жузи ва цархIилти гIягIниахъала багьла-багьлали даргира. Илкьяйда бучIутири имцIати, гушлихьалли мутIигIхIебикIутири, багьудили бегIбиэс багьандан. Дахъал къин-жапа чедаира, велкъеси кIацI рахлира хIебири.

Ну школализир старостали, пионервожатаяли, гIур комсомолла организацияла секретарьлира рираси. Ил тяхIярли 8 класс тамандарира».

ПатIиматла дудешла хIябал узи ЧеряхIти ВатIа дургъбази саби гIяхIъулали арбякьунтири. ХIябалра чархIебухъун, илди дявила майдунтачиб, душмантачи къаршиси гъазализиб игитла бебкIали алхун.

КIишала шилизибад 370–лицад гъабза дявтази арбякьунтири., бахъалгъунтани нушала улкала халкьлис азаддеш сархес багьандан жан кьурбандарибтири.

Школа таманбарили гIергъи, ПатIиматличи гъятIбиубси хъалч чебирхьути хIянчира къаршидикиб. Илини халатачил барх кумекбирулри. ГIур биалли ил хъарахълизи кумекбарахъес рархьиб. Илабти хIянчизартас хурег, кьацI-шин дирули рузусири, акьуси манзил калпишунира кадирхъусири.

ПатIимат Ильясова гIур доярка риубли рузес рехIрихьибсири ва I957 ибил дусличи бикайчи илар калун. Илис гIергъи хъалицIа адуциб.

Илала мурул Кьурбанкьади Муртазг1ялиевли 1956 ибил дуслизир Венгриялизир кадикибти дявила анц1букьуназир бут1акьяндеш дарибтири. «Дила мурул Огнилизив слесарьли узес вякьунсири, нура иличил рарх ила гечриубра. Нушала ца рурсира, авал уршира акIуб. Нуша илар 9 дус кали, шилизи чардиубтири. Ну шила хозяйстволизир бригадир рарира, гIур директорла хозяйствола шайчирси заместитель рираси. Нушани дахъал секIал дихутири, дояркабас, бузерила адамтас, абзурли шантас хIяжатти гIягIниахъалара урцулра дархли. ИтхIели бекIлибиубси бузери мас-хIяйван адилкьнила ва ризкьи делгIнила сабри. Дахъал анкIи-ризкьи делгIутири ва халаси сабухъ бурчутири», - буриб ПатIиматли.

Сунела муруйчил барх илини шелра биштIати абикьур ва гIямрула бархьси гьунчи дураиб. Илдазибад 3 мугIяллимли бузули саби.

Бузерилизирти сархибдешуни багьандан ил орденничи лайикьрикибсири, амма иличи ил хIебаиб.

Илис гIергъити дусмазир П.Ильясова Къараногъайлизи ГМП – ла халал рарили, ревизорли рархьибсири, иличил экономистра, главбухра бархли. Ца хозяйстволизир хIябал шила къушуни лерри, ва иларти маза-мас къелгIердикутири. ПатIимат Ильясова чинар рузалра хIялалли рузусири. ГIурхIели ил шила Советла депутатли рикIибсири, ва судла заседательра сарри.

ПатIимат ахирличир рикIар: «Ит замана нушани дирути хIянчи гьандиркули сари, дявтала гIергъи улка ахъбуцес дирути, мас-хIяйвантала ва дегIнуби-анкIила ахъти сабухъуни дучес халаси къиян кабирхьутири. Гьанна биалли адамтани илди хIянчи дирули ахIен, хъумира пайтли сари. Наб дигаси адамтани хъуми-унхъри дузахъули, ризкьи делгIули, мас-хIяйван адилкьули, ванзала кьадри-кьимат балули, баракатличил хIеркабирули».

ХIябиб Махтуев