Нушала бучIантала назмурти
Нушала бучIантала назмурти
ЖумягIла балга
ЖумягI бархIи ахIерти,
УркIиларти гьардизаб.
Разибарес нешани,
Демжур дявра тIашбизаб.
Аллагьла ﷻ дурхъал бархIи,
Балгара кьабулбараб.
ПяхIли дуахъи дявти,
Бургъантира чарбараб.
Мурт бируси уркIецIи
Дунъяла нешаначи?
Хъумартурли дукелцIи
Гьар бархIи бисутачи.
Жагати хIевни чегьес,
БархIи хIебакIиб рузбас.
ГIямрула тIягIям касес,
Имкан хIегиб пякьиртас.
ТIашхIедилзули дявти,
ЦIализиб саби жагьти.
Янсав агар хIярхIуба
Бирхъули саб хъулибти.
Сегъуна балгаличил,
Улгуси хIези Аллагь ﷻ?
Чебарбукес жагьтачиб,
Гьанагар цIудар балагь.
СягIидулла ГIябдуллабеков
Рирхулра
ЛукIулира иш кагъар
Рирхули бучIниличи,
Рирхулра гIяхIла хабар
Набчира лябкьниличи.
Кагъарлизир дурхьулра
Дай уркIила кьакьадеш,
КIапIилизи лукIулра
Дила умутла цIакьдеш.
Суждаличир тIашлира
Гьар сягIят балгаличил,
Даим дугьарилзулра
ЧевяхIси Аллагьличи ﷻ.
ВатIанна дазуличи
Къалаван кадизурти,
Дубурлан ламусличи
Нушаб къарауйчирти.
Неш ванзала дяхI гьанни
Михъири гьабуцибти,
Нешани рузби гьанни
Гьунартачи хIядурти.
Пахру саби дилара
ХIушачил левниличи,
Рирхулра гьеч цайналра
ГIела хиххIейрниличи.
ХIушазир ВатIайс марти
ХIира дуцIдикIниличи,
Чардухъена, ахIерти,
ХIерлирану хIушачи!
Мисей ГIябдусаламова
Неш сари малаик
Гьарил инсайс Аллагьли ﷻ
Рархьили сай малаик,
МалхIямдеш-уркIецIила
Саригу ил цалабик.
Жагадеш, жагьдеш, диги
Хъяшнас ахIерхIедиру.
Рахли гIягIнибикалли,
ГIямрура кьурбандиру.
Дунъяла лигIматуни
Дирули дурхIнас пешкеш,
ДегI къиянти шуртIразир
Ахъли кавлулигу Неш!
Неш сари савлила гьигь
Арцанти дучIахъуси,
Неш сари шаласи бац
ЦIябдеш кIунбицIахъуси.
Неш сари урхьула рамч
УркIби паргъатбируси,
Ил сари ванзала цIа
БуцIар децIли руцIуси.
Неш сари гIела хъали
ДурхIнас даим бицIибси,
Неш сари даимси ганз
Гьар уршили кацIибси.
Гьар абулхъул бархIили
Дунъялис бихул барсдеш,
Гьар инсаннис Аллагьли ﷻ
Рархьибси малаик Неш!
ПатIимат ГIяхIмадова
Даршудеш биаб
Лебилра дунъяличиб
Даршудеш биаб или,
Улгулра Аллагьлизи ﷻ
Някъби гьалакавцили.
Бати паргъатси гьанкIли
Бусахъес нешанира,
Ара-сагъли, хIулкIули
Чарбухъахъен уршбира.
Дати даргхIевдахъули
Дару, дунъя дулъути,
Дати дявти ва жалти
ХьанцIа зак бумкьахъути.
Вирхулра, дунъяличиб
Даршудеш уржниличи,
ГIяламла балга-дугIя
Чевсини иргъниличи.
