ХатIа
ХатIаХатIа
Мадина алавти мер-мусаличивси ца ухъна гечликьяна гьачам Аллагьла Расулличи ﷺ вакIили тиладибариб:
- Ва Аллагьла Расул ﷺ, хIуни адамти жура-журала балга-дугIяличи бурсибарри, амма нуни белкIес-белчIес хIебалусира, ва илбагьандан илди дяркъес къиянбулхъули саби. Сегъуна-биалра гьамадси балга багьахъагу набзи.
- ГIяхIси, - иб илизи Идбагли ﷺ, - хIера ишкьяйда бурадли хIед баибси саби: «Я Аллагь ﷻ, ХIу дила Аллагь ﷻ сайри, ну биалли ХIела лагъ cайра».
Разивиубли гечликьяна Мадинализивад дуравхъун, амма илини ухънадешлирил яра цархIил сабаблирил хъумартурли ил балга ургIебли бучIулри. Илди лайикьагарти дугьби дикьухIели малаикуни руржесбирхIулри. ИлхIели ЖабрагIил малаик Аллагьла Расулличи ﷺ вакIили буриб, баягъи гечликьянани дугьби дяркъес хIейубли ургIерли дучIниличила.
Идбагли ﷺ бусурмантази хъарбариб ил варгили сунечи живарахъес. Ил Мадинализи вакIибхIели Идбагли ﷺ хьарбаиб:
- Секьяйда дучIулри хIуни илди дугьби?
- Ну дебали разилира ХIуни илди дугьби дагьахъниличи! Ну илдира дурили мурталра хIерли вирус Аллагьла ﷻ уркIецIиличи ва шабагъатличи.
- ХIуни илди далкIли дурулри, тилади саби дархьли дурен, - ва Идбагли ﷺ илизи дугьби дархьли дуриб.
Бедуин бакьибсиличи дебали пашманиуб ва викIар:
- Ва Аллагьла Расул ﷺ, чевверхи набчивад! Нунира хIебагьурли бирхаудилизивад улхъахъути дугьби дурули уилра. Се бариша нуни гьанна ил хатIа бархьбарес багьандан?
ИлхIели ЖабрагIил малаикли Идбагличи ﷺ ЧевяхIси Аллагьла ﷻ дугьби даахъиб:
- Эгер Дила лагъ хатIаикили виалли, Ну хатIаиркуси ахIенра. Ну илала уркIиличи сайра хIерикIуси лезмиличи ахIенрану. Илала лезми хатIабикили биалли, илала умуси уркIи Набчи бирхаудили бицIили саби. Ил багьандан Нуни илис шабагъат лугулра».
