Сукъур Кьурбан акIубхIейчирад – 175 дус

Даргала халкьла далайчи Сукъур Кьурбан акIубсири мискин хъубзарла хъалибарглизив, Лавашала районна (гьалабла ЦIудхъурла участокла КашагIи шилизив). Ил акIубхIейчивад сукъурсири, ва бегIтазивад жявли мяхIрумиуб. Ятим уршила разидеш, гIяйса сабливан пайдалабируси тIерхьализи къимбарили, далай белчIни бири. Илини халкьла далуйти дахъал уркIиличир далусири ва илди дучIусири. Ил сунела узикьарли кIарахъала ХIябши шилизи арукибхIели, илдала мез ва далуйти дяркъур. ЧариубхIели, илала далуйти дебали дигудешли, жагьилтани ил чучил варх ялчнад Къизларлизи ва Грозныйлизи викусири. Жагьилтани Кьурбайс кьадинра хIянчи барили, къиян-хIекь бутIацугли буртIи.

МухIлила творчестволизир илини марти гьалмагъдеш, бебкIала гьалар дубурланна чIумадеш, вершадешлис лягIнат, гъабзадешлис деза, мас-хазна багьандан хIяя бицибтала бархьагардеш, мискинна гIямру чедиахъули сай.

Ламарт

(«Хунзахла талхъунтала бебкIа» назмулизибад)

ГьуцIудатлан ХIямзатли

Кагъар белкIун, бяхIбариб,

«Ваши ГIуммахан! – или,

ХIуребаличил уькес.

ХIуребалра лугасра,

Валли хIу бекIварили».

БяхI мургьили делкIунил

Мисри турра садигьун,

ЦIуба арцла камалли

Вайра чIумасабаркьиб,

Сунес игаьлли, игьес

Бай мургьили делкIунил

Тупангра вайла баршиб.

ГIуммахан аркьухIели,

ХIядурикIулри вархли

ЦIудхъурлан къугъал Бугъа.

- Варх вакIес хIядурикIуд,

ЦIудхъурлан къугъал Бугъа.

- ХIу убкIуйхIи вебкIахъес

Валхьилра дила нешли,

Лачин дила ГIуммахан.

Их диркьа майданничир

Чедиу цIуб чятирти,

ДекIарливан чебиур

ХIямзатла къуугъал чятир

ХIямзат кайиб чятирла

Мякьлаб саби тIашбизур:

-Ассаламу гIялайкум,

ГъуцIудатливил ХIямзат!

- Ва гIялайкум ассалам,

Лачин дила ГIуммахан!

Урчи чула дуцили,

Саби хьуракабариб

Къугъал чятирла бухIна,

КIелра балли арбукиб,

Балли гъайкабикIули,

Чятирлар балгни дариб.

Ургаб сягIят бикибмад,

Дуравхъунну ил ХIямзат,

Бикьулри вявикIули:

ХIуша хIядурдиэна,

Дила къугъал хIуреба,

Гьанна някъла дакIибну,

Делгьес цIерхьти гула унц.

- Иргъулрив, я ГIуммахан,

ХIуни ламартла гъайла?

- Дикьулира, иргъулра,

ЦIудхъурлан къугъал Бугъа.

Вари кIантIимайруда,

Лачин дила ГIуммахан.

- Ну сен кIантIивикIуси,

ЦIудхъурлан къугъал Бугъа,

Гьачам варкьибил адам

Гьачам ахIи убкIусив?

Маслис сунес караркьиб

Туплисла арц дучили,

ХIусмаллумли дарибси,

Дила арцла гъайкIари

Макру дахъил илбисли

Макрули сунес даркьиб.

Дарили мургьила шин,

ХIяжла хъулир делкIунси

Дила мургьила гьайкар,

Мас халал давлачевли

Маслис сунес каракьиб.

Макру дахъил илбисра

ДиргIяб хьанцIил урхьнани

Мас хала давлачевра

Игаб хIунтIена цIали.

ХьанцIил урхьнани биргIяб

ХIу аррукес бакIибти.

ХIунтIена цIали бигаб

ХIечи сукни башути.

УркIилизир цIа сари

ЦIудар лачин багьандан,

Чархлизир майа сари

Лачинна чарх багьандан.

ЦIуб арцла кьумурлавад

Укасра ну чакарли,

Хункар нукертазиван

УркIи хIези гъайдикIар.

Мургьила пигьлумачил

Ужасра ну шарабли,

Шагьличи нукертиван

ХIулби хIечи хIердикIар…

Мурхь къадурби умцIуси

Гули хIунтIена гурда

Дарили азир макру

Зубрази ахъуцили,

Марли, лайвакIирану.

ХIекь делкIабгу хIед дила

ХIулбала хIер багьандан,

ДулекIличирти гьангуз

Шинни кIантIкадикIесли.

Сукъур Кьурбан акIубхIейчирад – 175 дус