Ладан

Ладан адамтани жявти замунтачибадал пайдалабирусири. Ил босвеллия бикIуси галгала ниъличи мешути шиннизибад бируси саби. Илди галгуби Африкализир, Азиялизир ва ГIярабияла байхъуостровличир дашути сари. ГIергъиси манзил адамтани цIабикьалалис пайдаладирули, галгуби камдикIули сари, сагали удалтути диалли камти сари.

Ладан кайсуси саби галгала кам гъяраили, иларад дашути шиннизибад чIумабиубси къир бетаруси саби. Къир биалли, парла кумекличил, эфирла гIявадешличи шурбатесра вирар. Къирла декIар-декIарти жураби дирар, илдазир дахъал химияла элементуни лер. ЦацадехIти къирлизир 80 - цад жура-журала секIал лерти сари.Гьарил къирла журализир эфирла гIявадеш, тритерпенна кислота, камедь, камфен, минералти ва дахъал цархIилтира кьаркьайс пайдалати секIал дирути сари.

Ладан ва илала гIявадеш арадеш къулайбарес пайдалабиру:

- тяхIувиубхIели, сурс-кьакьари изухIели;

- хургьрала излумачи къаршили (бронхит, пневмония);

- уркIиличи ва бекIла мехIеличи гIяхIлашал асарбиру;

- кьамсикI, лига-кьякья изухIели (артрит, ревматизм) ;

- кьаркьайзирти имцIати шин дурайъу;

- кани, чимхъа-умхитIла язва сагъбиру;

- секIал хъумхIертахъес кумекбиру;

- гьанкI гьунчибиркахъу;

- иммунитет цIакьбирахъу;

- нерваби ряхIятдирахъу.

ЖявхIейчибад нушала хала бегIтани ил шайтIунтазибад ва сихIрулизибад мяхIкамдешлис пайдалабирусири. ИмцIаливан ил абалкахъи, гьава гьигьбиру, гавличил хъулри умудиру. Илкьяйдали илизирад дармунти, мазь, креманира дирути сари.

СекIал хъумхIертнилис ладанна чумал кьякь дугели шиннизи кадихьили, савли шишдарили, дуженая. Кьуръа аятуни адам сагъварахъес дучIухIелира ладан гавбикIахъни гIяхIсилизи халбируси саби.

Арали калабая!