Лаванда

Лавандализир кальций, магний, натрий, железо ва цархIилтира дахъал пайдалати микроэлементуни, А, С ва В кьукьяла витаминти лерти сари. Илизир чумал эфирла гIявадеш лер.

Эфирла гIявадешуни лавандала вавалидяхъибти хъараначирад дашахъути сари. Илдазиб бегIлара пайдаласи саби линалилацетат. Илини клеткаби сагадирути сари. Ил тяхIярли лавандализир цитраль ва цинеол антибиотикуни лерти сари, илдани кьаркьайзирти агъулати секIал дурайути сари. Лаванда танинтачиблира давлачебси саби ва илдачибли жижкIаби, дяхъурби сагъдирахъу, иммунитет ахъбирахъу. Лавандализир бемдри убабилзахъути, гьимила пушягIлизибад гьими дурайути, клеткаби сагадирути, нервабала ибкьдеш агарбирути, агъула секIал дурайути, изала хIярхIбирахъути, уркIила ва хIила гъяж гьунчибуршути кумаринти, тизанти ва дахъал цархIилтира пайдалати секIал лерти сари. Ил багьандан лавандала вавни косметологиялизирра, медицинализирра гьаман пайдаладиру. Илкьяйдали эфирла гIявадешличил массаж дарес вируси сай гIемснала бамсри убасес яра гьанкI башахъес багьандан. ГIемч-хъехI лерхIели ингаляция бируси саби. Лавандала вавназирад нервабала ибкьдеш агарбирахъути чяй дарес вирар.

Амма сецадра дахъал пайдалати секIал лерли диаллира илди кьар далхIедиркути ва кьаркьай чехIейсути адамти бирути саби. Ил багьандан мяхIкамдешличил пайдаладиреная.