Се бетаэсара?
Нуни Интернетлизиб гIяхIцад замана буркIули вирус. Наб дигахъис иларти багьахъниби делчIес, сегъуна-биалра тамашала секIайчила багьес. Интернет дебали пайдаласи секIал саби нушала манзил дакIубиубси. Амма, илизибад халаси урехира лебси саби. Ил бузахъес балес хIяжатси саби. ИшбархIи дила гъай Интернетличила ахIен. Нуни социальный сетаназиб бахъал адамтани лукIули чебаира ишдуслизир сунела сай узусилис (самозанятый) налог ахъбуцили бирар или.
ЦархIил шайчивад хIеризалли, илдас (самозанятыйтас) кабизахъурси налог биштIаси ахIен. Адамтани ил гIядатла хIянчурбачиб бузутас кабизахъурси 13 процентла налогличил цугбурцули саби. Дила пикрили, ил бархьси ахIен. Ил журали бузути адамти предприниматель сай ва илала налог илдалайчил саби цугбурцес хIяжатси. Илдала ургабси декIардеш — адам узуси сай сунела сай ва сунечиб бузути хIянчизарти лебти ахIен. ХIебиалли, бахъалгъунти предпринимательтанира чула бакIибси хайриличи 6 процент саби налогла бедлугуси. Сунела сай узусинира яра 4 процент гIядатла адамтас хIянчи бирули биалли, яра 6 процент юридический кьяйдали хIисаблизи касибсилис хIянчи бирули биалли. Цугли саби, ахIенну?
Самозанятыйти сабливан чула у белкIахъи, бузутас бачабирхес хIяжатдеш агара. Самозанятый ибси балбуц нушала улкализиб эксперимент (хIясиббируси) сабливан дурабуркIуси саби, ва ил вецIал дуслисцун хасбарибсири. Ил заманала бухIнаб Россияла 422 ибил номерличилси Федеральный Закон хIясибли, балбуц дурабуркIуси заманала бухIнаб налогла хIекьлизир дарсдешуни кадикахъес асубирули ахIен. Ил балбуцла ахир 2028 ибил дусла декабрьла 31-личи бикайчи бухъянбилтIуси саби. Илала гIергъи се бетарарал балуси агара. Ил даимбирув, яра убкайсув. ХIебиалли, ил бархIи сабаайчи бузутас урухкIес хIяжатдеш агара.
2024 ибил дусла баянти хIясибли, Россиялизиб 12 миллион 172 азирлим 902 адам (самозанятыйти) хIисаблизи касили саби. Илала башуси хайри 2,4 миллион къурушличиб имцIякь биэс асубируси ахIен. ИмцIали биалли, ил цархIил тяхIярли: ИП (индивидуальный предприниматель) кьяйдали яра ЮЛ (юридическое лицо) сайливан налоговыйлизи хIисаблизи кархес хIяжатли саби. Илис цагьатIи кункдеш леб - Пенсионный Фондлизи дедахъес чедаахъибти хъарти харжани агара. ИмцIаливан ил журализиб адамти хъулри лушнилизиб ва сагадирнилизиб бузути саби. КIиэсил мерличиб машинаби далдирнилизиб бузути. ХIябэсил мерличиб, цархIил журала хIянчи дирути; жагадешла салонтазиб, палтар ибнилизиб. Цаибил мер бурцули саби Москва шагьарли. Илаб 100 азир адам хIисаблизи касибхIели, 12 азирцад адам бузули саби ил журали. КIиибил мер Санкт-Петербургли бурцули саби. Тамаша, хIябэсил мерличиб Дагъистан саби. 100 азир адамлизибад 8932 ил журали налоговыйлизи хIисаблизи касили саби.
Дила пикрили, Россиялизиб бузуси ил жура гIяхIси саби. Бахълис бузес ва чедаахъибти налогуни дедлугесра гьамадли саби.
