Редакциялизи суал
Чи сая Дажжал, иличила бурили дигахъира?
МухIяммад Идбагли ﷺ цархIилти умматуначи бархьибти идбагунани кьяйда лягIнатбушибси Дажжаллизибад сахъдеш барахъес бурибсири. Илини буриб: «Илала куц жяргаси ва цIахси саби. Сунела куц-кабизличил ил шайтIайчи мешуси сай, ва ил-алавтира илала бархкьябира шайтIунти саби. Дажжал дакIуухъунхIели, илис гIелабад 70 азир жугьутI бирар цIудара чегьурсира сабира».
Илала бегIтала 30 дус биштIати аги, ва илала гIергъи илдала далкIа хIулбачилси виштIаси акIуб. Илала хIулби кьяпIли диалра уркIи бусуси ахIенри. Илала бегIти ахъти кьаркьлумачилти, чинтIрарси камличилти сабри.
Дажжал вабзси, ахъли ахIенси кьаркьайчилси, цIябси камличилси сай. Илала бекI халаси ва делсунти гъезличилси саби хясала рангла. Илала кIел хIули диалра, цали саби чебиуси ва къунбарла андаличиб хIулби-ургаб «кафир» белкIунси саби гьарил бусурмай учIес хIебалусинира ил белчIес вирар. Чебиан алгъай хIули илала шиниша саби, илала балуй хIули балкIси ва заябиубси тIутIиличи мешуси саби. Илди дахъал хIядисунани мардарибти лишанти сари.
Дажжал дакIувиънила лишанти дебали дагьести дирар. ИлхIели адамтас мяхIкамдеш барес чебиркур, илис гIелабад хIебукьес багьандан. Адамти бирхутачи ва хIебирхутачи бутIес вирар ва илдазибадти Дажжалли дирути тамашала гIяламатуни чедаили илис гIелабад букьес асубирар. СенахIенну Дажжалла халати устадеш лерти сари адамти биргIябургес ва илдачи асарбирес. Амма гьарли-марли вирхуси адам илис гIергъи хIякьян.
Ил лявкьуси сай бархIи гьаббикIуси мерличивад, Хорасан бикIуси ванзаличивад. Ил 40 дуги-хIери вашуси сай ва лерилра ванзурбачи виуси сай, адамти фитнализи биркахъули.
Идбагли ﷺ бурни хIясибли, Дажжалти цархIилтира биэс асубирар, илди 30 бирар, амма ил бегIлара гIергъиси масихI Дажжал сай.
Дажжал дакIувирнила цаибил лишан саби имам Магьди лявкьни, суненира лебилра бусурманти цабирахъуси. КIиибил саби – бусурмантани Стамбул буцни. Дажжал вакIес гьалар 3 къиянти дус ляркьути сари. Цаибил дус Аллагьли ﷻ хъарбиру закличи ванзаличи бурхьуси дяхIни тIашаахъес, ванзаличи хъарбиру сабухъ хIебедахъес. КIиибил дус закли заб гьатIира камдиру, ванзали сабухъра. ХIябэсил дус закли ва ванзали селра хIелуга.
Дажжал вакIес гьалаб ибкьси аги бирар, гаши, харабдеш тIинтIдирар, хIуркIби дегъдирар. Шинни бицIибси Евфратра бархли буръар.
Нушала Идбагли ﷺ мяхIкамдеш барахъес буриб ва дехIибайзиб бегIлара гIергъиси ташагьгьудлизиб (АттахIийяту) дугIя бучIуси саби, сунезибра Аллагьлизи ﷻ берцуди барахъес тиладибируси авал балагьлизибад:
- хIяблизибси гIязаблизибад;
- жагьаннабла цIализибад;
- бебкIибтала ва мицIиртала фитнабазибад;
- масихI Дажжалла фитнализибад.
Дажжаллис гIелабад бахъал адамти аркьян, сенкIун илини адамтачи асарбарес вирухIели. Чинабси-биалра мер-мусаличи вакIили илини адамтала тилади хIясибли заб дарахъес яра цархIил гIяламат чебаахъес вирар. Ил чебиуси шайтIангъуна сай ва илала мурад саби адамти сунечи бирхахъес. Илис илизиб халаси къияндеш ахIелкIан, 40 бархIила бухIнаб илини лебил дунъя алавбиру. Амма Маккализи ва Мадинализи ил ацIес хIейрар, сенахIенну илди ярагъличилти малаикунани мяхIкамдирути сари. ГIур ил УхIуд дубураличи айцIуси сай ва буру: «ХIердизая цIубаси къалаличи – ил ГIяхIмадла къала саби». Илала гIергъи ванза хIяйна зерзербулхъан лерилра мерсдалкьниличиб цIакьли ва Маккализибтира Мадинализибтира мунафикьуни урухбиубли Дажжалличи бубшути саби. ИлхIели дурхъати шагьуртазиб цалра мунафикь кахIевлан.
Дажжаллизивад верцес багьандан ЧевяхIсила хъарбаркьуни тамандирес гIягIнити сари, гIибадат цIакьбарили, тIягIят имцIабарили, Аллагьли ﷻ къадагъадарибти, вайти баркьудлуми дархьдатурли. Иличиблицун саби нушани Идбагла ﷺ диги сархуси ва иман цIакьбируси. ИлхIели саби нушани Дажжалла андаличиб «кафир» ибси белкI белчIес дирути.
Гьар дехIибайзиб гIергъиси ташагьгьудлис гIергъи дугIя бирес чебиркур, илизирад мяхIкамдарахъес. Иличи къаршиси бегIлара мягIничебси ярагъ саби – сура «Кагьф», ил уркIиличиб багьурли бучIни гIяхIси саби.
Аллагьли ﷻ илис дедибти лерилра Дажжалли чедиахъути мугIжизатуни: адамти мицIирбирни, иблис адамличи шурватни ва цархIилтира сай машгьурвиэс багьандан сари. МашгьуриубхIели ил аллагь сайра или викIуси сай. Ил багьандан иличи тамашаизурли гьачамалра хIеризес гIягIниси ахIен, илди адамти илини чеббалкIахъес вируси сай.
Лерилра ЧевяхIси Аллагьли ﷻ илис дедибти гIяламатуни нуша бусурмантала хIялумцIес багьандан сари, сецадла цIакьсил нушала иман. Аллагьли ﷻ нушаб цIакьани габ дунъяла бегIлара халаси фитна – Дажжалла фитнализирад дерцахъес. Амин.
