ДехIибайчиб сужда барес хIебирути адамтани дехIибала дирнила тяхIяр-кьяйда

1.ДехIибайчив тIашизес ва рукугIличи къухIизес вируси, амма сужда барес хIейруси адам виалли, дехIибала гIергъиси тяхIярли дирути сари:

1) Адамли КьиблаличивяхI тIашизурли, дехIибайзи ухIнаулхънила такбир «Аллагьу акбар» ируси саби, гIягIнити дехIибала дарес нигетличил барх.

2) ТIашли сура «Аль – ФатихIя» бучIа.

3) РукугI бируси саби гIядатла тяхIярли гIяшвиубли, хъат някъби кьукьубачи дурусли диэсли ва ил тяхIярличив «СубхIянаЛлагь» эсцадхIи манзиллизив тIашилзуси сай.

4) Ахъвиубли ил хIяйчив камси замана тIашилзуси сай.

5) ГIур ил адам уталичи кайруси сай, гьалахили хIядурбарибси (сурат 1) ва сужда бируси сай. ЦархIилван буралли, гьалавяхI гIяшвируси сай, анда кьукьубачиб гьалабухъесли ва ил хIяйчив камси заманалис кавлуси сай (сурат 2). ИлхIели дехIибайчивсини суждаличир дучIути лерилра дучIути сари.

6) Илала гIергъи гIягIниси саби кIелра суждала ургав кайэс, цараван буралли, ил кайибси тяхIярличи чарулхъуси сай ва ил тяхIярличив камси манзил кавлуси сай (сурат 1).

7) КIиибил сужда бируси саби: гIяшвиубли, цаибил суждализив кьяйда ва ил тяхIярличив камси замана кавлуси сай.

8) ГIур дехIибайчивси тIашкалзуси сай кIиибил ракагIят барес багьандан.

9) Лерилра вяшатIала цаибил ракагIятлизирван тикрардирути сари, амма кIиибил суждалис гIергъи, ил тIашкалзуси ахIенну, кайили «Ташагьуд» ва «Салават» бучIуси саби, эгер илини савлила дехIибала дирули виалли.

Илис гIергъи ил дехIибайзивад дураухъи, дехIибала тамандирути сари «Ас-Саляму гIялайкум ва ряхIматуллагь» или, илхIели бекI гьаланачи балуй шайчи (сурат 3), гIур алгъай шайчи ласбиру (сурат 4). Иличирли сунела дехIибала тамандиру.

Тяп илкьяйдали илини цархIилтира дехIибала дирути сари, гIягIнити кьадарла ракагIятуни имцIадарили.

2.ТIашкайзес вируси, амма рукугI ва сужда барес хIейруси адамли дехIибала дирнила тяхIяр.

ДехIибала дирухIели тIашкайзес вируси, амма рукугIличи ва суждаличи гIяшвиэс хIейруси адамли гIергъиси тяхIярли дехIибала дирути сари:

1)Кьиблаличи дяхIчили тIашкайзурли «Аллагьу акбар» иру гIягIниси журала дехIибала дарес барибси нигетличил барх.

2)ТIашли сура «Аль-ФатихIя» бучIа, сунези сунени (сурат 5).

3) Уталичи кайили, рукугIличи гIяшвируси сай анда кьукьубачиб гьалабухъесли (сурат 6) ва илкьяйдали уар «СубхIянаЛлагь» эсцад заманалис.

4) ГIур кайили (сурат 7) ил тяхIярличив камси замана тIашилзан «СубхIянаЛлагь» эс гIягIниси манзиллис.

5) Илкьяйдали цаибил сужда биру, рукугI бирухIеливан ахIи, (сурат 8) гьалавяхI цакьадар имцIали гIяшвиубли.

6) Кайибси жураличи чарухъи, илкьяйда камси багьлабиру.

7) Тяп цаибилван, кIиибил суждара биру. Ил тяхIярличив кавлан ряхIятиубли, «СухIянаЛлагь» эсцад манзиллизив.

8) КIиибил ракагIят барес тIашкалзан (сурат 9) ва гьар секIал цаибил ракагIятлизирван диру. Амма кIиибил сужда барили гIергъи, «Тагьашуд» ва «Салават» кайили дучIа (сурат 9), эгер адамли савлила дехIибала дирули виалли.

9) Илис гIергъи илини дехIибала тамандиру «Ас-Саламу гIялайкум ва ряхIматуЛлагь» или.

Тяп илкьяйдали илини цархIилти дехIибалара диру, гIягIнити ракагIятуни имцIадарили.

3.ТIашкайзес хIейруси адамли дехIибала дирнила тяхIяр

Адамли тIашкайзурли дехIибала дарес хIейрули виалли, кайили дирути сари. ДехIибайчив Кьиблаличи дяхIчили кайили, «Аллагьу акбар» иру (сурат 10), гIягIнити журала дехIибала дарес нигетличил барх ва сура «Аль-ФатихIя» кайили бучIа (сурат 11).

ТIашкайзес хIейрни багьандан, дехIибайчир рукугIра суждара кайили дирути сари. Лерилра цархIилти секIал чедиб гьанбушибси кьяйда диру.

Я рукугI я сужда бирухIели, бекI кьукьубачи яра гIянала кабихьили гIянайчи къячбикахъес гIягIнидеш агара.