«ГIямрули парчдикIути» урунжуни
Гьалар шимазир гIямру парчдикIули дири. Илар дубурти дулхIехъули адамти бузерила маргьлизи ахъилри: буралли, гьар дурабуркIуси баркьуди лебтанилра цабиубли, уржили, далай-гьалайличил бетурхахъули бири.
Чили-биалра юрт лушулив, лебилра барх бякьи, билхъа дураберкIили, жумягIла бухIнаб ил белши тIашбалти. ИшбархIи цала хIянчи дири, гIергъила бархIи – цархIилла. Лебилра барх, мирхъила тIакьаван, уржили хIянчи детурхахъутири.
Амма иларти гIямру мурталра шагьарлизирти гIямрулизирад декIардулхъули дири: чула гIядатуначил, низам-кьяйдаличил. Дубуртазиб хIербирути адамтира рухIлашал дебати, чула тIалабуначилти, хала бегIтала гIядатуначи чекабизурти бири. Ил багьандан илди мурталра шагьарлантазибадра декIарбулхъутири. Шагьарланти чула бурсибиубти гIямрула бетуцлизиб хIеркабири, шимала халкь биалли – чедир гьандушибти тяхIяр-кьяйдала хьулчиличиб.
Буралли, гIямру ца мерличир тIашли дуули ахIен, илди дарскадиуб. Дахъал дарсдешуни кадикиб дубурла шимазирра. Гьанна цацадехIти шимазиб хIербирути адамтала лугIира дебали камбиубли саби. Иличила пикриухъалли, децIхIейкIесра хIейрар. СенахIенну набван цархIилтасра, дубурти гIядатуни мяхIкамли дихIути нушала дурхъати аслу-мина сари. Илди дуб-дубли дацIкадулхъни чебиули, уркIилис гIядаббулхъули саби.
Дила пикрили, шимазиб жагьилти буахъес багьандан бегI гьалабси яргализир илар хIянчила мерани акIахъни саби. Ил масъала гьунчибикахъес бажардибикалли, нушала хIукумат багьла-багьлали лебилра халкь шимази чарбулхъи. Гьанна дахъалгъунти шимазир къулайти шуртIри лергу: тIабигIятла газ, хутI, шин, гьундури, школаби. Агарси хIянчицун саби.
Гьаларван хъуми дузахъули, хIяйван-къача адилкьули хIербиресра бири адамти. Амма сархибти продуктуни дурхахъес къиянбулхъули саби, ил багьандан бекIахъ сархес или, шимазибад цархIилти мер-мусаличи гечбирули саби.
Дигахъаси нушала ахIерти шими гьалар кьяйдали сагадан «гIямрули парчдикIути» урунжуначи шурдухъи, дацIкадухъунти, пайтдиубти гIяргIябержуначи шурдухъунти мер-муса хIеди-убли.
