Давуд Идбаг
Давуд Идбаг
Давуд Талут вебкIили гIергъи Израильла кIиибил пача сайри. ЧевяхIсини ил идбаг ва пача вариб. Ил 40 дус виубхIели Байт аль – Мукьаддаслизи вякьун. Давудла манзил Иордания, Шам, Палестина, Оман, Алеппо, Хамат мутIигIдарили, Аллагь ﷻ ца виъниличи кибтири. ЧевяхIсини Давудлис дунъя акIахъубла цархIилтас хIедедибти даражаби дедибтири. Иличи гIибран мезличил 150 сураличилси Забур бархьиб. Илини 70 жура-журала макьам далутири ва илдачил Забур бучIусири. ЗягIиптани илала тIамала аргъалри сагъбирутири, аргъайзибад бухъунти чебиргъутири, дягI ва шин тIашдилзутири.
Давудли Забур бучIухIели адамтицун ахIенну, арцанти, мицIираг, жиндрира дархли иличи лехIирхъутири. Лебил тIабигIятли ил тасбихIличил гIеввурцусири, ил багьандан илбис иличи кьясбирес бехIбихьиб ва адамти иличи лехIхIяхъахъес багьандан музыкала гIягIниахълуми пикридариб.
Давудли сай вагьхIегьесли сунечила адамтази хьарбиусири, нукьсандешуни агардарес багьандан. Гьачам илис адамла сипатличил ЖабрагIил малаик къаршиикиб. Илизи хьарбаибхIели ил викIар: «Эгер жамигIятла хазнализивад пайдалахIейкIалри, ит гIяхIси адам вири». Давудли ил аргъили, Аллагьлизи ﷻ тиладибариб сай сегъуна-биалра сунес яшавбареси санигIятличи бурсиварахъес. ЧевяхIсини илизи мегьла устала санигIят багьахъур ва мегь мутIигIбариб. Илини мегь бетIу кьяйдали някъбани кIантIибарили, кьякь, пушни, убза агарли мегьла ваяхI дирулри. Давудли халчукуни (кольчуга) дирулри ва илди дицили сунес яшавбирулри, сай бегIлара халаси цIакьла ва ахърила бегIти пачназивадли ца виалра.
Адамти-ургар жалти акIубхIели бархьдеш кабилзахъес багьандан илис мургьи рангли жагабарибси хIунтIена мяваначилси рахаж савгъатбарибсири. Иличи гъамиубли дин кьабулбарес вирусири, зягIипти сагъбирутири. Илини сунела зянкъла тIамаличибли зубрачиб бетаурсиличила балахъусири. Ил рахаж Давудла михIраблизи чебяхIкахъилри. Адамти-ургаб жал арзес багьандан, жалбухъунти ил рахажлизи къячбилкахъутири. ГIяйибкарла някъ иличи адхIебиусири, бархьдеш буран биалли иличи гьамадли къячикес вирусири. Ил хIясибли, Давуд Идбагли хIукму дурайсусири. Илкьяйдали илини ил рахаж пайдалабирусири адамтани гIямулти дарайчи. Иличила бурехIе.
Ца адамла дурхъаси къаркъа буили саби. Ил бихIяхъес багьандан илини цархIиллизи бедили уили сай. ГIяхIцад замана арбякьи гIергъи, илини сунела къаркъа тIалаббариб. Итилли биалли буриб сунени къаркъа чарбарниличила. Илдала жал бетаурли саби. Къаркъала вегIли тIалаббариб барх Давудличи букьяхъес. Къунбарли сай къаркъаличи адхIейъни балули, сунела гIяйсализиб тIяркьи барили ила къаркъа уббихьили сай. Рахажличи гъамбиубхIели, гIямалчини къаркъала вегIлизи сунела гIяйса буцахъес тиладибарили сай. Рахажличи някъ гьабурцули ил викIар: «Я Аллагь ﷻ, ХIуни балулри нуни ишис къаркъа чарбарни». Рахаж гIяшбиуб ва ил гьамадли къаркъаличи къячикиб, гIур илини сунела гIяйса сасиб. Итилли биалли хIергъиб сай сен-сен виргIявиргибал ва аъвяхъили дадкайзур.
Илала гIергъи Аллагьла ﷻ ахъриличибли рахаж зубрачи ахъбуциб. ГIямултар иличи къячики гIергъи гIур ил ванзаличи чархIебухъун.
ИлхIейчибад Давудли хIукмурти цархIил тяхIярли дурайсутири. Илини тIалаббариб адамтази хъя бирахъес ва бикьриби бикахъес.
