Салаватличила баян
Салаватличила баян
Идбагличи ﷺ салават бушибси адамлис Аллагьли ﷻ 10 салават чардиру.
Аллагьли ﷻ салават чарбарибси адамличи Жагьаннабла цIа къячхIебилкан или хIядислизиб леб. Салават сегъуна жураличиб белчIаллира илала дурхъадешличила хIядисуназиб бурули саби.
Салаватла пайда ва дурхъадеш:
1) Адамли Идбаглис ﷺ салават буршухIели, ил Аллагьличил ﷻ цугиркули сай, сенахIенну Идбаглис ﷺ салават Аллагьлира ﷻ буршуси сай, чула салаватуни декIар-декIарти диаллира.
2) Идбагличи ﷺ салават буршуси адам ил салават бурули левай, Аллагьла ﷻ малаикунани сунечира салават буршу.
3) Салават бучIуси адамла Аллагьли ﷻ вецIал гIяхIдеш имцIадиру, вецIал бунагь умудиру, ил вецIал даражала ахъурцу.
4) Кьиямала бархIи Идбагли ﷺ ил адамлис шафагIят биру.
5) Адамли салават белчIунхIели, илала кери малаикунани мургьила кьаламтачил арцла кIапIрази лукIа ва ил адамлизи бикIар: «ХIуни салават имцIабирен, Аллагьли ﷻ хIела керира имцIабирусину».
6) Аллагьли ﷻ ил иманагардешлизивадра, цIализивадра мяхIкамвиру.
7) Кьиямала бархIи Аллагьли ﷻ сунес шагьидуначил барх ряхIятдеш луга.
8) Салават белчIунсилис малаикунани истигъфар (Аллагь ﷻ илала бунагьуначивад чевверхахъес тиладибикIни) биру.
9) Ил адам вебкIибхIели, сунени белчIунси салават хIябличи тIашкабизурли, илала бунагьуни умударахъес тиладибикIар.
10) Ца салават белчIунсилис УхIудла дубурацад кери бедлуга.
11) БелчIунси салават малаикунани Идбагличи ﷺ арху, Идбагли ﷺ сунечира чарбиру. Илизибадли гьар салават Идбагличи ﷺ бетиахъуси саби.
12) Салават сабабли бирар дунъялара ахиратлара хIяжатуни бекIдиънилис, анцIкьи-шишимъала черардукнилис, бунагьуни умударнилис.
13) Салават дурхъали бирар лагъ азадватниличиб ва гъазаватли дураухъниличиб.
14) ГIямалти лукIути малаикуни салаватли бунагь хIебелкIахъи тIашиули саби.
15) Салаватли адам цIализивад уцахъули сай ва 80 дусла бунагьуни умудирули сари.
16) Аллагьла ﷻ разидеш бакIнилис ва уркIецIи хьурабирнилис сабабли бетарар.
17) Аллагьла ﷻ гьимилизивад уцахъу, ва Кьиямала бархIи милигхIейахъес ва гIяхIти гIямалтала шали декIбиахъес сабабли бетарар.
18) СиратIла гумиличивад някъ буцили шалгIеввалта.
19) Чили салават белчIаллира ца бархIила бухIнаб 1000-на, сунела Алжанализибси мер чебаайчи яра малаикунани сай Алжанала агьлулизивад ветарниличил разиварайчи убкIхIебкIар.
20) Ца салават цугбиру Аллагьла ﷻ гьунчир дарибти 20 гъазаватличи.
21) Алжанализибти вегIла хьунри (хIурулгIянти) имцIабирнилис сабабли бирар.
22) Садакьа барес имкан агарси адамлис, салават цугбиркур садакьа барниличил.
23) Ца бархIилизиб чили 100-на белчIаллира, Аллагьли ﷻ сунела 100 хIяжат бекIдиру – 70 ахиратла, 30 дунъяла.
24) Салаватличи даимвиъни, дугели шаладикайчи гIибадатлизив виубсигъуна саби.
25) Аллагьлис ﷻ бегIла дигути гIямалтазибадли саби, Кьиямала бархIи ва СиратIла гумиличиб нур саби.
26) Мискиндеш аркьяхъу.
27) Салават имцIабарибси, Аллагьлис ﷻ бегIла дигусира бегIла Сунечи гъамварибсира сай.
28) Кьиямала бархIи ХIявзличи арукнилис сабабли бирар.
29) Балга-дугIя кьабулдарнилис сабабли бирар.
30) Давлара имцIабирахъу, гIяхIти гьундурачира салават бучIуси вархьилзахъу.
ИкIди лерил гIяхIдешуни халати гIялимтани хIядисуназирад касили чула жузазир делкIи сари.
Камалуддин-хIяжи
