МяхIяммад СалахI – машгьурси футболист
Египетлизивадси футболист, цахIнабси командала капитан МяхIяммад СалахI – дунъяличив бегIлара гIяхIти футболистуназивадли ца сай.
2012 ибил дусла Олимпиадала хIязаназир бутIакьяндеш дарили гIергъи, дебали пагьмучевси ва халаси челябкьлаличилси футболист сайлин машгьуриубсири. ПФА-ли, КАФ-ли, Би-би-си-ли 2014 ибил дусличивад 2018 ибил дусличи бикайчи дусла бегIлара гIяхIси футболистлизи халвариб. ХIера, гьаннара Mirror Fans – ла баянти хIясибли, 2020 — ибил дусла бегIлара гIяхIси футболист сайлин декIарвариб.
Премьер-лигала машгьурти урегал футболист гIелаб батурли, илини «Ливерпульла» бегIлара гIяхIси ибси у сархибсири (19 гол ва 10 передача дурадеркIили гIергъи). СалахIли сагаси футболла сезоннизир чедибси дивизионна 13 хIязлизир илдицад голани дурадеркIили сай, илдачил дарх «Кристалл Пэлас» – ла къапулизи кIел пергер голра детяхъибсири. Илини гьар бетурхуси хIязлизир бегIлара дахъал голани детирхъули декIарулхъуси сай.
Спортла сархибдешунала дурарад МяхIяммад СалахIли дурадуркIути гIяхIбаркьла далдуцунира дахъал сари. Сунела гъамти лебси Нагриг шилизиб биаб, лебил дунъяличиб биаб илини мискинтас халаси кумек гIеббиахъуси сай. Илала у бихуси гIяхIбаркьла организацияра леб, суненира мискинти хъалибаргунас, гамъабас, муруйзибад декIарбикибти биштIатала бегIти хьунул адамтас ва къиянти гIямрула шуртIразиб хIербирутас кумекбируси.
Илала дурабад сунела цаванзалантас илини мурталра арц декIардирути сари хъалибаргуни алкIахъухIели мукъри дарахъес. Сунела ВатIайзиб акIахъубси футбольный клубра илини арцличил гIеббурцу, спортла шайчиб гьалабяхI башахъес багьандан жагьилтас центрра тIашбатур. Илкьяйдали школа ва больница лерилра гIягIнити ваяхIличил ва техникаличил гIердуциб. Бусурман сайлин илини дахъал арц харждируси сай адамтала гIямру гIяхIла шайчи дарсдарес багьандан.
Футболличи МяхIяммадла диги адикьуртири дудешли ва адавзини, илди 80-90-ибти дусмазиб иштяхIличил ил хIязли биркьутири. ГIулухъали вирухIелил уршили сунела гIямру футболличил дархдяхъес пикрибарибсири. Дудешли уршила пагьму чебаиб ва «Иттихад Басьюн» клублизи ведиб. Илкьяйдали бурсивиайчи илини чумал клуб дарсдарибтири.
2012 ибил дуслизиб илала хIяз гIяхIбизурсири ва Швейцарияла «Базель» клубли иличил 4 дусла вягIда бигьунсири. Илав ил сархибдешуначил декIарухъун. КIел дус дикили гIергъи, 2014 ибил дуслизиб Англияла «Челси» клуб «Базельличил» вягIдалабиубли сунела клублизи арукиб. Илкьяйдали СалахIли чумал клуб дарсдариб: Италияла «Фиорентино», Римла «Рома», Англияла «Ливерпуль», илизив сай гьанна ил футболли виркьуси.
Египет 1990 ибти дусмачибад бехIбихьили бегI гьалаб илала кумекличил абзанала финаллизи дурабухъунсири.
МяхIяммад СалахIла хьунул ва кIел дурхIя леб. Сай акIубси шагьар Басьюннизибси муниципалитетлис гьаман кумекбирули вирар. Ил шагьарла 450 хъалибарглисра кумекбариб, сунела гIяхIбаркьла фондлизирад гьар баз арц декIардирули. Илкьяйдали Египетла пачалихълис 300 азир доллар декIардариб, улка къиянси агилизибси манзил. Гьачам Египетлизиб хIяз дурабуркIухIели, илала хъали бигIун. Итмадан хъулки варгили полициялизи кибсири. Дудешли иличи къаршили гIярза белкIес вализурхIели, МяхIяммадли ил ваткаахъиб, арц дедиб ва хIянчи баргахъес кумекбариб. Нушала дурхъаси МяхIяммад Идбагли (с.гI.в.) чебаахъили кьяйда, гьарли-марси бусурман сайлин, илинира сунес вайдеш барибси адамлис гIяхIдеш бариб.
Илини гьарил бируси-балтуси чебиули, гIямрула гьуни къелгIеббикутани, илала адамдешла къиликъунас ахъси кьимат кабалтули саби. Ил багьанданра дунъяличив ил бегIлара машгьурти бусурмантазивад цализи халвируси сай. 2019 ибил дуслизиб биалли, «Тайм» журналли дунъяла бегIлара машгьурти 100 адамла сияхIлизи илала у каберхахъурсири.
