Газетала юбилей

Газетала юбилей

Нурулгьуда Ражабова, «Ас-салам» газетала цаибил редактор, Россияла журналистунала ва писательтала Союзунала член, ДР –ла культурала рурибси хIянчизар, Дагъиста халкьла игит:

- Газета «Ас-салам» дебали бархибси замана дурабулхъес бехIбихьибсири. ИтхIели 1999 ибил дуслизиб Дагъистан Россиялизибад декIарбикахъили, исламла пачалихъ бетаахъес къачагъунала халаси кьайгъи лебсири. Ит замана бегIлара гIягIнисили ва халаси кьадрила бегI бетаур газета, сабира адамти чебхIебалкIахъес кумекли биубси. Ишабра доллартала асарлиу бикили чеббалкIунти, илди вайнукьаби гIеббурцутира лебри. Ил багьандан халкьлис бархьси динничила балахъуси газета хIяжатлири. Газета бегI гьалаб урус мезла, кIарахъала, гIур дарган мезличил дурайэс бехIбихьибсири. Динна Идарализи жирарили, газета бузахъес ибси пикри гьалабихьибхIели, ну «Замана» газетализир рузусири, дила ил шайчибси бузерила стажра устадешра лебхIели, ну кьабулрикира. Гьайгьай, къияннири, нуни макьалаби лукIусири, шурдалтусири, динна гIялимтачил гьунириусири. Биалра, къияндешуни чекасили, 9 дус хIянчи барира. Иш газетализиб хIялалси жагаси хIянчи барес гIягIниси саби, сенахIенну ил гIядатла газета ахIен, Аллагьла ﷻ гьалар жавабкардеш дихутира нушани. Адамтас гIяхIси–вайси иргъахъуси, умуси исламла динна кьадри иргъахъуси газета сабхIели, илала кумекличибли гьалабла бахъал атеистуни динничи бакIибтири, бахъличи гIяхIлашал асарбарибсири. Нушала редакциялизи дахъал баркаллала кагъурти дашутири илдигъунти адамтачирад.

Чараагарли газетала кьадри, даража гьатIира ахъбуцес гIягIнили саби, Интернетлизирти динничила къалпти баянтачи пикри камбарес багьандан. ГъарацIли калунти адамтала дагьри черсаргъахъес багьандан лайикьти белкIани лукIес, гIяхIти журналистунала пикруми дурахъес, гьунибаъниби дурадуркIес чебиркур, аргъбаибти масъулти ахъдурцес ва илди ирзес багьандан.

21 ибил даршдус – исламла саби бикIулину, чи сейкIалра нушала ислам дин гьалабяхI аркьян. Дурала улкназибра, хаслира Европализиб ислам дин бузахъути, кьабулбирути имцIабикIули саби. Исламла дин – даршудешла ва гIяхIдешла дин саби, илисра бусурманти бахъбикIули саби.

Ил газетализир рузес бикни дебали халаси игъбарлизи халбирулра. Нушала хала бегIти дебали динничи чекабизурти бирутири, дила пикрили, илдала гIяхIдешличибли ва шапагIятличибли илгъуна бетаурли бургар, илдала баракат гIеббаили.

ХIурматла дарганти, иш газетала кьадри нуни гIяхIил аргъира, иш бархибси замана газета насихIятчи саби, чидил мезличил дурабулхъули биаллира. Дебали дигесилизи халбирулра ил 13 мезличил дурабулхънира. Ил бучIалли, гьар секIал, дила пикрили, гIяхIла шайчир гьунчидиркур. УркIбазиб иман имцIабирар, Аллагьличи ﷻ бирхауди, Кьуръайчи диги, даршудеш кавлан, хъалибарглизиб балгундеш, талихI бирар. Адамтани бала, секьяйда хIербиэс гIягIнитил, вегIлисцун ахIи, мякьлабтасра гIяхIли биахъес, ЧевяхIси Аллагьла ﷻ уркIецIи гIеббиур. Аллагьли ﷻ дургъбира черарку, дявчибира танбихIлабиру. Исламла газета бучIуси пашманхIейрар, разили вирар, къулбасбиреная ва бучIеная газета «Ас-салам», илхIели хIушала багьудлуми имцIадирар.

