Урги-дергализивад иртан
Умурия гIяскуртани алавбуцибхIели, душмантала ургъан лацла хъарличи ацIили Аллагьал Расулла ﷺ шайчи децIагести гъайли угьули, вявкайкIулри. Иличиб децIагеси се лебси бусурмантас? Гьарил бусурман ургъаннис дигулри кавшес илгъуна увяхIси адам. Амма ил кавшес къияннири, сенкIун ил ахъси ва гьамадли чехIейэси мерличив уввихьири.
Якьуб ибн Жафар бусурмантала гIяскарла бегIлара гIяхIси урги-дергализивад иртан сайри. Ил сабурличил хIерлири душман уввихьунси мерличивад баралра гьаввакIахъес. Дергъ даимбирулри, душмантала ургъан биалли вявикIули тIашилзули ахIенри. Якьуб бин Жафарли иличи лишанасили, урги батаиб ва ил бегIлара уркIилизи агили ургъан кайкиб.
Бусурманти разибиубли, «Такбир!» или вявъиб. Бусурмантала бекI Мутасимли Якьуб живарили илис арцла шабагъат гьалабихьиб урги игьнила кири (савб) сунес бедесли.
Якьубли буриб ил бирцуси ахIен или.
- ХIед нуни 100 азар мургьиличил лугас.
Якьуб кьабулхIейкиб.
- ГIяхIси, 500 азир мургьиличил.
Якьуб викIар: - ХIуни лебил дунъя гадлира, нуни ил хIебирцис, амма нуни хIед савгъатбирис наб гибси шабагъаатла байхъала.
Мутасим разивиуб, илини хьарбаиб: - Урги-дергализивад иртес хIу чинав бурсивиубсири?
- Хъулив, Басрализив.
- ХIебиалли бица наб ил хIу бурсивиубси мер.
- Нуни ил мер хIебирцисну, Аллагьла разидеш багьандан бедес дигулра, муджагьидуни ила урги-дергализибад иртес бурсибиахъес багьандан.
Мутасим дебали разивиуб ил бакьибхIели ва илис 100 азир мургьила гIяббаси савгъатдариб.
Ил анцIбукьлизибад багьес чебиркур, цалра бусурман адамли Аллагьла Расулличи ﷺ вайти гъай дурахъули балтес асухIебирар. Нушани дурхъаси Идбагличи ﷺ диги дакIудирес чебси саби, ва иличи вайти дугьби дурес чизибалра ихтияр агара.
