Сен висивиибсири Идбаг ﷺ?
МухIяммад Идбагла ﷺ урши Ибрагьим 16 баз виублири. Ил дебали дигеси, разиси урши сайри. Дудешлис ил дебали дигахъи ва иличил хIязтали виркьули, халаси замана буркIи.
Цагьачам Ибрагьимла дудешличи вайси хабар бакIиб. Урши дебали зягIиплири… Аллагьла Расул ﷺ децIлизи викиб. Пашмандешлизив ил сунела неш Марьямличил Ибрагьим хIервируси хъули вакIиб…
Мурталра разиси, дудешличил вичIирикIуси Ибрагьим, хIялагарвиубли, цIубдиубти дяхIличил, бурушла кайхьири. Нушала Идбагли ﷺ ил някъбази касиб…
Уршила хIулби даимлис кьяпIдиуб. ДецIлизивси дудешли урши дигиличил михъирличи гъяжвариб. ДурхIяла мицIирдешла сегъунтилра лишанти аги. Илала жан агарти хIулбачи хIерикIули, ЧевяхIсила кьадарличи баришли, ва Иличицун хъаряхъили, дудеш викIар:
— ЧевяхIсила кьадарличи къаршили кайзес вирусирив гьатIи хIу, Ибрагьим?
Ибрагьим лехIкахъилри, сунела дигуси дудешла суайс илала жаваб аги. Кьадарличи мутIигIли, Ибрагьим итил дунъяличи арякьун…
Нушала Идбагла ﷺ хIулбазирад децIла нургъби дашулри. Илини сунела уршила биргIуси жаназа кIапIбуцили, михъирличи гъяжбирухIели, хIулби гIурра шинкIадирулри.
Идбагла ﷺ юлдаш иличи тамашавиубли хIерикIулри, сунела пикрумазив илини хьарбиулри: «Идбаг ﷺ висес вирусив гьатIи?»
— Ва Аллагьла Расул ﷺ! ХIура висулрив? ХIуни ахIенрив адамтази бисахъес къадагъабируси? – хьарбаиб илизи ГIябдурряхIман ибну ГIавфли.
— Юх, Ибну ГIавф! Нуни хIушаб кIел секIал къадагъадарира, бунагьлис ва абдалдешлис бикьрили дирути: баракат бакIибхIели, чебаълис дирути вяв-чIяръала ва хапли балагь бакIибхIели, гъезра дяхI-някъра гъярдирули, ахъли вявбикIули дирути бисара.
Дила биса биалли, децIличила, уркIецIиличила, язихъдешличила ва пашмандешличила сари. УркIецIи хIебирутачи, уркIецIидулхъути ахIен. ХIулбани нургъби кертIу. УркIилис гIядабли бирар.
Ил нушала Идбагла ﷺ вебкIибси 6-ибил виштIаси сайри. Илала агрили нушала Идбаг ﷺ дебали пашманвиахъуб. Ил викIар: «Аллагьличил ﷻ хъя бирулра, Ибрагьим! Нуша дебали пашмандарира хIечил декIардикнили».
Ибрагьим дебали виштIали левалли арякьун иш дунъяличивад. Нушала Идбаглис ﷺ биштIати дебали дигахъутири. Ил Ибрагьимла бебкIала децIли ва пашмандешли дицIибти дугьбачил дубураличи хIерикIули викIар: — Агь дубура! ХIезиб набзибсигъуна децI ва пашмандеш диалри, ташмишдеш агарли хIу гъятIбиръади. Нушала Идбагли ﷺ жан агарси дубура булан тIутIукабирниличила бурули, децIлизивси манзил Аллагьлис ﷻ сай мутIигIли калниличилара гьанбуршусири:
- Аллагьли ﷻ хъарбарни хIясибли, нуша дикIутира: «Инна ли-лагьи ва Инна илайгьи раджи гIун» (нуша Иличирад дакIибтира ва Иличи сарра чардулхъутира).
Идбагли ﷺ Алжанализирти Ибрагьимла гIямруличила ишкьяйда бурусири: - Ибрагьим – дила виштIаси урши, михъирличивад чевасес левалли вебкIибси. Ил халаваайчи, Алжанализиб илис кIел ниъли валхути хьунул адам декIарбарибтири.
