ДР-ла муфтий шайх ГIяхIмад-апандила Кьурбан-Байрамличил мубарак
ДР-ла муфтий шайх ГIяхIмад-апандила Кьурбан-Байрамличил мубарак
"Ассаламу гIялайкум ва ряхIматуллагьи ва баракатугьу, даршудеш ва ЧевяхIсила уркIецIи биаб хIушаб, ахIерти узби ва рузби!
УркIи-уркIиларад мубаракдарес дигулра бекIлибиубси бусурмантала байрам - ГIидуль АдхIа - Кьурбан-Байрамличил!
Кьурбан-Байрамли балахъули саби дурхъати мераначи дурабуркIуси зиярат - халаси хIяж таманбиъниличила. Ил байрамли нушаб имкан лугули саби ЧевяхIсилис гIибадатлизиб халаси къайгъи дакIубарахъес, нуша даим баркалла дикIахъес нушаб пешкешдарибти ахирагарти нигIматунас. Нушаб лебтасалра дебали мягIничебси саби ишди байрамла бурхIназиб къайгъибарес мискин-пякьирти ва къарцинти гIеббуцес, илдала уркIбази разидеш хьурабарес, кьурбайс белгьунси масла диъ илдас бедили кумекбарес.
ЧевяхIси Аллагь ﷻ Кьуръайзив нушачи дугьаилзули сай (мягIна): "ХIушани сеналра ЧевяхIсила разидеш сархес хIедирутира, хIушаб дигуси лебдешлизибад Илала гьунчиб харжбарайчи. ХIушани сецад харжбарадра Аллагьли ﷻ балуси саби, ва хIушаб чебирцIахъуси саби" (сура "ГIяли Имран" аят 92). Ил багьандан илцадра мягIничебси саби нушани нушала мякьлабтачила къайгъи ва хIеруди дакIубарни.
Лебил нушала улкализибад азиртадли нушала узби ва рузби Маккала ва Мадинала дурхъати мераначи баиб, мягIничебси исламла рукну - хIяж дураберкIес багьандан. ЧевяхIси Кьудратла ВегIлис халаси шукру бирулра ил гIяхIдешлис, дурхъати мераначи даахъес, динна рукну - зиярат (хIяж ва гIумра) таманбарес имкан гибнилис.
ЧевяхIси Аллагьли ﷻ нушала кьурбунти, хIяжликьянабани дарибти рукнуби, дехIибала ва балга-дугIя кьабулдараб! Амин.
Бусурмантала бекIлибиубси байрамла бурхIназир лебил дунъяличир яшавла шуртIри къиянтас, ятимтас, гамъабас кумеклис далдуцуни детурхули сари. УркIецIила ВегI Аллагьли ﷻ гьарил гIяхIдешлис, садакьалис, гIяхIти дугьбас кири баахъаб, ва алавтас гьатIира пайдачебтили биахъес, динна ва миллатла декIардешличи хIерхIеили лебтачилра уркIи изутили биахъес гьуцIбараб.
Ну ЧевяхIсиличи дугьаилзулра ванзаличиб даршудеш кабизахъес гIяхIдеш, баракат диахъес тиладиличил, нуша фитнабазирад ва балагьуназирад мяхIкамдарахъес балга-дугIяличил. ЧевяхIсилизи тиладибирулра нушала лерилра балгни, кьурбунти ва садакьа кьабулдарахъес, бунагьуначивад чевверхахъес, сахаватдешличил лебилра талихIчеббарахъес, гIяхIдеш, баракат, бекIла чедиб даршуси зак кьадарбиахъес!
Мубаракдирулрая шаласи Кьурбан-Байрамличил!"
