Cен висивиибсири бебкIала малаик?
Cен висивиибсири бебкIала малаик?
Ца бакьалализиб бурили саби, ЧевяхIсини гьачам пулан хьунул адамла рухI асахъес бебкIала малаик вархьили сай. БебкIала малаик иличи вакIибхIели, ил михъирли валхуси виштIасиличил чIянкI авлахъличир раргиб. БебкIала малаикли илди чебаибхIели, виштIасиличи уркIецIидухъи, висивииб.
Амма цархIил бареси аги, малаикунаскIун ЧевяхIсини чучи хъарбарибси хIебарес асухIебирар. БебкIала малаикли ил хьунул адамла рухI асили, виштIасира цунни ватурли, арцурли арякьун. Илис гьанбикибсири, сай вахъхIи агарли ила чарухъи, виштIасилара рухI асес чебиркур или. ИлкIун цалра мицIирси жан агарси чIянкI авлахъличив сайцун калун. Сен-сен хIерируси ил мерлав?! Илала гIергъи дахъал дусми ардякьун, ва бебкIала малаик ца ухъна адамла рухI асахъес вархьиб. Ил ухъна мегьла устачи вакIили, сунела урца гIяйсалис мегьла къиза барахъес хIерлири.
Илини устази дахъал дусмазиб белкхIебелки калеси, чIумаси къиза барахъес тиладибирулри. Иличила аргъили бебкIала малаикли дукелцIи тIашаэс хIейуб: сецадхIи хIериэс пикриикIуси ил ухъна, илискIун ца гьигьла манзил саби лебалси? БебкIала малаикли ил ухънала рухI асибмад, иличи ЧевяхIсиличибад хабар бакIиб: «ХIела дукелцIидухъахъунси ухъна, баягъи ит виштIаси сай, уркIецIидухъи висули, хIуни чIянкI авлахъличив цунни ватурси».
СубхIяналлагь, сецад халаси Илала адамтачила къайгъи, ил мицIирли калахъунси?! Иш хабарли нушази балахъули саби, сецадхIи адам хIерирули виалра, илцадра илала гIеркъати гIямруличи хьул бирни. Иличила ишгъуна мягIнала хIядисунира лерти сари: «Адам вахъхIи хIерируцад, илала иш дунъяличи диги имцIабикIуси саби, хьуланира цIакьдикIути сари». «Ухънала уркIи, иш дунъяличи ва гIеркъати гIямруличи дигили бицIили, жагьли кавлуси саби».
