Чедибдеш сархиб
Чедибдеш сархиб
Каспийск шагьарлизибси ГIяли ГIялиевла у бихуси спортла КIялгIялизир Дагъистан Республикала «А» классла тайский боксла абзаначир бутIакьяндеш дариб Хайдакьла районна
ЖирабачIила урга даражала школала бучIантани, сабира ил школализив узуси физкультурала мугIяллим Руслан Даитовли хIядурбарибти. Илди абзаначи спортсменти ункъли хIядурбиублири, ил багьанданра хIяблилра цаибти мерани сархиб: 34 килограммла битIакIлизиб - Арсен МяхIяммадовли, 48 килограммла битIакIлизиб - МяхIяммад МяхIяммадхIяжиевли (илди кIелра 2008-ибил дуслизиб акIубти саби), 36 килограммла битIакIлизиб - ГIяхIмад Ражабовли (2009-ибил дуслизив акIубси). КIиибти мерани дуцес имканбакIиб 2008-ибил дуслизив акIубси МяхIяммадхIяжи МяхIяммадхIяжиевлис ва 2010- ибил дуслизив акIубси Руслан МяхIяммадхIяжиевлис. Лебилра чедибдеш сархибти уршби лайикьти грамотабачил, медальтачил ва кубокуначил шабагъатлабариб.
Илди абзаначиб чедибикибти Дагъистан Республикала тайский боксла цахIнабяхъибси командализи кабурхахъути саби, ва Южный Федеральный Округла чемпионатлизир бутIакьяндеш диру. Мажалисла дурхIнала спортла школала спортсментани, сабира тренер Марат Мамедовли хIядурбарибти, «Звезда ковра» бикIуси республикала гьаргси азадли мушулбашнила абзлизирра бутIакьяндеш дариб. Илди абзани МяхIячкъалализир Автодорожный колледжла спортла КIялгIялизир детерхуртири. АбзбикIути 2009-2012-ибти дусмазиб акIубти уршбири. 38 килограммла битIакIлизиб цаибси мер сархиб Хайдакьла районнизивадси Ислам Рабадановли. Чедибдеш сархибти спортсментас ва илдала тренертас халаси баркалла багьахъур Хайдакьла районна бекIли.
