Духуси дяхънуша
Духуси дяхънуша
СултIан сунела дигуси вазирличил гамиличив архIяличи дуравхъун. Гьачамалра гамиличи кадхIейибси ва урхьначив куртIхIейкIуси вазир вяв-чIярикIули, гIярзикIули, руржулри ва висулри. Лебилра ил гIеввуцес ва паргъатварес къайгъилизиб сабри. СултIа дяхънушанира иличи гъамиубли се челукьуси лебал хьарбаиб. Амма дурути илала лихIбачи диули хьалли, урехили инжитбарибси уркIилизи диули ахIенри.
СултIан илала тIама-гьамали вамсахъурлири ва хIилхIи сабурбирулри. Жагаси гамиличиб, хьанцIа урхьуличиб, хьанцIа заклиуб дурабуркIуси архIяли илис сегъуналра тIягIям лебхули ахIенри. Иличибли сунечира вайси хIял бакIилри. Ил чебаили илала мякьлав къаршиикибси дяхънуша иличи дугьаизур: «Ва султIан, ихтияр гадли нуни ил паргъатирис».
СултIан итмадан разиикиб. ИлхIели дяхънушани къуллукъчибази хъарбариб вазир урхьулизи лайвакIахъес . Илдани къалабали хъарбаркь бартаахъур, сенкIун ил сунела тIама-гьамаличил лебтасалра анцIукьири. Вазир шиннизи лайвакIиб. Ил пялхъярикIули гьачам шинна чеди, гьачам шинна уди вашулри, аъвяхъили гьава супIбирули, гамиличи ахъуцахъес тиладиикIесииб. Ил шиннизивад дурасибхIели, лехIкахъили гIямзила кайиб. Ил суратличи хIерикIуси султIан тамашавиубли сунела дяхънушази хьарбаиб:
- Сегъуна пасихIдеш леба хIела баркьудилизиб?
Дяхънушани жаваб чарбариб:
- ХIела вазирли урхьула зукьити шинна тIем гьачамалра халхIебариб. Илини шин сецадра урехилати диэс дирутил пикрибирули ахIенри. Илкьяйдали илини балули ахIенри кьяшмала удиб чIумаси чIябар биъни сецадла талихI сабил. Паргъатдешла ва яхIбарес вирнила мягIна балуси саби гьачам биалра урехиличи вяхIягибхIелицун.
