Тамашала анцIбукь

Тамашала анцIбукь

ЦацахIели нушани алавчарти анцIбукьуначи пикри бяхIчииули хIедирехIе, илди гIядатла секIайзи халдирули. Амма нуша – алав тамашала анцIбукьуни кадиркули дирар. Гьачам ну Каспийск шагьарлизив узухIели, мижитлизи имам гIягIнили кIел жагьил урши бакIиб. Илди энергетический колледжлизиб бучIути студентуни сабри. Илдазивад ца дебали гъузгъалдивиублири. Илини дурасили гъярдердибти кIапIрачилси Кьуръан чебаахъиб ва сунечил кабикибси анцIбукьличила буриб.

«Цагьачам ну кьакьалавад аркьухIели, Къуръан гъярудуси жагьил адам къаршиикиб. Ну иличи гъамиубли, хъямики Кьуръан кебисухIели ил вирхIесииб.Нуша-ургар къалмакъар демжур. Илини кисализибад бяхъес серил дурасиб. Амма нуни Кьуръан кебасес виубра. Мякьларад аркьуси хьунул адамлис ил набчи вирхъули чебаили, вяв-чIяррикIесрииб. ИлхIели ил урухиубли вебшиб. Ил Кьуръайс се бирусил дудешлизи хьарбаибхIели, имамличи дугьаизахъес маслигIябарили се барес вирарал вакIибсира…»

Нушанира гьариллира илкьяйдали барес асубири, дила пикрили, иман уркIилабси адамли саби илгъуна бирусину. Ил хабарличи лехIахъибхIели ну нушала уршбачи пахрули вицIира. Илдигъунти иманчебти жагьил адамти лебалли нушала, челябкьла баракатласили бирар.

Ил уршила хабарли наб гьалабла тарихлизиб гьарли-марли бетаурси ца анцIбукь гьанбикахъиб. ИтхIели Бишруль-ХIафи бикIуси ца жагьил адам вирусири. Ил шагьарлизивси гьарил адамлис ил держлукь ва шаддикь виъни балусири. Илдигъунтала кьукья шаладикайчи букули, бужули, хIерели бусули, кеп-чеклизир гIямру дуркIулри. Гьачам илкьяйда замана беркIили гIергъи ил хъули чарулхъухIели, чяхI-заб дехIдихьиб. Хъули ветиухIели илис ванзаличиб нясси чIянкIила кесек чебаиб. Кепли виалра илис иличиб белкIунси Аллагьла ﷻ у чебаиб. Илини закличи хIулби ахъдуцили викIар: «Дила Аллагь, ХIела У лайбакIили, ганзбирули саби?!» Илини ил барх касиб. Хъули вакIибхIели, бирцили, умубарили, берахъубли бяхIличи чебяхIкахъиб. Усес кайхьунхIели илис муэр чебаиб ва илабад тIама чехиб: «Ва Бишр, хIу Аллагьли ﷻ чевяхIвируд, хIуни Дурхъаси Аллагьла ﷻ У чебяхIбарни багьандан».

Ил тIярхIухъи валхIун ва гьар секIал аргъиб. Илала уркIилизи иман абацIили, ил шалабарилри. Ил анцIбукьла гIергъи Бишрли держ дархьдатур ва бархьси Аллагьла ﷻ гьунчи кайзур. Илала даража дебали ахъбиуб ва ил ЧевяхIсиличи гъамсили ветаур. Ил динничи чекайзур ва исламла диннизив дебали машгьуриуб. Иличи бахъал адамти дугьабилзутири гIякьлу бурахъес ва насихIят барахъес.

Илала бархьси у саби Абу Наср Бишр ибн аль-ХIарис. Аль-ХIафи (цайкьяшмачил вашан) биалли илала чеимцIа у саби, цайкьяшмачил вашухIели бедибси. Ил гIямру кадикайчи цайкьяшмачил вашусири. Амма илала кьяшмачи сегъуналра нясдеш цIапхIелкутири, илди ванзали кьяриутири, илцадра ил Аллагьли ﷻ чевяхIварибсири.

Ил гьанбикили, студентлизира нуни бурира: «АхIерси узи, хIу гьачамлис жагьли левалри. Балусирив хIуни Кьуръан бучIес? ХIебаладли нушани бурсивирури. Чили бала, эгер хIу иш умматла сегъуна-биалра адамтала кьукьяла цахIнабикнилис сабабли ветаруд, яра цархIил журала бусурмантас гIяхIдешлис сабабли вируд?».

АхIерти гьалмагъуни, нушани диннизиб ахъбуцес вируси се - биалра ахъбуцес, гIеббуцес чебиркур. Иличибли баракат касес ахъри габ Аллагьли ﷻ гьарил ганзлизиб, гьарил баркьудилизиб. Аллагь ﷻ нушачи разивиаб, тавфикь бараб нушаб пикридикIахъес. СенахIенну ЧевяхIсилис вегIла даражаличила, гIямруличила, пикрибикIути дигахъу. Иличибли бархьдешличи дакIили нушала баркьудлумачи чекадизес имканбикIухIели. ЧевяхIси Кьудратла ВегIли нуша исламла дин дигутили ва илис гIеларад дашутили детаахъаба. Амин!

Шамил БяхIяндгIялиев,

Къизларла имамтала Советла председатель