Ухънала савгъатуни
Пулан шилизив ца пасихIси ухъна хIерирулри. Иличи унрубала дурхIни гьаман шадиб башутири. Ухънасра илди дебали дигахъи ва имцIасигъуна замана илдачил барх буркIусири. Илини сунени балуси секIайчи биштIатира бурсибирулри. Илкьяйдали ухънани илдас сунела някъбани дарибти хIязла ваяхI савгъатдирулри. ДурхIни илдачи дебали разилири, амма илди савгъатуни жявли дялчулри. Пашманти дурхIни ухъначи бакIили бетаурсиличила бурибхIели, илди гIурхIелис мяхIкамли биахъес махикIулри.
Илини биштIатас сагати хIязла ваяхI дарили пешкешдирулри. Сецад дурхIни мяхIкамли вяшбикIалра, илди дялчулри. Илдачил хIязтали хIебиркьули буэс илди хIебирулри, илцадра илди хIяздухъестири.
Сагадан дарибти хIязла ваяхI савгъатдарили, мяхIкамли дихIяхъес бурсибирулри. Савгъатуни дялчулри, дурхIни биалли бисулри. Илини цархIилти хIязла ваяхI дарили дедлугулри, амма илди гьаларлаван ахIи, назиклири.
БиштIатала бегIтани гьанхIедуцили, иличи бакIили бикIар: «ХIу дебали духуси, пасихIкар сайри ва нушала дурхIнасра дебали дигахъулри. ХIед илдас гIяхIдеш биубли дигулри, илди селичи-дигара бурсибирулри. Амма сен хIуни илдас илдигъунти савгъатуни пешкешдирути? Илди пергер ваяхI сари ва илдачил хIязтани хIеркьес хIейрар. Илди мяхIкамдарес дурхIни сецад къайгъилизи бикалра, илди дялчули сари, дячунхIели илди пашманбирули саби».
«Камси замана бикили гIергъи, илдира гьатIира жагати ваяхI дирес бурсибирар. Илди халабаибхIели, чили-биалра илдас чула уркIи савгъатбиру. Дила мурад саби, илди дурхъаси савгъатличил мяхIкамли бирахъес бурсибарес», - жаваб бедиб ухънани.
