Омега – 9
Кьаркьайс хIяжатти гIявадешуни-ургаб Омега – 9 леб. Ил олеиновая кислотализибад цалабикибси саби ва имцIатигъунти духълумала гIявадешуназиб бируси саби.
Омега – 9 тумачир холестеринна цахIнабикуни хIедиахъес кумекли бирар;
кьаркьайзир кадиркути дарсдешуни гьунчидуршу;
гормонтала цадеш гIеббурцу.
Кьаркьайзиб Омега – 9 камли биалли:
- кам буръар,
- никуби дялчян,
- хIила гъяж ахъбирар,
- беркала бицIни усалбиркур.
Илини бемдриличи къаршидеш диру, чейхъути излумазибад мяхIкамдеш биру, кьаркьа бузери ункъбиру.
Омега – 9 лерти продуктуни:
авокадо, хиви, миндаль, кешью, арахис, семечкаби, арцанна диъ, хIяйва гIявадеш, ниъла продуктуни.
Лерилра 3, 6, 9 – Омегабала гIявати кислотабала пайдаличила нушани бурира. Кьаркьа арадеш бихIес багьандан илди лерилра цугли пайдаладирес чебиркур. Амма халаси кьадарлизиб берцIибси диъ букес гIягIнидеш агара. ИшбархIила манзилла адамтала хуреглизиб Омега – 3 ва – 6 камли саби, сенкIун гIяшси даражала гIявадешуни пайдаладарили дарибти хурегуни дукухIели (фаст-фуд ва цархIилтира). Омега – 6 духълумала гIявадешуназибад кайсес вирар, Омега – 3 биалли бархIилис чумал хив деркалли яра урбешла гIявадешла кьулса бужалли кьаркьайс баарила кьадар абиркур. Илкьяйдали жумягIли гьачам бялихъла диъ букес вирар.
Омега – 9 хIебиути анцIбукьуни камли къаршидиркур, сенкIун ил духълумала гIявадешуназиб лебхIели ва цархIилтиван ахIи нушала кьаркьайзибра бетарухIели.
Омега – 6 ва Омега – 9 имцIаси кьадарла пайдалабирнила асурти мешути сари. Халаси кьадарла гIяваси хурег букалли ишдигъунти нукьсандешуни алкIан:
хIила гъяж ахъбирар;
битIакI имцIабирар;
уркIила ва тумала излуми алкIан;
дулекIла бузери усалбирар;
беркала бицIни вайбирар;
камла излуми дакIудирар;
хIи дуцдирар.
Багьес чебиркур, сецад пайдалати диаллира илди гIявадешуни мяхIкамдешличил пайдаладирес чебиркур, кьаркьайчи гуж хIебиэсли.
Жагадеш, арадеш ва жагьдеш дахъхIи калахъес багьандан кьаркьайс хIяжатти лерилра гIявадешуни, витаминти, ва микроэлементуни кайсес гIягIнити сари, ва зараллати продуктуни хIедукес. Арали калабая!
