Дила ВатIан
Дила ВатIан
Дила ши, дила ванза
БегI гьалар хIела чедир
Чедаира зубарти.
Дунъяла азир хIялра,
ХIунири дагьахъурти
Дила ши, дила ванза.
БегI гьалар гъабзадешла
Дурри хабурти набзи –
Тарих хала бегIтала
КертIири уркIилизи,
Дила ши, дила ванза.
БегI гьалар адамдешла
Дуцири имтихIянра,
БегI гьалар инсантала
Гьаргдарри хIялалдешра,
Дила ши, дила ванза.
БегI гьалар умудешра
Аргъахъири дигайла,
Даимлис пешкешдарри
КарцIайла цIакьти цIара,
Дила ши, дила ванза.
ЛехIкахъили сар пушни
Шила дублаб гIевдухь леб
Ну хIяйранвирахъуси,
Дусмала урхьулизи
АрхIяра бирахъуси.
Ца гIямзилар пушни сар
Дусмачил абздикибти:
Къамдизурти, дерубти,
Амма гьачам мицIирти…
Ишаб, бикIар, цугбикиб
КIел машгьурти адамти:
Ца – чевяхIси далайчи,
Итил – хабарла уста.
ПикриикIулра, марли,
Сегъунарил ихтилат?
Се дирибу машгьурси
ГIяхIяйзи АлимяхIли?
Се гьанбиркулри вара?
ЧевяхIси батирайлис
АлимяхIла пушназиб,
Устачи хIерикIули?..
АкIуб дахъал суалти
УркIилизир. Сепайда,
Лехкахъили сар пушни,
ХIейрар даргес жавабти…
Ургъанна тилади
Чеваргъахъаба хIуни
ЖагIял жявли, неш дила,
КIел дус гьалавван дуцIли
ГьаввакIахъес гьаргала.
Чеваргъахъаба вари
Савлила шалаличил,
ХIенкьлизи дуцIдикIути
ХIеризахъес кьулачи.
Чеваргъахъаба хIуни
ЖагIял жявли неш дила,
Валцес хъумачи аркьяс
Дуразличил дудешла.
Чеваргъахъаба вари
МяштIбарили анкIала,
Дунъяличи карцIлину
БиркIанти лебил чархла.
Хизри Юсупов
БегIтала анкъи
Ванзаличиб гьарилла
Зубари лебси саби,
Ил зубарлис бегIтала
Анкъи бикIуси саби.
Илини хIелтари хIу
ДецIлизив гIяндушахъес,
Камсилра ахъри лебли
ХIечи вайдеш бакIахъес.
Чиллара дуцIрум сари
БегIтала анкъилизир,
ГIямрура далай сари
Илди лебси мерличир.
Гьариллис ванабикIаб
Ил анкъила дурхъал цIа,
Ца гъамалра мабиаб
Иличи дяхIцIи децIла.
ЗайбикIаб даршдусмазиб
Илизиб гардла далай.
БегIтала чихъли бираб
Авадан гIямрула куй…
МакьлатIисливан уркIи
БитIикIуси дила ша,
Шагьарлан гьалаклира
Неш-дудешла янаша.
Чедаили ахIерти
ДяхI, хIяйдулхъан дила рухI,
Илизиб саб, балулра,
Алжанала унабурхI.
Гьаргдариб хIебли унза
Гьаргдариб хIебли унза
Исбагьили хIулбиван,
Нушала дурхъал ванза
Жагабарес жагьдешван.
ДяхIили демдахъурти
Дисесдииб кьялуби,
ХIебличи дахъхIи хIерти
Пишдяхъяхъили кIинчIби.
ХIурумли гьагдикIули
Саридалгьунти хъуми,
ЛергIер гIяхIил аргъили
Хъубзурала пикруми…
ХIебли вавнадирхъяхъу
Шагьуртира шимира,
Шаддирахъу, уржахъу
Адамтала уркIбира.
Жагабиахъес ванза
Адамтала уркIбала
БегIла чихъси чебяхIдеш,
ХIед саби дила балга
Пергер гIядатласидеш.
Ну хIечив гIяхIял сайра,
Дила гIязизси ванза,
Гьаргли сарнIкьяли-кьяйчи
Дила уркIила унза.
Илизиб саби дила
КахIебурхуси хазна,
Ишгъунали кални саб
Дила гIямрула мягIна.
МяштIли вирус нанала
ХIерли умудешличи,
Макру-гIямал агарти
Дугьбала каргьниличи.
Диги гIядатласидеш
Гьар инсайзир дирули
Хъяшаван дакIу-гьаргли
Иш дунъя гъайбикIули.
МутIалим МутIалимов
Нешла дард
ВатIа къиянна къала
ЧархIевхъунси дила нарт,
Балагьла бурямлизив
Арсланван алхун вара?
ДяхIагар танкла гьуни
ГIекIили вебкIиб вара?
Мурхь къадала хъярхъси хIеркI
Ихъули вяхъиб вара?
Освенцимла турбаба
Кахли хупIвариб вара?
Минабала авлахъли
Кьяркьли кьяраиб вара?
Багьси балагьлизивад
Дурхъал ВатIан битIунси,
Дунъяличиб хIела хIяб
Чинабара ахIерси?..
Азир суал жургъдикIар
Михъирлизир рухънала.
Шулдиубти хIулбазиб
Дард хIебилшан илала.
Чарулхъас дубуртази
Авидлизиб шаддешван,
Балгунси дубуртазиб
Набзи дила биштIал ши
ЖибикIар муэртазиб.
Лявличил жиирира
Нешлира виштIахIели,
ПушягIван пушвизурли,
Къакъгьавли кайзурхIели.
Гьеч, хIечи гьимукIнила
ДяхIцIи ахIекIуб набзиб,
ГIямрула гIилму дяркъес
Веткахъилри къайгъназив.
Паргътагардешлизив
Вирхъулра кIидехI гъезли –
ХIечи дигила гими
Цаван зайдикIар набзир.
Журмачи, хIу хIиличил
УркIилаб гъудурлири
Аргъайзив, пикрумазив
Ну хIечи вахъ карцIлира.
Чарулхъас бехцIуртани
ТIемдикIухIели хъуми,
ГIяхIялван, уруз-хIяцIли
ТIашхIелзас хъулив бацIси.
Балас, кьаламван нуни,
Бузахъес бухъна къялкъя,
БуцIарси майа ушкес
ХIядурли саб някъ бялхъя.
Чарулхъас, ласбикIуси
Саби, бикIар, дунъяра,
Ну рухIла дяхIимцIайзив
ХIер булан дубурланра.
БегIла жагаси сурат
Аргъала черсаргъила
Гунзра дунъя умцIулра –
Илван жагаси сурат
ЧехIебаира цалра.
КIазван кIантIити някъби
ТIинтIдалли дуклумиван,
ДуцIухъун нешличивяхI
Урши – супIварибсиван.
ГIязиз жан чедаили,
ТIашризур уктемли неш,
Агь, илала кабизла
Шаласи хIулбукIибдеш!
ГIур хапвариб виштIаси,
Уммайвариб буцIарли,
Уршиличи дигили
ХIулби иртулри цIали…
Урши дукла авцили
ТIашси неш чериулра,
Илван жагаси сурат
ЧехIебаира цалра.