ПатIимат ВяхIидова, дарган мезличил дурабулхъуси «Дагъиста хьунул адам» журналла редактор:

- Дагъистайзиб «Ас-салам» газета абхьни дебали гапбареси анцIбукь сабри. Газетали нуша уркIичердирулра, динничи имцIали дитIикIулра, адамтас гIяхIбарахъес гьуцIдирулра. Республикализиб ил газета дарган мезличилцун ахIи, цархIилти миллатунала мезаначилра дурабулхъни пахрубареси саби.

Дарган мезличил дурабулхъуси газетализир Нурулгьуда Ражабова бегIгьаларси редактор сарри. Илис баркалла багьахъес дигулра, газеталис хьулчи кабихьили, гIяхIси хIянчи барнилис. Илис гIергъи рузес ну ракIира. «Ас-саламлизир» рузути дусми бегIлара талихIчерти дусми сарри или гьанбиркур, сенкIун нушала гIилмула гIялимтачил гьунибаънибани, диннизир лерти кьанунти дагьес къайгъилизи бикибти адамтачил къаршириркнили дила уркIилизи имцIали динна масъулти минадиуб, уркIи гIяхIбухъун, лерилра шалубазирад гьарли-марли гIяхIси адам ретаахъес икьалабиуб.

«Ас-салам» газетализир ну рузуси замана бахъал пагьмучебти жагьил адамти бири, дебали гIяхIти, цалис ца икьалабиэс гъазализибти. Гьанна газета 25 дус биубли саби, газетали халаси хIянчи бариб. Ну шилизи рякьунхIели, дила уркIи хIилнабиркьули бирар «Ас-салам» газета някълизи буцили, мягIналашал ва каргьнилашал гьардизурти хабурти, мягIничерти белкIани дучIули, шанти-адамти разили чебиухIели.

Дила хъалибарглира дарган мезличил ва урус мезличил дурадулхъути газетаби кайсути сари. Нуни илди мурталра дучIули рирус. БусягIятла замана газетализир рузули сари дебали гIяхIси бухъя зегъала регI, пергер хьунул адам, адамтачи дигичерси, хьунул адамтас гIибратли риэси. Газета гIуррара дахъал дусмазиб дурабулхъули, адамтани бучIули калаб, Наида, хIу илкьяйдали адамтас гIибратли риубли. Лебилра газетализиб бузули калунтира бусягIят бузутира мубаракбирулра. Лебтасалра арадеш, талихI, разидеш, уркIилизи сабур, баракат дулгулра. Бархибси замана чебарбякьи, гIяламла уркIбази гIяхIдешуни ва разидешуни хьурадиаб, цала-цали хIурмат-хатир дирули, жагали гIямру деркIес Аллагьли ﷻ кьадарбараб!

«Ас-салам» газетала редактор Наида Гъуруева:

ХIера, Дурхъаси Аллагьла ﷻ у бихуси нушала газета дурабулхъули 25 дус дикили сари. БегIлара къиянси манзил акIубси ил, илцад дусмала бухIнаб дебшлабиубли, кьуватли бицIили, жагьти гIямрула хъилизи бизурли саби. Ил гIялам халкьлис гьарли-марли белхъхIебелхъуси рухIлашалси, адаб-хIяялашалси хазнали кавлули саби, сунечила тарихлизир дурхъати къел датурси ва даимлис кавлуси.

Газетали ахъибси гьуни гIеркъаси хIебиалра, ил дебали къиянсири, амма илини асилдешличил сунечи гIямрули чедуркъахъибти къиянти имтихIянти асилдешличил ахъиб. Ил хIейгути бахъал сабри, амма ил мутIигIхIебакIиб ва дунъякад азадли къунзбикIули халкь бархьси гьунчи кабилзахъуси бекIлибиубси насихIятчили кавлули саби. Ил саби балутала хъули адабдеш, ряхIму, диги, сабур, гIяхIдеш, баракат, талихI ва дахъал цархIилтира ЧевяхIси Аллагьли ﷻ Сунени дурхъаварибси Расуллис ﷺ дедибти къиликъуначил абицIули, рухIлашал илди давлачеббирули саби. Илини биштIати, жагьилти, гьести гIямрула адамти хIеили – лебилралис гIяхIлашал бяркъ бедлугули саби. ЦархIилти адамтачи дигиличил, сабурличил, хIурматличил, уркIецIиличил бирахъес гIеббурули саби. Газета «Ас-салам» - халкьлис бекIлибиубси насихIятчили кавлули саби.

