Низ

Низ Дагъистайзиб гьаман пайдалабируси кьар саби. Низлизир витаминти - С, А, Е, К, микроэлементуни - кальций, магний, железо, кремний, фосфор ва кислотаби лерти сари.

Иличибли саби ил пайдалачебси ва дахъал излумачи къаршидеш дарахъес адамлис кумекбируси. Илини кьаркьайзибси бемдри камбиру, букIмала, дягIла излуми, подагра ва илдигъунти цархIилтира излумачи къаршидеш диру. Илини лига-кьякьяла арадеш къулайбирахъу, жихI гьалакбирахъу ва жихI дурайути биркIантала изала алкIахъути микробуни агардиру. Низли кьаркьа чехIейсудеш (аллергия) камбиахъес кумекбиру. Илизир дахъал пайдалати секIал лерниличирли хIилизибси чакар камбиру.

Низли хIила туми дягIударили, хIила гъяж гIяшбирахъуси саби. Илини хIи дурадашни тIашиъни багьандан, гинекологиялизиб тIинтIли пайдалабиру.

Камла излуми сагъдирни багьандан биалли, косметологиялизиб ва бекIла гъезличи хIеруди бирнилизиб пайдалабируси саби. Ил бархти шампунтани ва маскабани гъезла ва бекIла камла арадеш ункъбиру.

Низбани уркIила бузери ункъбиру, кьаркьайзир углеводунала ва белокунала дарсдешуни жигарчердиру. Илизир каратоноидуни дахъал лерни багьандан хIулбала шала къулайбиру.

ЗярхIти низбала шинни биркIантазирти къаркъуби тIутIудирути сари. Низби делхьунти шин варъаличил дужалли урцецунала бузериличи гIяхIси асар биру. БиштIати ниъли балхути хьунул адамтани низбала чяй дужалли ниъ имцIадирар. Низла мякьира пайдалати сари, кIапIри кьяйдали. Низбазир 100-личирра имцIали пайдалати секIал лерти сари.

Низби гьаман пайдаладиру чяй, нергъ, салат, чудни ва чудухинкIи дирухIели. Амма сецад пайдалати диаллира илди кьар гIягIниси кьадарла сари дузахъес асубирути.