Калаб Ванзаличиб даршудеш

Духъар гIямру

Ца шайчиб муръа саби

КьутIкьули симкьбикIули,

БегIла гIергъиси хIурмат

ВебкIибсила бирули

ЦархIил шайчибад саби

Сири архули хъули,

ЦадехI жан тIашдизалра,

ЦархIилти сар духъули.

Ца гьигьбатлис викира

КIел хIяйчи чархра нура,

ДурхIни алкIули лебай

Духъар гIямрура хъура.

Даршудеш

Даршудеш – саби вирни

Мякьлав юлдашунала

Ва хIерирни янашав

Хъалибаргла, гъамтала.

Дигуси барес ахъри

ВегIли вегIлизиб лебни,

ИшбархIи ну, гIур дунъя,

Се биэсара хIейкIни.

Даршудеш саб дурхIнала

КIунтIубачиб муридеш,

Нешанала, рузбала

ХIулбазибси разидеш.

Даршудеш – арцантала

Чинаралра вичIъала,

Кьакьурбазир дикьути

ТIама-гьама дурхIнала.

Ванзаличиб даршудеш

ГIяламлис кьиблама саб,

ДецIанасра, нургъбасра

БегIла цIакьси дарман саб.

Калаб даршудеш, Ванза

Нушала бухъахъули,

Сагали алкIусила

ЧIярлицун булхIехъули!

Дигулра улка белшес

ХIебличи хIинцIикIули,

Улкьай нуни ибхьулра.

ГIямруличи гIяшикьти

ХIулбачил хIербирулра.

Чебиулра алавчар –

БархIилис барсбикIули,

Ванзала тимхъра гьигьра

Сагали далдикили.

ХIебиалли улкара

Ункъбиэсгу нушала,

Алкесгу бахъхIи хIерси

Нушаб игъбарла шала.

Цакьяйда гIямру дуэс

Ахъри сецад гIягIниси ?

Хъулкни – хъямхIни дугIаэс

Ванзала цIакь агарсив?

ХIеб хIякаван хъумартес

Дигулра ишди бурхIни,

ХIебалуси сеналра

Чузиб селалара мягIни.

Дигулра улка белшес –

Бархьдешла баругъуна,

ГIяйиб – хатIа агарси

ЧIумаси шандангъуна.

Наб дигуси

Къардванухъунси адам

ГакхIерили, ахъуцес,

Баркатла, уркIецIила

Адамтас някъ гьабуцес

Кьас – пикри чузир лерти

Саби наб бегI дурхъати.

Юлдашунала къушум

БархIилис халабирул,

КьацIра илдачил буртIул,

Къяна – шилтахъ гьарахъси

Сай наб бегIла дурхъаси.

Мурт гIягIниикаллира,

Адамла мурад бирул,

Сунес зарал биалра,

Гьар секIал дархьли дирул.

Илдигъунти бахъ – бахъал

Биъни саби наб дигул.

ТалихIла шала

Чина, чинаб, сегъуна

Чекасилрара бунагь,

ИшбархIи нушачивад

Чевкайкилигу Аллагь.

Агара гьарбилзуси,

Барибсира нушала,

Гьарахъбикили саби

Нушаб талихIла шала.

Амма хIейрулра умут

Беткахъахъес, бацIахъес,

ГIяхIдеш агара или

Паргъаткайубли уэс.

ХьуликIулра, чераркьян

Нушала бунагьуни,

Игъбарла, баракатла

Ибхьу сагали гьуни.

Даимси цIала гьалар

КъухIкабуцили бекIра,

Сари карила гьалар

ЦIуцIли неш ишбархIира.

Рах-махли ца иргъулра

РикIули цIумра, симкьра,

МицIирхIеливан сунна

Жибирули уршбира.

ДяхIиван цIубли сари

БекIличирти гъезбира,

Тамлигван берубли саб

Гьанна илала чархра.

Давлагаб, аргъаллири

Ца хIябал дев уршбала,

Рахли кIидехIести хIеб

ДакIиши нешличира.

Калаб Ванзаличиб даршудеш