ИшбархIила замана нушала халаси улка Россиялизиб 13 мезличил дурабулхъуси газета бегIлара дебали бучIуси газетали кавлули саби. Илизиб бузутира бегIлара черикIла динна гIялимти саби, дахъал дусмазиб кайсуси динна гIилмула хазнали чебицIибти ва гIягIнибикибхIели, кумекла някъ гьабалтути. Гьайгьайрагу, илдала мякьлар нура биштIаси цIимицIала кьяйда, даим илдала баракатли гIерруцибси, гIяхIти къиликъуни гIерисули, гьар шайчир гIибратчерсили риэс къайгъилизир гIилму чедирцIахъулра.

Нуни дила халаси игъбарлизи халбирулра ЧевяхIси Аллагьли ﷻ наб илгъуна хIянчи кьадарбарни, машгьурси хIядис марбирули: «Аллагьла ﷻ гьалаб адамла даража сегъуна сабил багьес багьандан, хIеризи хIу ЧевяхIсини се санигIятлизи вархахъилрил» ибси мягIнала.

ГIе, гьамадси бузери ахIен ил газетализиб бируси хIянчи, амма: баркалла балахъути, кумек тиладибирути, насихIятличи хIяжатти, динна багьуди ва бяркъ касес дигути адамти лебни балухIели, илдачирад дашути кагъурти ва зянкъ дирухIели, иргъулра сецадла багаласи сабил ил хIянчи.

Лебилра 13 мезличил дурабулхъуси «Ас-салам» газетабала хIянчизартас чIумаси арадеш, гьамадли ахIенси бузерилизир сархибдешуни, баракат ва сабур далгес дигулра. Гьанбиркахъеная, гьарил дурайуси газеталичил, илизиб хIядурбируси белкIличил барх хIушани умуси исламла динна бутIа гьарил учIанничи биахъули диъниличила. ХIушани бирусиличи ЧевяхIси Аллагь ﷻ разили виаб! Амин.

ГIябдуллахIяжи Хидирбеков, ДР- муфтийла кумекчи

- МухIяммад Идбагли ﷺ буриб: «Багьудлуми тIалабдирни гьарил бусурман мурул адамла ва хьунул адамла чебла саби». ГIялимтани ил хIядис баянбирули саби, чараагарси секIал багьес багьандан къайгъибарни фарзлизи халбируси саби или. Мисаллис, ЧевяхIси Аллагьли ﷻ нушачи хъардарибти: дехIибала, Рамазан базлизив дубурцни, ва цархIилтира Аллагьла ﷻ гьаларти адамличир дахъал чеблуми лерти сари. Илкьяйдали балес чебси саби илди дирнила тяхIяр-кьяйда: арканти, шуртIри далес. Тяп илкьяйдали хъарси саби вачар бузахъуси адамличи исламла дин хIясибли секьяйда ил бузахъусил багьес. Ил тяхIярли иш дунъяла баркьудлуми дурадуркIухIели исламла дин хIясибли секьяйда дирутил багьесра чебиркур. Ил гьарил бусурмайчиб чебси саби. ИшбархIила манзил ил секьяйда балуси или хьарбаадалли, гIялимтани бурули саби кIел тяхIярли или: цаибил лебтанилра балуси – мадрасала студентли ветаэс, мутагIяллимли виэс сегъуна-биалра динна заведениелизи кархурли дурсрачи вашес. КIиибил биалли, гьаргти дурсрачи вашес, гIялимтази суалти хьардиэс, илдас жавабти кайсес. Леб цагьатIи тяхIяр, ил кIиибил жураличи арбухес вирар, ил саби сунела дин бални исламла газета къулбасбарниличибли. Ил Дагъистайзиб дебали машгьурси газета «Ас-салам» саби. Ил газета къулбасбарили вегIла дин, исламличила сагати хабурти дагьес вирар. Илизир дахъал бяхIяни лер: хьунул адамтас, суалти-жавабтала, кьанунтачила, идбагунала манзилла тарихличила ва цархIилтира. БегIлара гIягIниси биалли, дурхIнас хасбарибси бяхI саби, сенкIун нушани балулра биштIати ишбархIи секьяйда руркъулил, нушани балулра сецад къиянни бегIтани илди руркъулил, илис бяркъ саби или эс вируси виалли. Илди гьар секIал ца газетализир лер ва гьарил ил къулбасбарибсини сунечи гIялим живирусван бетарули саби, илкьяйдали сунени ислам тIинтIбарес кумекбирули сай. СенахIенну «Ас-салам» газета къулбасбарибти арц исламла дин тIинтIбарес пайдаладирути сари. Ил газета урус мезличилцун ахIенну, дагъиста цархIилти мезаначил ва дурала улкнала мезанчилра дурабулхъуси саби. Ил нушала халаси Россиялизибра тIинтIбируси саби. Ил газета нушала хъулиб биалли, хъалибаргли иличибли гIяхIдешцун кайсу.