Ишаб бурес чебиркур Давудла хатIаличила, хIятта идбагуни хатIабиркути ахIенну, ЧевяхIсини илдачил кадикибти анцIбукьуни нушагъунтас насихIятли диахъес чедиахъути сари. Гьачам Давудли ЧевяхIсилизи тиладибариб Ибрагьимла, Исхакьла, Якьубла кьяйда сунелара хIялумцIахъес, илдалагъуна даражаличи айкес багьандан. Аллагьли ﷻ илис бархIи кабизахъурли, хIядурвиахъес буриб.
Ил бархIи Давуд Идбаг сунела михIраблизив гIибадат бирули леври. ИлхIели улкьайлизибад жагаси арцан бакIиб. Илис гьанбикиб ил Алжайзибад бакIибси бургар или ва буцес вализур. Амма арцан бакIибси кьяйдали улкьайлизибад арбякьун ва галгала кьялиличи кабииб. Ил биалли арцан ахIенрину илбис сабри, ил виргIявиргес бакIибси. Илала жагадешли хIяйранварибси пачали гIелавад хIерикIухIели, шарала дубла кариибси жагаси хьунул адам чераиб. Давудли иличи дигай дихьиб ва иличила баянти касиб. Илини багьур илала мурул (цархIил пикри хIясибли гьалмагъ) Аврия гъазаватличив виъни. Ил дергълизив кавшибхIели, Давуд иличи хъайчикайиб. Илис гьалаб илала 99 хьунул лебтири. ЦархIил пикри хIясибли, ил хьунул адам, Сабиг, гIур Сулайманна неш ретаруси, Аврияла цIикури сарри. Давудли Авриязи тиладибариб ил сунес ратахъес. Аврияс ил барес къиянни хьалли, Давудла хIурмат багьандан кьабуликибсири.
Амма Давудли шаригIят хIебуи хьалли, ил цунни калунси Аврияла гIязабтас сабабли виуб. ГIядатла адамтани гIяхIтази халдирути баркьудлуми Аллагьличи ﷻ гъамбарибтала илдигъунтили хIедирар. Илгъуна хатIаличибли ЧевяхIсини илала даража ахъбарес багьандан, даим барибсиличи пашманиънила тавбаличи хъарикахъиб. Аллагьли ﷻ илизи пикри бяхIчиаахъес багьандан, адамтала сипатуначил кIел малаик бархьиб. МикагIил ва ЖабрагIил Давудличи михIраблизи абацIиб. Илдани чула жал арзахъес бакIниличила буриб. Ца викIар: «Иш дила динна узи сай. Илини дила лебси ца маза сунес тиладибирули сай. Илала биалли илди 99 лер. Арзагу нушала суал».
Давудли жаваб бедиб: «ХIела ца маза тиладибарес сунела леркъира – ил бархьси ахIен». Илди цаличи ца хIербизурли, дукарбяхIиб ва арбякьун. Давуд сайцун калунхIели, аргъиб сунени сунес хIукму дурасниличила. 40 бархIи ил вяхIудили кайкили висусири, илала нургъбани иркибси мерличир шиниша кьар дакIиб.
ЧевяхIсила гьалаб цIахбил-зули, ил даим тиладивикIусири: «УркIецIила ВегI, язихъизурли чевверхи!» ЧевяхIси Аллагьли ﷻ илала тавба кьабулбариб. Ил Авриячи вякьи илизибадра чевверхни тиладибариб. Давудли багьахъур Кьиямала бархIи Аллагьли ﷻ Аврия разивирниличила ва ил Давудличивад чеввурхниличила. Аллагь ﷻ иличивад чевверхурли хьалли, илини закличи хIулби ахъдуцес хIейуб. КьацI-шин илини висули ахIи, букуси ахIенри. Илини мухъила кьацIла чIумати кесекуни нургъбани иркили, дукутири, хатIавикибсила илгъуна саби хурег биэс гIягIниси викIули. Сунела хатIа хъумхIертес багьандан илини хъатличи белкIунсири ва гьар чебаибхIели висусири, илала нургъби дуги-хIери дуръути ахIенри.
Кьуръайзив Давуд чевяхIвариб ил анцIбукьлис гьалавра гIергъира, духуси адам ЧевяхIси Аллагьличил ﷻ кьабулиркур. Ил анцIбукьли духуси адамлис пасихIдеш имцIадиру. Аллагьлис ﷻ къуллукъбирухIели тавба хIедарни - баци, хIебегIунси ванзаличи мешуси саби.
ХIушара тавба кьабулбарибтазирадли диаба. Амин!
