Халати бунагьуни
Халати бунагьуни
(бехIбихьуд гьалабси номерлизиб)
Идбагли ﷺ бурибсири: «Сунела жагьдеш мяхIкамдарибси Алжанализи айцIур».
ИшбархIила къиянси замана жагьил адамли ислам динна рукнуби дузахъули, халати бунагьуни хIедиралли, илис Алжанализи гьуни кункси саби.
Аллагьла Расулли ﷺ бурибсири, халкьлизиб къехIбадеш тIинтIбиалли, иличил дарх кьявгала ва цархIилтира гьалар агарти, декIти излуми тIинтIдирути сари или. ХIера итхIели Идбагли ﷺ бурибси хIекьдешлис гьанна адамтала жинсла биркIантазибад тIинтIбиубси изайс тухтурти «чума 20 –го века» бикIули саби.
Бурули саби, шайтIунтала гьабкьянали гьар бархIи сунела хIерудилиубти илбисуни дунъякад тIинтIбирути саби ва илдачи адамти бархьси гьунчибад чеббалкIахъес хъарбируси саби. Илдазибад декIарбухъунти сунечи гъамбарили, илдачи таж биршуси саби.
Ца илбис чарбухъи бикIар: - Нуни мурул-хьунул цаличи ца гьимбукIахъира, ва илди декIарбиркур.
- Илизиб селра тамашала агара, - бикIар халал шайтIан - илди сагадан хъайчи кабиэс бирар.
КIиибил илбис разили чарбухъун: - Нуни кIел юлдаш гьимбукIахъира!
- Илди даршубиэс бирар, - разихIебикиб халал шайтIан.
ХIябъибилра илбис бакIили бикIар: - Нуни адамли зина барайчи иличибад чебхIебикира!
- ХIуни бегIлара гIяхIси барилри, хIу дила бегIлара гъамсили бетаруд, или иличи таж баршиб.
ХIера, секьяйда дузулил шайтIунти адамти ЧевяхIсила гьунчибад чеббалкIахъес багьандан.
Адамти хIярамси зинализибад мяхIкамбарес багьандан ислам диннизир дузахъути сари:
1.Къадагъабарибси саби цаличи ца иштяхIличил хIербикIни, чIянкIубирни, хьунул адам ва мурул адам цунбухъни, хьунул адам цунни сапарличи дурарухъни, держли бужни.
2.Хьунул адам хIеррарес хъарси саби дудешличи, муруйчи яра узиличи, мискиндеш сабабли зина хIебарахъес багьандан.
3.ДекIарбиркни кункбарибси саби ва чумал хьунул кабатес ихтияр лебси саби.
4.Исламли къехIбадеш къадагъабарибси саби, зина барибти хьунул адам яра мурул адам биалли, цIакьли танбихIлабирути саби.
Илкьяйдали бурули саби жамигIятли ЧевяхIси Аллагьли ﷻ хъардарибти хIедирули бунагьуни диралли, танбихI гIеббиуси саби или. Адамтани адаб-хIяяла шайчирти ва цархIилтира низам-кьяйда хIедузахъалли, мискиндеш тIинтIдирути сари. ЖамигIят-ургаб зина тIинтIбиалли ва илизибад урузхIебикIули дигIянхIебиралли, бубкIути ва дагьриагарти имцIабирути саби. Адамтани умцантачиб биткIайкIухIели биргIябиргалли, сабухъ камбируси саби. ЖамигIятли закат хIелугалли, заб камдирути сари ва дегъдеш тIинтIбируси саби. Ишгъуна къяй гIуррара даимбарес вирар…
Илдигъунти ва цархIилтира балагьуни ва мусибатуни хIедиахъес багьандан адамти ЧевяхIси Кьудратла ВегIлис мукIуртили биэс ва хIярамсиличи гъамхIебиэс гIягIниси саби. Аллагьли ﷻ нуша бархьси гьунчирад черхIедалкIахъес тавфикь бараб. Амин!
