Аллагьли ﷻ къияндешуни дурхьнила 5 сабаб
Адамла гIямрулизир къияндешуни къаршидиркнила сабабти лерти сари:
1.Челукьути, къиянти масъултани нуша дархьдарили, дяхIчииутира. Асубирар илди масъулти хIушаб гьаликIли детаурли, хIуша сегъуна-биалра гIяхIси баркьудиличи гьуцIдарес, гIямрулизиб се-биалра барсбарес. Сагати имкантачи леркура. ЦацахIели, нушала гIямрула гьуни барсбиахъес багьандан, къияндешуни чараагарти сари.
2.Къияндешуначибли ЧевяхIси Аллагьли ﷻ адамти ахтардибирути саби. Бурала лебси саби «хIушаб чяйла пакетла бухIнаб се хебал багьес дигадалли, ил руржути шиннизи къужбарая» ибси. Гьарли-марли Аллагьличи ﷻ вирхни къияндешунала манзил гьаргбируси саби. Гьарилти къияндешунани ва имтихIянтани нуша дирхнила даража ахтардибируси саби – нуша Аллагьли ﷻ бархьибсиличи разилирал яра кьабулагардеш балахъулрал. Къияндешуни чедуркъубхIели, илди нушала бирхауди ахтардибирнила лишан биъни хъумартес асухIебирар. Къиян-жапа черардякьи гIергъи, нушани шабагъат сархес дирутира, ва ил сабабли сабурбирес чебиркур.
3.Къияндешуначирли ЧевяхI-сини нуша гьатIира гIяхIтили детарахъутира. БегIтани виштIасилизи буцIарсиличи къячикахъес къадагъабирули бирар, амма илини ил иргъуси саби чIянкIли буцIарагибхIелицун. ЦацахIели нушани села-биалра – арадешла, адамтачилти бархбасунала ва цархIилтала кьадрила мягIна балули дирехIе ил агарбиубхIелицун.
- ЧевяхIси Аллагьли ﷻ адамти мяхIкамбирути саби. Ил багьандан къияндешуни гIяхIдешличи шурдухъес асубирар, сенкIун илдани нуша гьатIира халати бунагьуназирад мяхIкамдирутира. Иличила адамликIун багьес хIейрар. Гьала хили секIал балуси ца Аллагьлицун ﷻ саби, Илала багьудлумани лерил секIал духIнадурцути сари. Адамлис цацадехIти къиянти имтихIянти цархIилтазирад мяхIкамирутили, гьарли-марси берцудили диэс дирути сари.
- Къияндешуначибли ЧевяхIсини адамти гIяхIбухъахъи, ахъси даражаличи абиркахъули сай. Нушани имтихIянти дуцили, къияндешуни сабурличил дяхIяурхIели, нушала хIял-тIабигIят дебшладирути сари, ва нуша гьатIира гIяхIтили детарутира. Кьудратла ВегIлис дигуси саби гьарил акIахъубси инсан гьатIира гIяхIсили ва адабчевсили ветаурли. Къиян-жапали нуша сабурчердирахъулра – ил саби бусурмантала бегIлара гIяхIси къиликъ, малхIямтили, къияндикибсилис кумекличи музадулхъутили детарахъулра. Иличибли Дурхъаси Аллагьличи ﷻ дирхала имцIабирули саби, гIямрула имтихIянти илала кумекличил детурхахъулра.
