ДехIибала дирухIели хIейгести хатIаби
ДехIибала дирухIели хIейгести хатIаби
Ишар гьандушибти хатIабани, ил цацун биалра дехIибайзиб нукьсандеш алкIахъу, илгъуна хатIаличил дехIибала кьабулдирути диалра. ДехIибала хатIабазирад умули, саркъахъили ва чедетаахъили дурадеркIнили илдала кьимат ахъбирахъу, илди жагадирахъу.
Карагьат
ДехIибала дирухIели карагьат саби:
1.ХIяжатханализи укьес гIягIнидешли кьакьаварибхIели дехIибала дарни.
2.Алавчарли баралра хIерилзни.
3.Се-биалра убасни, хахамбарни, гъез хIяршдарни.
4.Мурул адамтани дехIибайзив тIашхIели, кьяшми дарх кадалтни.
5.Гушли дехIибала дарни, кьанхIедирули диалли, беркалара хIядурли лебли.
6.ГIяшли делчIес гIягIнити ахъли делчIни.
7.ХIямамлизир, базарличир, хIябразир, киласализир, няс цаладикибси мерличир, мицIираг цаладиркуси мерличир, гъятIбиънила урехи лебихIир, дебали гьанкIикIули дехIибала дирни.
8.ДехIибала дирухIели, чизи-биалра сегъуна-биалра лишан барни.
9.ДехIибайчир къидала уди някъби кадихьни.
10.ДехIибала дирухIели, Аллагьличила ﷻ пикрумазивад улхъахъути секIайчи хIерилзни: сягIятличи, някьишличи ва цархIилти.
11.Зараллизивад уруххIекIуси мерлар хIулби кьяпIдарни.
12.ХIевала дулгъуби гIегIдер-гурли дехIибала дарни.
13.ГьаладяхI яра лехIел (балуй) шайчи тудяхъни.
ДехIибайчир хIейгести, чули кири камбирахъути гъарацIуни
Удир гьандушибти гъарацIуна-зирадра дехIибала умули диъни дебали дигеси саби:
1.ДехIибала дирухIели алавчарли хIеризни.
2.Кьяшми хъуцIрумачир имцIали дягIули кадатни, хаслира жамигIятла дехIибайчир, кIелра шайчибти унрубас диргалаулхъули.
3.Кьяшми дебали гъамли кадатни (ца чIимличир гъамли).
4.Кьяшми кьячIуби чедетаахъили, гумли декIарли кадатни.
5.ГIяшли делчIес гIягIнити, цархIилтас диргалаулхъули, жамигIятла дехIибайчир ахъли делчIни.
- 6. «ФатихIя» бучIухIели, някъби къидала уди, къидала чеди шайчи, гIяхIцад алгъай шайчи кадуцни. (ГIягIниси мер – алгъай някъла жимгIя тIул бархьбарибхIели, къидала чухълаличи чебетаэс).
7.ЖамигIятла дехIибайзиб имамлис гьалаб «Амин я роббаль гIяламин» ирни.
8.РукугI бирухIели, дебали къухIизни.
9.РукугIлизир някъби газа някъбазирад далкIахъни, (дархьли хIедиубли).
10.СуждабирухIели, гьала-гьала ванзаличи някъби кагахъни, кьукьуби ахIи.
- 11. «АттахIийятулизиб» «илла Ллагь» ибхIели тIул зубрази бяхIчиаэсли дебали ахъбуцни, ил вяшбикIахъни, «илла Ллагь» ибмад гIяшкабирни (бара ахъбиахъубли, къухIли тIул лерилра балгни делчIайчи бихIуси саби).
12.Гьар «Аллагьу акбар» ибхIели, чедаахъибти авалра хIяйзир ахIи, лихIбачи адаайчи ахъдурцни.
13.Суждаличи арукьес гьалар лагдяхI шалбарла кьялуби зуздарни.
14.ДехIибайзир дучIутала ургав (ца таманбиубли итил бехIбихьайчи) ряхIятхIейъни.
15.ДехIиба бехIбихьудлизив тIашизурси мерличив кахIели, гьалавяхI, гIелавяхI яра ца шайчивяхI витIакIни.
16.ДехIибайчи кайзурхIели, «Аллагьу акбар» ибнира, нигет барнира, някъби ахъдуцнира ца заманализир, дарх детхIедерхахъурли цализирад ца декIардарни.
17.Костюм (пиджак яра цархIил) хъуцIрумачи чебуцили (чесагьурли ахIи), дехIибала дарни.
18.Суждализир газа някъби ванзаличи чекагахъни.
19.КIелра саламла ургаб бекI гIяшбарни.
