Арадешлис къарауйчив

Нушани хIушаб гьаман декIар-декIарти санигIятунала адамтачила макьалаби гьаладирхьули дирехIе. ИшбархIила нушала ихтилат бирар БяхIяммадов Нариман Шамиловичличила. Ил акIубси сай МяхIячкъалализив. Дагъистанна пачалихъла университет ва медицинала колледж сархибдешуначил тамандарили, багьудлуми дедлугуси «Мика» центрлизив узуси сай. ИшбархIила замана ил хIаджамтала, гирудотерапевтунала, мануальный терапевтунала, физиотерапевтунала, массажистунала Ассоциацияла Дагъистанна вакил сай.

- Нариман, се санигIят сабил хIела иличила бурили дигахъира.

- Нуни бучIанти массаж бирнила тяхIярличи ва декIар-декIарти илала журабачи бурсибирусира. Массажла программализи кадурхути сари халатала ва биштIатала массаж. Халатала массажла 9 жура дирути сари: классический, точечный, рефлекторно- сигментарный, антицеллюлитный, косметологический, шейно-воротниковой зоны, бекIла, вяхIла ва гIуррара. Илди массаж дирути сари нервабала цахIнабикличил яра опорно-двигательный аппаратличил дархдасунтира излуми сагъдирес багьандан. Илала дурабад биштIатас логопедический массаж бируси саби.

- Массажличи бурсибирнила дурабад цархIил се журала багьуди бедлугулри?

- ХIиджама, гирудотерапия, физиопроцедураби, электрофорез, парафинотерапия ва цархIилтира журабачи бурсибирулра. Парафин нушаб диштIахIейчибад тянишси секIал саби нешанани ванабарили пайдалабирусири. Электрофорез бирухIели адамла кьаркьайчи асарбирути микротокуни дирути сари. Илдала кумекличибли кьаркьайчибси дарман 100 процентла кьадар бухIна аркьуси саби. Гирудотерапия – кьаркьайчи бухълухъуни кадатурли, хIи дужахъути сари. Илдани чузирти ферментуни хIилизи датиути сари.

ХIиджама бирухIели хIи сагадирути сари ва 90 процентла кьадар кьаркьайзирти излуми сагъдирнилис кумекбируси саби. ХIиджама ишбархIила медицинала тIалабуначи мешули ва илкьяйдали Идбагла суннат хIясиблира бируси саби.

Массажла цархIил журара лебси саби – «цIаличилси массаж». Илала кумекличибли хIила ва лимфала бузери ункъбируси саби, хIила туми дягIудиру ва кьаркьайзибси цIерхьдешла гIявадеш бацIахъесра бархли кумекбиру. ХIера илдачи бурсибирусира/

- Илдала дурабадра нуни балуливан, хIу кинезиолог сайри. Дагъистаннизиб ил санигIят бяркъурси ца хIуцун сайри, иличила баянбарили дигахъира.

- Кинезиотейпирование бикIуси Россиялизиб жагьси, имцIаливан спортивная медициналичил бархбасунси шали лебси саби. Ил чIянкIила пластырьтачил кьаркьайчи асарбирни саби. Россиялизиб иличил пайдалабикIес 2017 ибил дуслизиб саби бехIбихьибти, дурала улкназиб 80 – ибти дусмачибад балули биалра. Илала кумекличибли нушани изала убасес дирутира, бегIлара биштIаталара бархли кани изухIелира пайдалабиру. Ил реабилитологиялизиб, неврологиялизиб, косметологиялизиб, логопедиялизиб ва спортличил дархдасунти дяхъурбачиб пайдалабируси саби.

Иличи ну бурсивиубсири Москвализив, ил школа акIахъубси Японияла «Бибэлес» компанияла хIянчизарличив. Гьанна илдас дигули саби Северный Кавказлизив ну чула школала вакилли варес.

- ХIела кабинетлизи арацIи-бхIели, дахъал дипломти, сертификатуни, кубокуни чедаира. Илдачила се бурида?