ГIяхIмад МяхIяммадов, исламла гIилмуртала доктор

- «Ас-салам» газета саби тIалабуначи мешули, жамигIят-ургар алкIути аргъбаибти масъулти ахъдурцуси, шаригIят хIясибли илди баяндируси, челукьути масъулти секьяйда арзес гIягIнисил буруси газета саби. Илини адамлис насихIятуни гIердурули саби. ИшбархIила манзил алкIути сагадешуначила жавабти лугули сари. Илизи тарихлашалтира белкIани кадерхахъурли сари, идбагунала манзилличила, хаслира нушала дигуси МухIяммад Идбагличила ﷺ, асхIябтачила, имамтачила. Гьар журала адамтас, гьар бархIила гIямрулизир багаладиэсти насихIятунира гьаладихьили сари. Вирхулра 13 мезличил дурабулхъуси газета челябкьлализибра гьатIира халкьлис багаласили бетарниличи, нушала республикалисцун ахIенну лебил улкала бусурмантасра.

ГIяхIмад КьурбанисмягIилов, Красноармейск поселокла имам:

- «Ас-салам» газета дебали мягIничебси ва пайдаласи газета саби, хаслира ишбархIила бархибси замана адамтас бархьси гьуни чебиахъуси. Илизир дахъал баянти лер, динничилцун дархдасунти ахIенну, гIямрулизирра багаладиэсти, насихIятуни, хабурти, викторинаби, кроссвордуни биштIатала дурарад халатасра дигести.

Илала дурабадра газета урус мезличилцун ахIенну, даргала, кIарахъала ва цархIилтира Дагъиста 13 миллатла мезаначил дурабулхъуси саби. Ил заманаличиб бучIантачи биахъни дебали дигеси саби. Гьарли–марси динничила баянти илизирад сари кайсути, сенкIун илди бирхаудичерти сархIели. Ишаб имцIаливан дарганти хIербирули биъни багьандан, ил пергер газета дарган мезличил къулбасбирути имцIабирниличи вирхулра.

ПатIимат Сулайбанова, «Замана» газетала редакторла заместитель

Дарган мезличил дурабулхъуси «Ас-салам» газетала даргантала рухIлашалти гIямру давлачердирнила шайчиб халаси кьадри леб. Газета «Ас-салам» къулбасбарнилира адамла багьудиличи, исламличи диги иргъахъули сари. Ил рухIлашалти багьудлуми тIинтIдируси газета саби, суненизира Исламла бекI мягIна бухIнабуцибси. Газетализир гIядатлибиубливан, халкьла гIямру чедиахъути сари, илди сегъуна даражаличир сарил, миллатлашалси культура, тарих, мез мяхIкамдируси гIягIниахъала саби ил, халкь секьяйдали хIербирулил ва цархIилти анцIбукьуни гьаргдируси. Амма диннашалси газеталичила гъайдикIахIелли, илизир рухIлашалти гIямру, динна умудеш, шаригIятла кьанунти секьяйдали дузахъес гIягIнитил нуша бурсидирулра. Ил шайчир «Ас-салам» газетали гьатIира халати жавабкардеш дихули сари. Ил багьандан ишбархIилис газета «Ас-салам» халкьла рухIлашалти гIямру гьаладяхI дашахънила шайчиб бекIлибиубси гьаликIлизи халбарес вирар, сенахIенну гьар шайчирад гьаладяхI ардякьунти гIямрулизир нуша рухIлашал давлачертили диъни бекIлибиубсилизи халбирулра. ГIе, ишбархIи Интернетла сурсатуначил имцIали пайдалабикIули саби, ил багьандан гьарил газетала электронная версия лебнира дебали гIяхIси кункдешлизи халбарес вирар.

