Давла бурчан
Дубурла гьарахъси шилизи башуси дахъал кьячIикIуначилси гьунчиб дугила кьанси замана машина бикуси Мухтар ускаири, ва сунела бархкьябачил бехIемцIлизи викилри. Кункси машиналичибти шел адамлизибадли хIябал алхири, кIел декIли дяхъурбази бикили, аргъала деткахъилри.
ШаладиркухIели вачарличи или шимази вашуси СалихIли гьунила удибси шайчиб хIилизи гIелабикибти илди чебаиб. Илдачи гъамиубли, гьала-гьала бебкIилил, ахIенал лебилра ахтардибариб. ГIур алавчарли хIеризур ва илдала кисмира хIясибдариб. Илар даргибтира сунела кисализир дагьардиахъуб. Илабадли гIяхIцад гьуни ахъили гIергъи полицияла хIянчизартачи зянкъдяхъиб.
- Гьунила дублаб бехIемцIлизи бикили, алхунти адамти хеб. Кумекбарес или илдачи музаухъунрагу, цалра мицIирси аги илди-ургав. Гьалакдиирая ил балагь бакIибси мерличи, - викIулри ил, сунела кисмазирти давлумира дигIяндирули.
Базарличиб илала масани асес или адамти музабулхъулри ва вачрукьяла лугIянти гъайли багьа бакIахъибти секIал хIесили, рахлира арвашуси аги. Илкьяйдали гIяхIси вачарра барили, ил разили хъули чарухъун.
- СалихI, хIела бахъал балути леб, - зянкърикIулри иличи унра СайхIят, - набчиб гIяйиб лебли хIебиалра ну гIяйиблизи руцилра. Суданачи рашули рамсурлира. Кумекбарагу, тилади сабину.
- Яхши, яхши, хIела мурад бирис, кьакьамарикIуд, - итмаданал жаваб бедиб СалихIли.
Чумал бархIи дикили гIергъи, СалихIли СайхIятличи зянкъдяхъиб:
- Нуни гьарил секIал бекIдарилрану миллион хIябдарш къурушра хили бархIехъ набчи ракIи. Илди арц тIалабдариб дила гъамси юлдаш судьяни.
- Ва, дила унра, илдицад арц чинар дирути дила, дудеш агарти хIябал ятим абилкьули чериулрагу хIуни? – СайхIят кьакьаракIили риъни багьеслири.
- ХIела хъарбаркь нуни таманбарилра, гIелар калунти далилти бекIдарни хIела къуллукъ саби, - викIар СалихI паргъатли.
- ХIеррилзас се-биалра барес… Чизирадли сасиша гьатIи, илдицад арц? Илди чардаресра ахърихIебикIургу дила…
БазцадхIи итичира ишичира тиладиличил рашули, сеннира СайхIятли илди арц дучиб ва СалихIличи духиб. СалихIли 500 азир къуруш сунела кьанилизи дигIяндариб ва 800 азир къурушличил судьячи гьалакиуб…
- ХIу бахъла юлдаш сайри, хIуни гьариллис кумекбирулри, - викIар СалихIла узикьар Мурад, - юрт тIашбатес багьандан наб силикатла къаркъа хIяжатли сари. Илди тIалабдарес кумекбарагу, хIурматла узикьар.
- ГIяжаибли бариша, - викIар вачрукья, бусягIят ил масъала ирзис.
БархIехъла замана илини Мурадличи зянкъдяхъиб набчи гьаввакIи, хIела хъарбаркь таманбарилрану или. Разивиубси Мурад итмаданал иличи вакIиб.
- Ну вягIдалавиубра къаркъа асес. Дила тянишли дургIели лерху, илди хIед сецад хIяжатлил бурадли, чумал бархIила духIнар илди хIуни юрт тIашбатес пикрибарибси мерличир дирахъис.
- Баркалла, баркалла, дила узикьар, хIуни барибси нуни сеннира хъумхIертис. Ставропольлизивадли чарухъи чумал баз дикили диалра, нуни Дагъистайзир чинар се лерал балули ахIенра, ва се бирусилра балуси агара. Мазала дурзамти гIяйдикIахъес ахIи, хIуни селра хIебалад или хьунулра зигаррикIули рирар.
Узикьарли гибти арцлизирадли сунесра 100 азир къуруш дикахъили, СалихIли илис къаркъа хиб.
- Юрт тIашбатес багьандан хIябилра дахъал цархIилти секIал хIяжатдиркути сари. Илдира дигухIели, тIалабдирис дила узикьар, - викIулри СалихI.
БиштIаси шилизиб хIербируси хъалибарглис халаси-декIар пайда аги илизибадли. «Дила машина бячи, илис арц харждарира. Юлдашуни къаршибикили, ламусбарес чебуркъуб,…», - или, илини 6 рурсилисра 1 уршилисра лергIер хIяжатдикибхIелицунри арц дедлугути. ХIушара дузеная викIулри ил, нура дуги-хIери хIеили гьундурачиврану. Ил мурт-дигара цархIилтачи ваши, амма сунени чизилра хъули ваши эс вирули ахIенри. Илцадра кьиркьирси илизибадли арц бикахъес гьарилли-декIар хIейри. Хъалибарглизибадли дигIяй гIямултачил ва «някъ бясяхъи» дучибти арцли бицIахъес дигулри СалихIлис сунела машинала гаражлизиб дигIянбарибси мегьла кьани. «Иларти арц циила гьатIи имцIадиалли, МяхIячкъалализиб кватирара исис, илар наб ца исбагьира рагьаррирахъис…», - хIулкIули кьани хIяршбирулри СалихIли.
