СягIят

Гьачам ца мугIяллим-личи сунени учIахъули калунси дурхIя вакIиб.

- Ну хIуни учIахъули калунсира, варсиублирав? - гъинчIвяхъиб учIан.

- Гьанна гъинчIвяхъибхIели вагьурри, - разивиуб мугIяллим.

Гьаларти дусми гьандуршули илди ихтилатлизи ахъиб.

- Нура хIу кьяйдали мугIяллим ветаурра. Нуша дучIухIели бетаурси анцIбукь гьеч хъумхIертурра нуни. ИтхIели хIела гIяхIдешличивли сайра нура мугIяллим ветаурси, баркалла биаб хIед. - Се анцIбукьличила сари гъай?

УчIанни гьанбушиб. Гьачам дила юлдаш жагаси сягIятличил дурсрачи вакIиб. Ил наб дебали гIяхIбизур ва нуни бигIунра. Илини сягIят бетахъни хIясиббарибхIели, хIези гIярзухъунсири. ИлхIели хIуни бурири:

- ИшбархIи ца учIанна сягIят бигIи саби. Чили ил бигIи виаллира, ил чарбарес чебиркур.

ИтхIели ну урухиубли ва цIахбизурли сягIят чарбарес хIейубра. ХIуни багьахъурри, унза гIекIили, лебилра умцIес хIяжатли биъниличила. ХIулбира дигьахъи, лебилра ахтардибарибтири. Набчи яргабаибхIели, хIуни сягIятра касили, умцIери даимбарибсири. Лебилра къяйцIбарили гIергъи хIуни бурири:

- СягIят баргирану, хIулби абхьая!

Илис гIергъи хIуни гьачамалра ил анцIбукь гьанхIебушири, ва сягIят чили бигIунал чизилра хIебурибсири. Ит бархIи хIуни ну цIахдешлизивад верцахъира. Ил дила гIямрулизиб бегIлара хъумхIертеси бархIи сабри, ва илгъуна гIур тикрархIебарира. Амма хIуни адабдеш дакIударили ну увхIеведира. Нуни аргъира сегъунали виэс гIягIнисил мугIяллим ва халаваибхIели хIугъуна ветаэс кьасбарира. Гьанбиркулив ил анцIбукь?

- ГIе гьанбиркули саби. Илдигъунти жура-журала анцIбукьуни кадиркули дирар балугълахIебаибти биштIатачил. Амма нуни гьанна бикайчи сягIят чили бигIунал балуси ахIенри, сенахIенну нунира хIулби кьяпIдарилри...