БучIантала мубаракуни
Берхъаби хIу «Ас-салам»
ЦIедешла анхъ кьяйдали,
ДяргIиб шинна урунжван
Милиги ихъхIейхъули.
Дерхъабая хIушара
«Ас-саламла» вакилти,
ХIела багьа ахъбарес
Гъазализи берхурти.
ГIурра рикIулра берхъаб
«Ас-саламла» бучIанти
ХIечи дигай дихьили
ХIу агар хIебуанти.
Дулгулра хIед «Ас-салам»
ГIурра дахъ-дахъал дусми,
ЛукIули гIяхI макьалти
Бусурмайс багалати.
Зубалжат ГIямарова,
ХIинтIа
Салам хIедра, «Ас-салам»
Салам бикIар "Ас-салам"
Гьар бусурманна хъули,
Чараагар дарманван
Дурхъал дагьри дихули.
Челукьусилис жаваб
Баршилри гьар бяхIлизи,
Гьар тугълизир сихIру лер
АлтIули уркIурбази.
Хариси хабар бихид
Гьар инса кулпетлизи,
Тамашала гьав бихид
УчIанна михъирлизи.
ГIе, жагьлири "Ас-салам"
Дусмала тарихлизиб,
БикIар, баркалла гIялам
Мар-марли гьар гъайлизиб.
"Ас-салам" гъану шура
Гъабзачирван далгунси,
Мубарак хIед дилара
Дагьрилизиб акIубси.
Мисей ГIябдусаламова,
мугIяллим, МяхIячкъала
Ассаламу гIялайкум
«Ас-саламлис» рикIулра
«Ас-саламличил» набра
Тянишриэс дигулра.
«Ас-салам» хIед хашкелди
Дагъистан ахъбурцуси,
ГIяхIгъубзнала хабурти
БамсхIебамси лукIуси.
«Ас-салам» анхъван берхъаб
ЛукIутира бахъбааб
ХIячми мурхьли кадатаб
КIапIрира зумадикIаб.
«Ас-салам», саламра хlед
Дила мубаракра хlед
Гlурра дахъал дусми хlед,
Лукlантира бахъал хlед.
Дусмалира белсаби
Даршдусмазиб калаби,
Хабар гlяхlси бихули
Халкьра разибираби.
«Ас-салам» хlу багьурси
Хlечивад гlеламмайзаб,
Хlела лукIу-бучIути
Дуслис дус имцIабикlаб.
Раисат Амирова, МухIела ши
«Ас-саламла» бяхIлизиб
Бургид хIуни шаригIят,
ГIямулти гIяхIдареси
Буру хIези маслигIят.
«Ас-саламли» насихIят
ГIеббуру гьарил сягIят,
ГIердиахъу пикруми
Бархьси гьунчи ит сягIят.
ГIяхIти къилликъуначи
Жибиру жагьил-жугьул,
ХIурматличи лайкьбиру
Гьести гIямрула бегIти.
«Ас-салам» хIу берхъаби
Азирти даршдусмазиб,
Умули хIербиаби
Нушала тарихлизиб.
Гъану шура дуслизиб
Гъаза барири хIуни,
Чумра адамла уркIби
Умутладарри хIекьли.
НасихIят МяхIяммадханова, Убеки
«Ас-салам» газета саб
Адамтас багаласи,
Кьуръанна аятуни
Дархьли баяндируси.
Даргантала суалтас
Жавабти дедлугуси,
Динна шайчиб адамти
Бархьси гьунчи буршуси.
«Ас-салам» дурайанти
Дахъал хIянчи дирути,
Ил гIуррара ахъбуцес
Саби жигарлизибти.
АхъбикIаб кьимат хIела
Газета даргантала,
ИмцIабикIаб багьуди
Илизи лукIантала.
Зубалжат МяхIяммадова,
ГIяялахъяб
Дила дигул «Ас-салам»
Ваг!ялайкум х!ед салам,
Пасих! г!илму биц!ибси
Кьиблаличи мешуси.
Халати г!ялимтани
Г!якьлу х!ези лук!ути,
Дурхъати Кьуръа дугьби
Г!ибратлис кадирхьути.
Биадра камти дусми
Х!у г!яламли буч!ули,
Марти сар х!ела дугьби
Шантази иргъахъути.
Гьар бусурман адамла
Бааби х!у юртлизи,
Бархьси АЛЛАГЬла ﷻ гьуни
Гьарлис чебиахъули.
Х!ечи марти дигили
Бих!яби даршдусмазиб,
Алкун нурла чирагъли
Иш ц!ябси дуньяличиб.
