Мубарак
Мубарак
Дагъистан Республикала муфтий, шайх ГIяхIмад Апандини улкала бусурманти дурхъаси Хала БархIила байрамличил мубаракбариб.
Ассаламу гIялайкум ва ряхIматуллагьи ва баракатугьу! ХIурматла узби ва рузби! УркIи-уркIиларад мубаракдирулрая хIуша Хала БархIила байрамличил. Ил дуббуцарла баз таманбиънила баракатла бархIи, лебилра бусурмантас бегIлара мягIничертазибад ца саби. Абзур баз лебил дунъяла бусурманти дуббурцули, сабурбирули, уркIецIи дакIубирули, ЧевяхIсилис шукрубирули, гIяхIти баркьудлуми дурадуркIутири. ХIушазибад бахъалгъунтани, ишбархIила чула гIямрулизирти къияндешуначи хIерхIеили, гIяхIбаркьла кумек гIеббиахъули садакьа бирусири.
ЧевяхIсини хIушала гьарил гIяхIси баркьуди кьабулбараб. Илкьяйдали декIар-декIарти миллатунала ва динанала вакилти, Дагъистаннацун ахIенну, улкала гьарил гIямзилабтира бархли, лебил базлизиб дубкабалтес цахIнабиркутири. Ил дебали дигеси ва разиси анцIбукь саби, сенкIун илдигъунти далдуцунани узидешла бархбасуни уржахънила ва цIакьдирнилацун ахIенну, патриотизмала, вегIла ВатIайчи ва цала цаличи дигила хIялани алкIахъули сари. Илдигъунти мажлисуначир динничила ихтилатунани ва аргъбаибти масъулти хIердирнили, гьарил адамлизир адабхIяяла ва рухIлашалти, дебали мягIничерти дурхъати секIайчи гъира ва иштяхI алкIахъули сари. ЧевяхIсиличи халаси шукру бирулра, Илини нушаб ишди баракатла бурхIни кьадардарнилис, ва иличил барх тиладибирулра, гIергъити дусмазирра илгъуна уркIецIилизирад нуша мяхIрумхIедарахъес. ЧевяхIсилизи тиладибирулра лерилра нушала дуббуцари, закат, садакьа ва лерилра гIяхIти баркьудлуми кьабулдарахъес.
Кьудратла ВегIлизи улгулра нушаб лебтасалра цIакь, сабур, дагьричердеш гахъес, ва иличир тIашхIедизурли, цархIилти базаназирра гьатIира дахъал гIяхIдешуни дирахъес. Цалис цали кумекбирахъес, чердурхахъес ва чердерхни тиладибирахъес, вегIличил цархIил секьяйда вирули дигулрал илкьяйдали гъамтачил ва алавтачил дирахъес. УркIецIила ВегIлизи тиладибирулра, иш дурхъаси, баракатла баз сабабли, нушала лерилра бунагьуначивад чевверхахъес, лерилра балагьуназирад, питнабазирад ва дургъбазирад мяхIкамдарахъес, къияндешунази бикибтас сабур ва цIакь бедахъес. ЧевяхIси Кьудратла ВегIла уркIецIи ва даршудеш диаб хIушаб ахIерти узби ва рузби!