 Нушала Идбаг ﷺ викIусири: «Багьудиличи гьуцIвикIни – гьарил бусурманничи хъарси чебла саби». «Ас-салам» газеталира нуша диннашалти багьудлумачил дегIдирулра, бухъя-зегъа ункъдирахъниличи пикри бяхIчииули саби, гьар шайчирад гIяхIдухъахъес кумекли бетарули саби. Гьарилла хъулиб исламла газета къулбасбарили биэс гIягIниси саби.

 Гьачам нушала Идбаг ﷺ мижитлав левли, иличи Сафван бин Ассаль аль-Муради вакIиб ва иличи дугьаизур: «Я Аллагьла Расул ﷺ, марлирагу, ну багьудлумагIив умцIули вакIибсира». Аллагьла Расулли ﷺ илис жаваб чарбатур: «Багьудлумачи гьуцIвикIусилис гIяхIдеш биаб! Марлира, бугьудлумагIив умцIуси малаикунани чула дуклумачил алавурцуси сай, илис гIергъи илди цаличи ца тIашбилзути саби удибси закличи абаайчи, ил гьуцIикусиличи дигила халадешли!»(Ат-ТIабарани, аль-ХIаким).

Газета «Ас-салам» гьатIира гьалабяхI башахъес, газета бучIутала ва ил къулбасбирутала кьадар имцIабиахъес, хIушани Аллагьла ﷻ гьунчиб бируси кирила баркьуди ЧевяхIсини гIеббуцаб ва хIушаб гьар ганзлизиб икьалавикIаб! Амин.

«Ас-салам» газета 25 дус биубли саби. Илди дусмазир дахъал дарсдешуни кадикиб. Редакторти барсбиуб, сагати бяхIяни дагьардиуб ва тираж имцIабиуб. БарсхIебиубси чIянкIли газетали буцибси гьуни саби – умуси дин ва багьуди тIинтIбирнила.

«Ас-салам» газеталичил мурталра барх саби нушала бучIантира, даим сагаси номер бакIайчи хIерти ва газетала марти бучIантили кавлули, илис ахъси кьимат кабалтути.

ПатIимат ХIясанова, Хайдакьла район, Мажалис

10 дусличибра имцIали нуни газета «Ас­салам» къулбасбирулра. Дебали тамашаласи ва мурхьси бухIнабуцличилси газета саби. Дебали гIяхIбилзан «Суалти­жавабти» бикIуси рубрика, илизир наб челукьути суалтас каргьахъурти жавабти дургули рирус. Дигахъис халкьла медициналичила, хурегуначила, идбагуначила бяхIяни. Ил газета балкьарахъутас ва учредительтас баркалла багьахъес дигулра. ХIурматличил ва дигиличил хIушала газетала ручIан.

Зугьра ХIясанова, Хайдакьла район, ГIяхIмадкент

«Ас­салам» газеталичила нуни аргъибсири 1997 ибил дусличибад. ИтхIели динничила халаси балуси аги ва асес литература хIебири. Нуни ил газета къулбасбирес рехIрихьира, ил наб дебали гIяхIбизур. Ил газетала гIяхIдешличибли нуни нушала динничила дахъал баянти дагьурра. ИлхIейчибад нуни газета кайсулра. Дахъалгъунти гьаларла номерти мяхIкамли дихIулра.

Нуни бегIла гьалаб суалти – жавабти рубрика бучIули рирус. Илар нушала суалтас жавабти даргес вирар.Баркалла багьахъес дигулра ислам динна кьанунти дархьли жамигIятличи диахъути, илаб бузути лебилра гIялимтас, ил газета дурайути журналистунас. Газеталис челябкьлализир сархибдешуни диубли дигулра.

