Зияратла мерани
Зияратла мерани
МутагIялимла хIяб
Дагъистаннизир машгьурти шайхунала ва динна гIялимтала дурхъадарибти дахъал мерани лерти сари. Илдала хIурматбарес ва баракат касес адамти ила зияратличи башар.
Илгъуна мер леб Дахадаевла районна Гьунахъарила шила мякьлабра. Илабси хIяб мутагIялимла саби, сайра жяв замунтазив Буйнакъсклизив учIули калунси.
Ил вебкIибхIели, итди дусмазив илабти адамтани мякьлабси шила жамигIятлизи ведибсири. Илдани цархIилтази, илкьяйдали гьарил шила шантани вебкIибсила жаназа мякьлабси шилизи бедлугусири, сунела шилизи баахъили хIярибихьахъес багьандан.
ХIуллила шила шантани Дахадаевла районна Гьунахъарила вацIализи ил жаназа баахъибхIели, заябирес бехIбихьни багьандан ил вацIализи хIярибихьибсири.
Ил мутагIялимла хIяб гьунила мякьлаб саби ва гьарил шалгIевулхъусини илис балга-дугIя делчIес имканбикIар. Ил мерлис "Цугла хIяб" бикIар.
Чумал дус гьалаб вебкIибси мутагIялимла шанти Гьунахъари чула зугIяла хIясибли бакIибхIели, шила имам ГIябдусаламли илдази мутагIялимличила бурибсири. Илдани илала гъамти баргиб, ва лебил шантачил барх бакIили, хIябличи къаркъа катIун, садакьа бутIиб ва балга-дугIя дариб.
Илала у МяхIяммад саби, Цугнивадси ГIялила урши. Бурни хIясибли, илала хIябла мякьлаб уркIиличи тамашала ряхIятдеш ва ванадеш башар, илала баракат мякьлабтачи биур. Нушанира динна гIилму руркъухIели Аллагьли ﷻ арукибси нушала бусурман узис дугIя барахIелли, ил разивирар ва илала рухIличи биур. ЧевяхIси Аллагь ﷻ илала бунагьуначивад чевверхаб ва гьалжанала агьлула вараб.
ЧевяхIсила дин руркъути ва ил тIинтIбирути нушабра Кьудратла ВегIли иманчебси бебкIа ва гIяхIси ахират кьадарбараб. Амин!
МухIяммад ХIяжиев
