БелкIаназир халкьла гIямру чедаахъиб
РажабгIяли ГIямаров акIубхIейчирад – 110 дус
РажабгIяли ГIямаров акIубси сай Ахъушала районна ХIямшимала шилизив 1913 ибил дуслизив. Ил жамигIятла, политикала хIяракатчицун ахIенну, пергер лукIан, писательра драматургра сайри. Илала произведениеби: «Дубурла вава», «Чинара дила неш?», «Райкомла секретарь», «Дубурланна кьисмат», «Маржанат», «Дудешла уркIи», «Челябкьла багьандан», «Шайхул Ислам» ва цархIилтира дагъистанлантас жявхIейчирад тяништи сари. Сунела белкIаназиб илини нушала республикала гIямру, гIядатуни, бузери, дагъистанлантала хьулани чедаахъили сай.
Дагъистанна жузала издательстволи илала жузала томани дураибтири. ИшбархIира Дагъистан илгъуна произведениебазибти адамталагъунти гъабзадешличи ва гIяхIдешличи хъарли саби. Илдигъунти гьарли-марти адамти биули ахIен нушаб ишбархIи. Писательла юбилейлис хасбарили, 2012 ибил дуслизиб МяхIячкъалала ил хIерирули калунси Набережная кьакьала хъа бяхIличиб хIурматла уркьули баршили саби. Нушала республика гьалабяхI арбукес ва машгьурбиахъес чула гIяхIти баркьудлумани, халкьлис къуллукъличиб асилси бузериличибли белгиси пай кабихьибтазивад сай РажабгIяли ГIямаровра.
Ил ДАССР-ла урибси культурала ва шила хозяйствола хIянчизар сай. Учительла курсани тамандарили гIергъи, Ахъушала сельсоветла исполкомла председательли узули калун. ХIунтIена ГIярмияла къяянази живарайчи, комсомоллизив узиб. ЧебяхIси ВатIа дергъдехIдихьибхIели, ВатIан батахъес арякьунсири. Илав политрукла къуллукъуни дузахъули калун. 1943 ибил дуслизив декIли вяхъили гIергъи, ЧИАССР-ла ва ДАССР–ла партийный хIянчиличив калун. 1953–1962-ибти дусмазив Ахъушала Райкомла КПСС–ла цаибил секретарьли узусири. 1963–1965 ибти дусмазив ДАССР–ла культурала министрла къуллукъуни дузахъи. 1965–1975-ибти дусмазив ДАССР–ла шила хозяйствола министрла заместительли узиб. Ил хIяйна ДАССР–ла Верховный Советла депутатли викIиб, шуйна Дагъистанна обкомла ВКП (б) КПСС–ла членнира. Дахъал пачалихъла ордентачил ва медальтачил шабагъатлаварибcири.