Сулайбан ГIялиев

­ Мурталра разили вирус сагаси газетала номер набчи баахъибхIели. Нуша дебали разилира газетала жура­журала баянтани чебицIибси ва гьарилли сунес пайдаласи баргес вируси бухIнабуцличи. Цаибил яргализиб ЧевяхIсилис шукру бирулра, хIушагъунти нушачи уркIи изути лернилис ва нуша хъумхIертнилис баркалла. Газетализиб бузутас сархибдешуни дулгулра. Гьаман нушагъунти гьести гIямрула дегIти адамтачи гьардикIули, нуша сагати хабуртани разидирули, газета заманаличиб биахънилис баркалла балахъулра.

РайхIянат ГIябдуллаева, мугIяллим, ГIяхIмадкент

Газета 5 дусличибра имцIали кайсулира. Ну газета белчIес хIерли рирус. Ил газетализир дахъал тамашала, пайдалати, багьудлуми имцIадирути макьалаби дирар. Дахъал суалтас жавабти даргес вирули сай ислам динничила, шаригIятличила, иш дунъяличила ва ахиратличила. Жагьилтас бяркъ бедлугниличила дахъал белкIани лер илар. Газета дахъал шалубарси саби, сенкIун декIар­декIарти дусмала адамтас хасдарибти макьалаби даргес вирар илар. Илкьяйдали дирар насихIятуни, хабурти, адаб­хIяяличила белкIани, хурегличила дархли. Наб гIяхIбилзан газета дарган мезличил дурабулхъни. Нуни сархибдешуни, гьарбизуни дулгулра, гIурра вавалибяхъяб хIушала газета ва ил къулбасбирути имцIабиаб. Баркалла ил баркьарахъути газетала хIянчизартас.

Майя, мугIяллим, МяхIячкъала:

­ Газета наб дебали дигахъис, илини адамтас халаси пайда бихни багьандан. Халатас, биштIатас, жагьилтас ва гьар журала санигIятунала адамтасра дархли илар багаладиэсти насихIятуни лер. ГIягIнити журала белкIани даргес вирар илизир: суалтас жавабти, хурегла рецептуни, дурхIнас хасдарибти, тарихла анцIбукьуни ва дахъал цархIилтира. Нуша мурталра хIерли дирехIе гIергъиси газетала номер бакIайчи ва дигиличил бучули дирехIе. Челябкьлализирра газеталис дахъал сархибдешуни диубли дигулра, мурталра калаб хIушала газета, баркалла.

«Ас-салам» газетализи бахъал сагати хIянчизартира бакIиб.

Дахъал дусмазиб бузутани илдира устадешличи бурсибирули саби.

Илдазибад цацабехIтачил тянишдирурая.

Жамал ГIябдулкьадиров, Ахъушала районнизивси хIянчизар:

- Узес 2007 ибил дусличивад вехIихьили МяхIячкъала шагьарлизив узули калунра I0 дусцадхIи. Илис гIергъи Лавашала районнизиб дусцадхIи хIянчи барира. ГIур биалли Дагъиста дурарти регионтазив: Челябинсклизив, Санкт-Петербурглизив, Астраханнизив, Краснодарлизив газета тIинтIбирули узули калунра.

БусягIятла замана кIиибил дус Ахъушала районнизив узулира. Газетализибси хIянчили халаси опыт лугули саби адамтачилти бархбасуназиб. Иш дунъяличирти масъулти ирзухIели кункдеш алкIахъули саби ва къияндешуни чедуркъубхIели сабурличил вирахъес кумекбирули саби. БекIлибиубси биалли итил дунъяличиб Аллагьла разидеш сархниличи хьул саби.

ГIяхIмад Атциев, Хайдакьла районнизивси хIянчизар:

- 5 дус виублира «Ас-салам» газеталичибли гIяхIдеш ва исламличи жи тIинтIбирули. Нуни ил газета къулбасбарили кайсусира I997 ибил дусличибад. ИтхIели камтири исламличила дархьти баянти, ва ил нушала хъалибарглис гьава кьяйдали кабизур. БусягIят динна баянти чинарад дигара касес вирухIели, «Ас-саламли» сунела мягIничебдеш ва кьадри-кьимат детахъахъили ахIен. Илис сабаб саби редакцияли чебетаибдешличил дирхалачерти баянти гьаладирхьни. Газетала баракат ва пайдачебдеш дила хъулиб чебиулра: 5 дурхIялизибад 3 –ли Дагъиста исламла университет таманбариб ва цархIилтира багьудлумачи руркъули саби. Халал рурсили сунела муруйс кумекбирули сари, ил имам сай. ВиштIал урши муадзин сай, альхIямдулиЛлагь. Газета гьалабяхI башули дигулра, бучIантас сархибдешуни диаб багьудлуми кайснилизир ва кIелра дунъялизиб талихI баргаб.

