Редакциялизи суал
«Ихляс» сураличила бурили дигахъира
«Аль-Ихляс» сурала дурхъадеш
Идбаг ﷺ викIар: «БелчIенная сура «Ихляс» (Кьулгьу), марлира гьачам белчIунси сура «Ихляс», Кьуръа хIябал бутIала ца бутIа белчIниличи цугбиркур». ДекIарти хIядисуназибра буруливан, хIяйна сура «Ихляс» белчIалли, лебил Кьуръан белчIунсиличи абиркур.
Ил Кьуръа 112 ибил сура 4 аятлизибад цалабикибси саби. Ил бегIлара къантIтазибад биалра, амма мурхьси мягIналичилси сура саби. Ил «има умудеш» или шурбатес вирар. Илала цагьатIи у леб «Ат-Таухид» ибси.
Нушачи Жабирличибад баахъибси бархьси хIядислизиб Идбагли ﷺ бурили саби: «Чили бархIилис 50-йна сура «Ихляс» белчIалра, Кьиямала бархIи илизи иру: «Эй, Аллагьлис ﷻ деза бируси лагъ, айзину Алжанализи ацIи».
Муслимли ва Бухарини нушачи баахъибси цархIил хIядислизиб бурули саби: «МухIяммад Идбагли ﷺ адамтала кьукья архIяличи бархьили сай. Илдала имамли гьар дехIибайчиб бучIуси сура «АльхIям-ФатихIя» белчIи гIергъи, сура «Ихлясра» бучIулри.
АрхIяличибад чарбухъунхIели, тамашабизурли илдани Идбаглизи ﷺ ил секIайчила буриб.
МухIяммад Идбаг ﷺ викIар: «ХIушани илизи хьарбаая гьарил дехIибайзиб, гьарил ракагIятлизиб «АльхIям-ФатихIялис» гIергъи сура «Ихляс» сен бучIусирил».
Идбагли ﷺ бурили кьяйда, асхIябтани чула имамли калунсилизи хьарбаиб ил сура бучIнила сабабличила. Илини буриб: «Ил сурали Кьудратла ВегI Аллагьла ﷻ ЧевяхIдеш ва Дурхъадеш чебиахъули саби, ил багьандан наб ил бучIес дигахъис».
Илала жаваб аргъибхIели, Идбаг ﷺ разивиубли викIар: «ХIушани бурая илизи Аллагьлис ﷻ ил дигахъниличила».
ХIурматла динна узби ва рузби! «Ихляс» сурализир 47 хIярп лерти сари. Кьуръайзибси гьарил хIярп биалли, вецIнали имцIабируси саби. ХIебиалли, сура «Ихляс» белчIнилис шабагъатра 470-йчи абиркули саби.
Ил сура Маккализиб бархьибсири, Идбагличи ﷺ бирххIерутани: «Бура, чи сая хIела Аллагь ﷻ, се насаблизивадси ил?» или хьарбаибхIели.
УркIецIила ва РяхIмула ВегI Аллагь ﷻ багьандан. Илала мягIна, бура: «Ил - Аллагь ﷻ, Цацун сай. Аллагь ﷻ Даимси, ХъархIерагарси, Илис чилра хIяжатси ахIен. Ил акIубси ахIен ва Иличивад чилра акIубси ахIен. Ил Цаси сай ва Иличи мешуси Илгъуна цархIил чилра агара».
Гьачамра Идбагли ﷺ асхIябтази хьарбаибсири: -- Марлира хIушазивад чилилра Кьуръа хIябал бутIала ца бутIа ца дугели белчIес хIейрусив?
- Секьяйда вируси ил ца дугели белчIес?
ИлхIели Идбагли ﷺ бурибсири ил сурала дурхъадешличила. Аллагьличи ﷻ вирхусини ил хIяйна белчIалли, Дурхъаси Кьуръан белчIунхIелигъуна шабагъат кайсу. Илкьяйдали Кьудратла ВегIла диги ва уркIецIира кайсу, иман умубирар ва цIакьбикIар, вайдешлизибад мяхIкамдеш бирар ва Кьиямала бархIи дуббуцари кьяйда Кьуръанра бусурмайс шафагIятли бирар.
Кьудратла ВегI Аллагьли ﷻ нуша Кьуръан имцIали бучIутазирадли дараба. Амин!
