Берхъаб баракат бихуси газета
Берхъаб баракат бихуси газета
Дубуртар Улкала лерилра миллатунала адамти динничи дебали чекабизурти саби ва чула мезаначил дурадулхъути жузи, журналти ва газетаби дучIесра дигахъу илдас. Даргала жимигIятлисра «Ас-салам» газета гьанна 25 дус пасихIси ихтилатчи ва умутчебси гьалмагъ бетаурли саби. Иличи сабурагарли хIерти даршани дубурланти сунела къугъати белкIаначил разибирахъули, ил газеталис бекIдеш дирули сари ХIямшимала шилизирадси пагьмучерси журналист ва гIибратчерси педагог Наида Гъуруевани.
Динна масъултазир ункъли рузес имканти лерси, адамтачи дигили рицIибси, ЧевяхIсини уркIила ва чарх-бекIла жагадешуни пешкешдарибси, мурхьси пагьмули дагьри варакьдарибси хIялалси дарган Наида Гъуруева илгъуна газетала редактор риъни даргантала игъбарлизи халбарес вирар. СенахIенну ил бархьдеш дигуси, дяхIлизи сунела пикри бурес гIела ритIхIейкIуси, гьарил адамличи умути хIяланачил гъамрируси ва бахъла хIурматличи лайикьрикибси дубурлан хьунул адам сари. Ил сунела санигIятличи къячбилкуси чинаб сегъуна балбуц дурабуркIули биалра, итмаданал илар рагьаррирар ва кагибси гъайличилра баркьудлумачилра ил гIеббурцу. Диннизиб гIибратли бетаурти даргантала баркь-бацличила, илдани дурадуркIути далдуцуначила ва гьарил бетуцличила чедетаибти макьалаби лукIа. ЦархIилти журналистуни, поэтуни ва культурала бетуцлизиб бузути адамтира ил баркьудилизир бутIакьяндеш дарахъес жибиру. Илкьяйдали Наида Гъуруевани бахъла иштяхIдухъеси ва белчIес гьамадси газета балкьарахъули сари.
«Ас-салам» някълизи касибсини ил ахирличи бикайчи хIебелчIи хIебалта. СенахIенну илала гьарил номерлизир дахъал багалати насихIятуни ва гIякьлуми дургу. Динна гьуникад умутличил башути адамтачила делкIунти макьалаби дирар илар. Илкьяйдали газета биштIа-халатас дигусили бетаахъес багьандан редактор, сунела лерилра багьудлумира цIакьанира харждирули, сабухъчерли рузули сари.
Ишди бурхIназиб газетала юбилей дурабуркIуси саби. Илгъуна мягIничебси анцIбукьличил бархбасахъи, республикала «Замана» газетала агьлули Наида Гъуруевас ва иличил барх бузутас арадешра гьарбизунира дулгули сари. Нушала газетализирра гIибратчерси хIянчизар сарливан, илини динна масъултас хасбарибси бяхI балкьарахъуси саби. Илкьяйдали «Замана» ва «Ас-салам» газетала умутчерси хъарихъ ва къакъбяхъли сарси Наида Гъуруевас гьаннала гIергъира бузерилизир гьарбизуни ва хъалибарглизиб талихI дулгехIе. Гьарил дарганна хъули дигути гIяхIливан дурхъаси «салам» лугули, илдази ункъли «замана» беркIахъес хасдарибти газетабазир гьаннала гIергъира сабухъчерли рузахъес хIед имканти каммадиаб, хIурматла Наида.