Шамиль ГIялисултIанов, Избербаш. «Ас-салам» газетализив 6 дус узули сай:

- БегI гьалав илав узес вехIихьибсири имамли тиладибарибхIели. ГIур биалли илабти хIянчизарти дебали гIяхIбизу: илдала дунъяличи хlер, гIямрула бетуц, хIял-тIабигIят. Илав узули илдачи мешусили ветаэс кьасбарира. Газета бучIухIели наб ил дебали гIяхIбилзусири. Гьарил адам хIянчилизибад биркуси алапаличи хIерикIули вирар. Нура илкьяйдали вираси, амма наб Аллагьли ﷻ декIарбарибси ризкьи биули саби, альхIямдулиЛлагь. Школализив учIухIели нуни мерличибси газетализи макьалаби лукIули, гонорар кайсаси, журналистикала кружокличи вашусири. ХIянчилизиб наб ил багалабиуб. Илала гIергъи газеталичил бархбас агарсири. Гьанна газетализи чариубра. Наб дила хIянчи дебали гIяхIбилзули саби. ЧевяхIсини наб ил хIянчила мягIни гьаргбариб, дагьрилизи минабариб ил газета гIядатла хIебиъни ва илабси бузери баракатла биъни, ил багьандан илав калунра ва гьачамалра пашманхIейубра.

ГIябдулмалик МяхIяммадов, Къарабудагъкентла район:

- Газетализив 2015 ибил дусличивад узулра, шукру Аллагьлис. Ну дебали разилира ЧевяхIсини наб ахъри гибнилис ил шайчив узули адамтас пайдаласили виахъес. Гьалаб наб гьанра хIебиркусири илгъуна хIянчи бирес вирус или, ну илаб бузути узби чебиули, илдачи хIяйранирусири. БегIлара ил хIянчиличи гьуцIируси ва узес иштяхI алкIахъуси газета къулбасбирути адмтани кайсуси пайдали саби. Аллагьли ﷻ ахъри бараб гьатIира бахъал адамтази ил газета бучIахъес, нушаб хIянчизартас биалли – цIакь габ ил шайчир дузахъес! Амин.

Запир ГIялиев, Избербаш:

- Ну «Ас-салам» газетализив узули дус вирулра. Ил газеталичил барх нушани адамтала хъулрази гIяхIдеш, ванадеш, пайда ва баракат дихулра или гьанбиркули саби наб. ХIянчи гьамадси ахIен вегIла нафслис, мурталра гъазализив вирес, халаси сабур дакIубирес гIягIнибиркули саби. Газета шиннизив кайгIуси адам уцахъуси мявагъуна саби, адамтала кьисматуни гIяхIлашал дарсдируси. Лебтасалра гIяхIдеш ва Аллагьла разидеш дулгулра. Амин.

ХIябиб Махтуев, Дахадаевла районнизивси хIянчизар:

- Газетализив 3 дус узулира, ва гьар дусличил, гьар бархIиличил иргъулира ил хIянчила халаси кьадриличила, илала жамигIятлизиб тIалаббирнила даража. Ил хIянчиличил дархдсунти дахъал гIяхIдешунала дурабадра, адамтачил ихтилатикIес, илдала зугIлуми далес ва бархбас кабизахъес бетарули саби. ЦацахIели адамтала гIямрулизирти къияндешуназиб ва илдала челукьутазиб кумекбарес бетарули бирар ил пергер газета илдачи биахъухIели.

Дебали дигахъис ил газета бучIес, дунъякад гьатIира халаси баракат тIинтIбирули вашес ва адамтас пайда бихес. Лебтасалра даршудеш ва гIяхIдеш дулгулра…