ХIябиб ГIялиевлис - 85 дус

Гъабзадеш

ХIябри лер ванзаличир,

ХIябра хIяйрандиубти,

Чузи чумра багьадур

БахъхIейс паргъатбиубти.

Бетахъиб багьадурти

КIунтIбачир ниъ деръайчи,

Жармализир зайдухъун

Жагьдеш, жагадиайчи.

Илди хIябразир лехIли

Лер гъубзнала хьулани.

Мурадличи хIеили

ГIянжили кIапIдарибти.

ДуцIрумла бархIехъуни

Агь, хIябилра дигахъис

ДуцIрумла бархIехъуни,

БархIехъ ургубакадли

Хяса-пухIличил гьуни.

Дигахъис аршилабад

Чарбулхъути адамти,

БуцIар хIянчила цIали

Адикьурти макьамти.

Дигахъис лебил авлахъ

ЦIярбикIахъули цIурцIба,

ЦIярра кIунбицIахъули,

Далай бучIалли рурсба.

Дигахъис рурсби-ургар

Дила исбагьи лерли,

СенкIун шалавирулра

Сунна лямцIгъуна хIерли.

Дигахъис авлахъличи

Бац абулхъул замана.

СенкIун ил манзиллизиб

Саб дила къуймургъуна.

КьацIличиб уршила хъат

ДуцIулину карилар,

Нешли кьацI дуцIулину,

Хамирла дяхI илини

Някьишли лукIулину.

Кабяхъя, дила урши,

БиштIал хъат къяжаличи,

Балкабиркурну илра

Уржили някьишличил.

Уржили, дай дугила

Заклизиб зубариван,

Балбикили, баракат

Балтахъул гьайкариван.

Нешли лукIути някьиш

Сари кIала дугьбиван,

УрхIлизи кьацI батахъес

СихIрулис делкIунтиван.

Гьайкари саби хIела

БиштIаси хъат кьацIличиб,

КьацI бетмахъаб бикIуси

Дунъяла хъям-кьацIлизиб.

Ил хъатра батаб хIела,

Ратаб нешра гIязизси,

КьацI бируси ахIенну

Сунелаван бизиси.

ХIела някъ ляванала

МалхIямси мугьургъуна,

Кабилзаб къадагъаван

Дунъяла ахIмакьунас,

ТIашаахъес илдази

КьацI къитбирути шиш-кьиш,

ЛукIахъес нешанази

КьацIличи нурла някьиш.

Кабяхъя, дила урши,

Хъат хIуни, кьацI берцIайчи,

Нунира кабирхъисну

Някъ абала хъарчIайчи,

Нушала уршбас кьуцIра

Паргъатли руцIен или,

Уршбачира набчира

ХIеррикIули харили.

Нешла уркIи

Ца ганзла ванзализи

ВецIал азир гIярада.

Ванза бухъару гьатIи,

БиубхIели илкьяйда?

Ил мерличир ванзала

Гьар дус хIедиуб кьар-шин

Ванзала уркIилизиб

ЛехIкахъилри гъургъашин.

ЛехIкахъилри, мицIирдеш

Зугьали гIянддакIили,

ГIур гIямру хIедерхъахъес

ЧIумали кьасбарили.

Сунезирад айтIунти

Гъургъашинра шанданра,

ГIеладяхI чардирулри

Ванзализи гIуррара.

Сахъли лехIбизаллири,

Иргъи ванзали биса.

ГIур иличиб кьутIкьуси

ДецI гIур чила биэса?!

ЧIянкIли нешаналацун

ДецI кьутIкьусири гIурра...

Амма децI цагъунари

Ванзалара нешлара.

ГьуцIбухъун шинишбиэс

Ванза гъалдехI хIеблизиб,

Амма цIакь каберхири

Бигубси уркIилизиб.

УркIила децI хъумартес

Гъал дус кьасбири нешли,

Амма уркIи буцилри

Шишимтала декIдешли.

ГIе, ванзала ва нешла

Дард ва децI мешутири.

Бетахъибти нешлара

Ванзалара уршбири...

Гъал дусли ванза халкьли

Шинишбариб гьатIира.

Амма нешла уркIилаб

ХIебакIиб ца вавалра...

Заб, заб, - хъу дерхъаб!

КIелбарес цIудар гъагул

ЛямцIарбухъун лямцIла тур,

Дубурла андакадли

Къукъули цIа кадатур.

УркIдухъунти гъагулти

Бизил кIунтIра кIантIдухъун,

Унрала улкьайтаур

Тутун делхъли детухъун:

Заб, заб, - хъу дерхъаб!

Хъулри анкIили дицIаб,

Гьар адамла юртлизи

ТалихIла пай абацаб!

Авлахъличиб анкIила

Бургар гIяжаиб сяхIбат, -

Булхъен мухъила гьар кьякь,

ХIу нушала халкьлис бат.

Булхъен дуралхъулрану

ХIела делхълис хъат бяхъес,

ВиштIал дурхIяхIеливан

Авлахъкадли дуцIухъес.

Заб, заб, - хъу дерхъаб!

Хъулри анкIили дицIаб,

Дурхъал забла кIунтIрауб

УркIилаб гьар децI бацIаб!

Дашена, заб, дашена,

Ванза далайбикIахъес,

Авлахъ булхъен, хъатбикIен,

УркIи лайлабикIахъес.

ДурхIядеш гьандикили,

УмхIулра виштIасиван,

Шадлира ванзализи

АлтIуси забла кIантIван:

Заб, заб, - хъу дерхъаб!

Хъулри анкIили дицIаб,

МаранкIила кьуцIрани

Адамти даим буцIаб!

ХIябиб ГIялиевлис - 85 дус