ХIеруди цIакьбарили дигахъира
Гьари пикрибарая, хIулби кьяпIдарили нуша чина-биалра дукьес дирутирав? Юх, гьамадли хIебирар, нуша кадикес асубирар. Амма, севан хIейгеси анцIбукь биалра, акIубхIейчибад хIулбазиб нукьсандеш лебти нуша-ургаб къаршибиркули саби.
СекIал чехIебиухIели, илдас дебали къиянни саби хIербиэс. ГIямру цIябдешлизир аркьули хьалли, бахъалгъунтани пикрибируливан, илди талихIагарти ахIен. Сукъуртала халаси иштяхI бирар саби-алавси дунъя сегъуна сабил багьес. Илдас дунъя дебали жагасили, пергерсили билзули саби. Бахъалгъунти бикIули бирар: сукъуртани чехIебиули биалра, илдани дебали жагали иргъуси ва гягI балуси саби или.
Гьаннала замана нушала улкали халаси пикри бяхIчииули саби хIулбала шала агартачи ва вайтIа чебиутачи. Илдала гIямру гьамаддиахъес пачалихъли халаси хIянчи бирули саби. Масала, МяхIячкъалализиб лебси саби хIулбазир нукьсандешуни лертас хасбарибси школа-интернат. Илаб хIулбала шала агарти дурхIни цархIилти адамти-ургаб хIербирахъес бурсибирути саби. Илавси гьарил дурхIяличил мугIяллимтани декIарли хасси хIянчи бируси саби. Школа-интернатлизир жузи халати сари. Иларти белкIанира халати хIурпрчил делкIи сари. Иличи че, мугIяллимтани бучIанти музейлизи, театрличи, цирклизи ва цархIилти жура-журала мусаличи бикути саби.
ГIуррара МяхIячкъалализиб лебси саби сукъуртас хасбарибси республикала библиотекара. Библиотекализир дахъал тамашалати бикьнила (аудиокнига) жузира лер. Илар дахъал далдуцунира дурадуркIули дирар. Масала, октябрьла вецIну цараличиб библиотекализиб «журуга стол» бетерхурсири. Илизир бутIакьяндеш дарибти-ургаб секIал чехIебиутира бахъал сабри. Илдани чула гIямруличила, акьуси замана дурабуркIнила тяхIяр-кьяйдаличилара буриб. Гьарилла хьуланачи ва пикруми-кьасаначи лехIирхъес наб дебали тамашабизур. Бахъалгъунтас дигулри чула гIямру Интернетлизир цархIилтази чедаахъес, къантIли буралли, блогерти бетаэс. Сукъурти биалра, имцIатигъунти илдазибад хIянчурбачира башули саби.
Нушала адамти, илдигъунти ва арадешлизир цархIилти нукьсандешуни лертас хIяжатси кумек гIеббаахъес гьалакли биъни якьинни саби. Масала, машинабала гьуни ахъахъес кумекбиру…
Амма вайнукьабира камли ахIен. Илдигъунти адам сукъур виъни багьурхIели, сегъуна-биалра вайбаркь дураберкIесра аварабирар: арц керасес, биргIябиргили, чучила баянти дурахъес ва цархIилтира.
Севан хIейгеси биалра, бурес хIяжатли саби - нушала шагьарлизирти гьундурала дубаначирти дякьяни дебали вайси агиличир сари. ЧехIебиути халкьлис биалли, илгъуна гьуникад башес гьатIира къиянбулхъули саби. Илдигъунти гьундури къулайси агиличи душес хIяжатси саби.
Дила пикрили, секIал чехIебиутас гьар-чинаралра хасти шуртIри гьаладирхьес хIяжатли сари. Ил масъалаличи гIуррара чеимцIаси пикри бяхIчиаили дигахъира. Нушала республикализирра вайтIа чебиути адамтас хасдарибти жура-журала цахIнабяхъ ва проектуни лерни дигеси анцIбукьли бетарули саби.
