Тавбадарни

Ца ГIяхIмад бикIуси уршилис дебали дурлама асес дигулри, алавчарти жагадешуначи хIерикIес багьандан. Гьачам ил школализивад чарухъи гIергъи, тукейзи вякьи дурламала багьа багьур, амма илала арц диули ахIенри илди асес. Илини кьасбариб илала хIекьлизиб дудешличил ихтилатбарес. Уршили дудешлизи бурибхIели, дудеш кьабуликиб ва викIар: «Гьайгьайрагу, ГIяхIмад, нуни хIед дурлама исис! Амма хIезибадра нуни ца секIал тиладибирис. ХIела гьанна байхъудусла имтихIянти садиули сари. Илдала гIяхIти кьиматуни касадли хIед нуни дурлама исис».

ГIяхIмад дурсрачи итира гIяхIил хIядурикIусири, гьанна биалли имтихIянти дедесра чекайзурли къайгъибирес вехIихьиб. Илини лерилра предметунала темаби тикрардариб. Илала калунси математикацун сабри. Илис ил гьамадли иргъули ахIенри, сенкIун камси замана харжбирулри.

Гьачам школализиб математикала дарсла гIергъи мугIяллимли ил живарили буриб: «ГIяхIмад, ишди белкIани мугIяллимтала кабинетлизи духа, ну директорличи живарилрану».

ГIяхIмадли мугIяллимла столличи гъамиубли илди белкIани кайсухIели илала хIер тIашбизур математикала белкIаначиб Илала пикруми чIянкIли дурламачила сарри. Илини алавчарли хIеръиб, ил чилилра чейули ахIенри. ГIяхIмадли иларти суалти чедаили, сунела тетрадьлизи делкIун.

Чумал бархIила гIергъи имтихIянти детерхур. ГIяхIмадли жавабти далулри ва класслизир бегIлара ахъти кьиматуни сархес пикриикIулри. Ахирра-ахир илала хьулани детерхур, ва класслизир илини лерилра гьаларти мерани сархиб. Илала бегIти дебали разилири ва тамашабиублири, мугIяллимтира бархли. Илала лерилра кьиматуни ахъси даражала сарри математикала ахIенти, илис илини 98 балл сархиб.

Амма ГIяхIмад талихIчевли ахIенри. Ил сунела пикрумазив сайри ва нешлизи цалра гъай хIеиб. Дудешра тамашавиублири илини дурлама тиладихIебарниличи. Гьачам, жумягIла дехIибайс гIергъи вакIили викIар: «Наб ГIяхIмадлис дурлама асес дигулра». Неш разили ГIяхIмадлизи бурес или илала хъули рякьунхIели, ил висули варгиб.

«Се биубли, дила ахIерси?!» - уркIрухъун неш.

«Неш, неш!» - висулри урши.

«Бура набзи, се бетаурлил, дила гIязиз?!».

«Неш! Нуни биргIябиргира», - ва нешлизи гьар секIал дуриб.

Неш рикIар: «ХIуни барибси, гьайгьай бархьси ахIен, амма хIуни бархьдеш бурни ва пашманвиъни гIяхIси саби. Математикала мугIяллимлизи биалли нуни тиладибирис хIед хIергъути секIал баяндарахъеес чеимцIали дурсри дурадуркIахъес. Укьен дудешличи, ил хIечи хIерли сай дурлама асес».

«Неш, хIейги, дурлама сабаблиригу ил анцIбукь бетаурси...»

«БегIлара мягIничебси хIела хатIа хIуни аргъни саби ва илгъуна гIур тикрархIебарни. ХIу пашманвиубли, тавбадарадли ЧевяхIси Аллагь ﷻ чевурхуси сай», - или нешли урши кIапIуциб.