- ЦархIилти бурсибирнила дурабадра нунира даим багьудлуми кайсусира. СенкIун нушала центрла хIянчизарти дусли 4 – на ва имцIалира багьудила даража ахъбуцес чеимцIати багьудлуми кайсес, устадеш ахъдурцес Дагъистанна дура дашутира: Москвализи, Санкт-Петербурглизи, Краснодарлизи ва Ростовлизи. Халкьани-ургабси «Апатит» массажла школали гибти дила 9 сертификат лерти сари. Илдала кумекличибли наб ихтияр лебси саби ЕС – ла, Азияла улкназир, ГIярабла Эмиратуназир, Турциялизир ва Дубайлизир багьудлуми дедлугес. СенкIун нушала Центр халкьани-ургабси даражала саби ва лебилра хIянчизартира халкьани-ургабси классла специалистуни саби. Илдира даим бучIули, устадеш ахъдурцути саби. Нушани сагати дисциплинаби хIясибли устадешла дурсри чедиахъутира.

- Иш Центрлизив хIу сецадхIи узулири? Багьуди бедлугнила хIела декIарти тяхIурти лертив?

- 2017 ибил дуслизиб нуни ишаб багьуди касибсири ва биштIатала реабилитационный центрлизив 2021 ибил дусличи бикайчи узули, дурхIни кьяшмачи тIашбалтули калунра. ИхIейчивад ишав узулира. Нушала центрла шалуби сари арадеш мяхIкамбирнила ва косметологияла (жагадешла) шали. Нуни декIарбарибси саби арадеш мяхIкамбирнила шали. Нуни ишаб бурсибирути ва руркъути бучIантачил гьалмагъдеш дузахъутира, илди цаван пикрибикIути саби. Илдани ну педагог-насихIятчизи халвирули, чус гIягIнихIели набчи дугьабилзули бирар. Дила 200 – личиб имцIали выпускник леб ва илдазибад 60 процентли саби бегIти центрти абхьиб. Дила гьарил выпусклизиб отличникунира бирар.

- Челябкьлаличил дархдасунти сегъунти пикруми-хьулани лера?

- Дила пикри саби гъамси заманализиб массажла школа абхьес, мурхьли арадешличилцун бархбасунси. Нуни кIел дусла бухIнаб цалабяхъибси ну вегIси методика лебси саби, ва нуни бучIахъути ил хIясибли саби. БусягIятла замана 3 бархIила, 2-3 жумягIла , 1 базла жура-журала массажла курсани лер. Нушачи бикути цархIилти центртазибад хъуцIарла лига ва цархIил лига бячунти бирар. Илгъуна хIебиахъес багьандан массажла курсани нуни къантIти хIедарили, ца баз духъяндитIунти дурадуркIис.

БусягIят нушани медицинала багьудлуми агартира бурцути ва массажличи бурсибирути саби. Амма адамлис ахъси даражала хIянчизар ветаэс дигалли, дила пикрили, медицинала багьудлуми диэс гIягIнити сари. Анатомия ва цархIилти секIал дални чараагарси саби. СенкIун арадешличил бархбасунси хIянчи дебали жавабкардешчебси саби.

Нариман багьудлумачил гIеввуцили, ил бурсиварибсири Суйкум Хасбулатовани. Ил центрлизив узули ва багьудлуми кайснила дурабад, Нариман 35 дипломличи ва 6 статуэткаличи лайикьикибси сай. Илди бегIлара бахъал бучIанти, бегIлара дахъал устадешла дурсри чедаахъни, бегIлара бахъал адмти иличи дугьабилзни, бегIлара бахъал отличникуни – выпускникуни лебни багьандан ва цархIилтира сархибдешуни кьиматладарили дедибти сари.

Ишаб бурес чебиркур Центрла директорличила. Ил «Мика» Центр акIахъубси сари 2014 ибил дуслизир Лугансклизирад иша гечриубси Марина Игуменцевани. Илала бегIти ЛНР – лизиб калунти саби, узи виалли сай гIяхIъулатала къяяназив сай. Ишав илис кумекбареси чилра аги, амма илини чIумали кьасбариб ва сунела мурадличи раиб. Илини никубала шайчибси хIянчиличирад рехIрихьили, илгъуна центр акIахъуб. БусягIятла замана ил Центр Северный Кавказлизиб бегIлара халаси саби ва сархидешуначил бузули саби.

Детерхаб хIела хьулани ва кьасани, Нариман, ЧевяхIсили гIеввуцаби.

Арадешлис къарауйчив