Жанбулат МяхIяммадов акIубхIейчирад – 75 дус

ХIЕРАНИ ДАРХЬДИЗУРЛИ

ХIябилра гIеркъасили

Убухъун хIечи гьуни,

ХIуруцIли ва сукъурли

ХъускайкIира хIу гьанни.

Гьарахъ ва гъамрикIули,

Паркьриради зубарван,

ХIулби гьаргдарибхIели,

Беткайхъуси муэрван.

ХIебалас, хIу набчила

ПикририкIадил севан,

Кьакьадешла тIимкьлизив

Ну уръулри, тяп зеван.

Ахирра уруз-хIяцIли

ЦIумдарира хIялани –

Алавла шалабиуб

Дархьдизурли хIерани…

ХIябра жапаси лебри

ХIечи кавдуси гьуни,

Гьанна мегьла гьабизра

Гьамадли белхъас нуни.

БУКЬУР КЬУТIКЬУМАБИАБ

Кьадуба дуцили сар

Халкь балхути хъу-къада,

Ургубала гузетчи

Вегъубли сай хъубзара.

Нушала хъуми-диркьби

Лер хIябра палакатли,

СецадхIи дурабадси

Далхутира баркатли?!

«Чуду-хинкIличи» гъаргъли

Дубшулра шагьуртази.

Хъалтали дуцили сар

ХъалицIа дубуртазир.

 Базарла гъазализир

Дулъули сари дин, рухI,

Миллатла кьисматличи

Кадирули сари пухI.

Дурхъадеш кали ахIен,

Кьукьубачи кайзеси,

ЖягIялла бархIи саби

Улукьуси, изуси.

Зукьидеш ва кьутIкьудеш

Кьадардариба чили?

Чина хIеръасра, ванза

Чебиулра гIячихъли.

Аманат, гIядат, букьур

Иргьулра декнукьличи,

Хъяшниван лехIхIейхъулра

Буруси гIякьлуличи.

Дагъниван дяхIили сар,

ХIи кертIули даршдусми,

Мурт лябкьусира манзил

ДелгIуси ва иршуси?..

Нушала хала бегIти

МицIирбиалри нагагь,

КIинайсра бубкIи, валлагь,

Чебаили иш балагь.

ХIЯДУРИКIУЛРА

ИмтихIяйчи ахIенра

ХIядурикIуси ибкьли.

(ИкIаб ил кIеб викIасли,

Гьеч хIебирар лайикьли).

ХIядурикIулра, тяйван

Виаслира ну тирхьли,

Дила къугъати къайгъни

Делгъан или, ца гьакIли.

Чархла чагъти цIакьани

Чедиулра дицIули,

БиркIунтала бузери

Лебал бара мицIирли.

Излумара, душмайван,

Тамай ясируцилра,

Се хIерлил хIебалули,

Суалта кьацIуцилра.

БегIтара Журмачибри

ХIяжла хъали баргибси,

Набра гIягIнили ахIен

ТалихI ишаб агарси.

Биалра, хIядурикIес

ХIябилра жявиубра,

Виас, баги агара:

ХIялалли хIяниубра.

АХИРРА ГIЯРА БУРЦУ…

Хурани дергаб сари,

Халадеш илдигъунти,

ЖамигIятла кьумурла

КьацI кьутIкьубирахъути…

Зилантала ургавра

Ил – хIунтIена дагъари.

Мурдакайэс муштарси

Тази – цIуба юргъари.

ТIама буун тIумаван,

УчIи ил мактаблизив,

Чуйнара вагьариуб

БяхIла газетализив.

Дурсри ва далдуцуни

Илис шуркьгъунти дири,

Барх бучIантала къайгъни

Къугъниван кьабулдири.

ГIур дудешли къужкариб

ЧерикIла ца вузлизи,

Къугъназив мешувиуб

Ил бекIбяхъ тIавузличи.

Диплом асиб дудешли,

Ил катес асиб тахра.

Сархиб ихтиюртира,

Асес хIейалра дагьри.

Рушбат, хъям-кьацIлис кьалли

Ил вахъ вялхъя увухъун,

Кьалтинтачив улхъули

Я вамсес пикрихIевхъун.

НехI дужули сай гьанна

Туснакъла кьумурличир,

Ахирра-ахир варгиб

Бархьси судли ил пакьир.