Кьасбаралли – гьар секIал детарар…
Нуша гьар бархIила гIямрулизир бахъал декIар-декIарти адамтачил къаршидиркули дирехIе. Илдала гIяхIти баркьудлумани нуша цацахIели дебали тамашадирахъура.
Нуни ишав гьанушес дигуси гьести гIямрула мурул адам чис–дигара гIибратли виэси сай. МяхIяммад акIубси сай Дахадаевла районна Меусишала шилизив, 1935 ибил дуслизив. 1980-ибти дусмазив ил Шамхаллизи гечиубсири. Шамхал поселоклизи гечиайчи ил ислам динничивад гьарахълири, ва ил шайчир сегъунтилра багьудлуми агарли урдухъун. Поселоклизиб илини мижитлизи башути унруби чебаили, илдази хьархъардаиб. Илизи динничила бурибхIели, сунесра ила вашес дигиаур. Илини камси манзилла бухIнаб дехIиба азкарти дагьурли, дин руркъес вехIихьиб. Гьар манзил мижитлизи вашес вехIихьиб ва дехIибала чедетаахъили дяркъур.
Амма кьасчевси МяхIяммад иличив тIашхIейзурну, илини Дурхъаси Кьуръан бучIес вехIихьиб. Ил баркьудилизиб илис халаси кумек бариб итхIелла поселокла мижитла имам ИбрагьимхIяжини.
Кьуръан бучIес вехIихьибхIели, МяхIяммад 70 дус виублири. 2007 – ибил дусличивад вехIихьили, илини 55 дусла духIнар уркалунти сунела 11 дусла фарзла дехIибала черахъиб. Гьарил фарзла дехIибала дарили гIергъи 5 – дехI чеблала черихъули. Илкьяйдали илини 14 дус виубхIейчирад сунела гIямрулизир уркалунти дехIибала черахъили сай. Тяп ил тяхIярли илини сунела Рабазан базла фарзла дуббуцартира черахъили сай. Гьайгьайрагу, илгъуна баркьуди нуни дила пикрила дураб батес хIейубра ва хIушазира бурулра.
ИшбархIира МяхIяммад поселокла жамигIятла гIямрулизив жигарла бутIакьянчи ва хIяракатчи сай. Мижитлизивра мурталра жамигIятла дехIибайчив гьаларти къяяназив вирар. МяхIяммадла устаз-насихIятчи СягIид – апанди вирусири, гьанна ГIяхIмад – апанди сай.
МяхIяммадгъунти адамти бахъбикIаб нуша-ургаб. Илди гIяхIти баркьудлумала ва хасиятунала гIибратли бурес вирар адамтасра чеабиуси наслулисра бархли. МяхIяммадличи ва цархIилти бусурмантачи ЧевяхIси Аллагь ﷻ разили калаб. Амин. Сунес арадеш, баракат, талихI дулгулра.
