Гьуд Идбаг
Гьуд Идбагличила Кьуръайзиб верхIна гьанбушили саби. Илизиб Гьудличила ва илала халкьличил кадикибти анцIбукьуначила буриб.
Жявти замунтазиб Йеменна мякьларти ванзурбачиб ГIад бикIуси кьам хIербирусири. Илди бахъал лебтири, зурбати ва залумти кьаркьлумачилтири. Илди гъумла музурбани алавбуцибси барглизиб, ванаси урхьула мякьлаб хIербирутири. Иларти ванзурбира ЧевяхIсила уркIецIиличирли эркинтири ва дерхъибти сабухъуни дашутири. Ил мерличиб халкьли жагаси шагьар тIашбатур, дунъяличиб гIур сунечи мешуси агарси. Чучила даимти гьанбикуни калахъес багьандан, илдани чIумати тIулрачилти, дебали ахъти ва халати хъулри тIашдалтутири, амма саби чятиртазиб хIербирутири. ГIад кьамла адамти чули саби цIакьтази ва бячIес хIейрутази ГIадитIуни давлали ва чула чебяхIдешли уктембарибтири. Илди халкь къаркъубала къанчанас булгутири. ЧеббалкIнилизиб илди НухI Идбагла халкьличи мешубиркутири. Илдани гьункьяби ва вачрукьяби чеббалкIахъес гьундурачи къалпти лишанти кадалтутири ва гьункьябала мас кебасили кабуршутири. ЧевяхIси Аллагьли ﷻ илдачи Сунела Идбаг Гьуд вархьибсири, илди бархьси гьунчи кабизахъес багьандан. Гьуд илдазивад ца сайри, ва жиикIули хьалли, илди лехIхIейхъутири ва иличи гьимичебли бирутири. ГIадитIуначи дугьавилзули Гьудли бурусири, лерилра илдала давлуми, дерхъибти ванзурби, гIинзурби Аллагьли ﷻ дедибти диъни ва шукру бирес чебли биъни. Илдази адамтас вайдеш ва зулму хIебирахъес тиладиикIусири. Амма ЧевяхIсила сахаватдешличи хIерхIеили, Гьудла халкь Аллагьличи ﷻ хIебирхутири, къехIбадеш дузахъули ва пасадли гIямру дуркIутири.
Илди бикIутири:
- Ва Гьуд, хIу нушазивадси ахIенрив? Сен Аллагьли ﷻ хIу идбагли ва расулли декIарварибсири?
Амма Гьуд Идбаг сейкIули хьалли, сецад къайгъибирули хьалли илдала уркIби Аллагьличи ﷻ дирхули ахIенри. Гьуд илдани къумбарлизи ва абдаллизи халвирулри.
- ЦIакьти ва урехиагарти нушачи къаршили дуравхъес чи вируси?
Гьуд викIар:
- ХIуша акIахъубси ва гьар секIал хIушаб гибси Аллагь ﷻ сай. Илини саби хIушаб кьуват гибси ва кебасесра вируси, хIушаб бебкIа ва харабдеш дархьес вируси.
- Эгер хIу вархьли виадли, Аллагьла ﷻ жазаъ бакIаб нушачи. Укьен, Гьуд, укьен, нуша хIела цалра гъайличи дирхули ахIенра!
Гьудла уркIилис дебали декIлири илдигъунти дугьби дакьес, илдани саби Аллагьличибра ﷻ цIакьтази халбирулри. ИлхIели берцуди агарси Аллагьла ﷻ жазаъ кьадарбиуб. Эркинти ва баракатла ванзурби дегъдешли дуциб.
Гьуд гIуррара сунела халкьличи дугьаизур Аллагьлизи ﷻ чевверхни тиладибарахъес. Амма илди бирхули ахIенри, хIела Аллагьли ﷻ сунес дигуси бараб или гIясили гъайбикIулри.
ИлхIели заклизиб цIудара гъагул дакIубиуб. ГIадитIуни разибиуб, ил забла гъагул саби или гьанбикили, амма илини илди цIябдешлизи гIелабикахъиб. Итмадан цIакьси бурям бухъун, къаркъубачилси ва гъумличилси, сунела гьунчир гьар секIал гъятIиули. ХIебирхути, саби цIакьтази ва урехиагартази халбирути халкь къирбирулри. 7 дуги ва 8 бархIи калунси бурямли цалра агарли лебилра талапбариб ва гъумлира къаркъубанира кIапIбариб. Берциб чIянкIли Гьуд Идбаг ва иличи бирхути, камти адамти. Илкьяйдали илар калунти къаркъубала кIялгIнира бикьрумили детаур гIадитIуначи бакIибси кахси балагьла…
