Рурсила кьисмат
Нушала Идбагли ﷺ Маккализи хIяж дураберкIили, сунела асхIябтачил Мадинализи чарулхъулри. Ил манзил, «Адавзи, адавзи!» или илдачи рурси гъамриуб. ГIялини (р.гI.) ил ХIямзала (р.гI.) рурси кIапIруцили ФатIимази редили иб: «Ма, иш адавзила рурси руца». Ил рурсила кьисмат арзес гIягIнилири. Мадинализи бухIнабухъунхIели, илди-ургар жалти акIуб, ил рурси чичил кавлусил баянбирули. ГIялис, ЖягIпарлис ва Зайдлис чучир ратес дигулри.
Илдазивад гьарил вархьлира сайри. ГIяли викIулри: «Ил дила адавзила рурси сари». ЖягIпар викIулри: «Ил дила адавзила рурси сари, дила хьунул биалли илала нешла рузи сари». Зайд викIулри: «Аллагьла Расулли ﷺ нура илала дудешра узби детаахъурра».
Ахирра-ахир Идбагли ﷺ пикрибариб ил чичил рарх ралтусил. Сунес дигути асхIябти уркIиагархIебарес багьандан, ил ГIялизи викIар: «ХIу набчил ва ну хIечил узидешла дигили дархдасунтира». Зайдлис пишвяхъили, ил чула узи ва юлдаш сайниличила буриб. ЖягIпарлизи буриб, илала сунелагъунти дяхI-сипатра, хIял-тIабигIятра диъниличи. ХIябличилра хIерикIули ил викIар: «Нешла рузира нешлизи халрарес вирар. ГIяхIил бирар рурси иличир калалли».
ЖягIпар ил секIайс дебали разивиубли тIяхIвикIес виибсири.
Нушала Идбаг ﷺ бегI гьалав рурсиличила сайри пикриикIуси, илис чидилличил гIяхIил бирарал. Илини тухумличилси мер декIарбариб.
