Нушала бучIантала назмурти
Янила бурхIни
Дураб чиллала аргъ саб
ХIуркIби миъдяргIяхъили,
Анкъилизир урцул сар
Ургади тIякьдикIули.
Шанглизир диъби сари
Бизили тIемдикIули,
Хъулибти саби хIерли
ХинкIа дукехIе или.
Печла мякьлар неш сари
Дуругличил лукIули,
Шиша агарси чирагъ
Саби шалабикIули.
Лебилра биштIа дурхIни
Нешличи хIербикIулри,
Илини дурулири
ЖявхIелила хабурти.
Карила гьаларси неш
Мурталра чериулра
Карила гьалар наб неш,
Хъалта чудна руцIули
Кьумурла кадирхьули.
Мурталра чериулра
Чудни дерцIили гIергъи
Лебилра биштIа дурхIнас
Илди цугли дуртIули.
ГIуррара чериулра,
ХIяйчнали геррикIули,
ЦIала карила мякьлар
БерхIиван пишряхъили.
Карилаб лякьир бикIи,
Бизити чудна биркьи,
ГIянручI берхIи ахъайчи
Чули кари бумжахъи.
БиштIа дурхIна хIебала
БерцIибси карилаб кьацI,
Илдас мягIни агара
Секьяйда букьялра баз.
Дудешла агри
УркIи дамкьурли сари
Бамкьурси хIеркIла шинван,
ХIулби сукъурли сари
Бац агарси дугиван.
Чархра саби бамсурли
ТIерхьуба битибсиван,
Кьяшми сар хIедашули
Ши далхIедалусиван.
Дудеш, хIуни датурла,
Тухум палакатли саб,
Лебилра уршби рурсби
БукIун агар дурзамван саб.
Дудешли дурул гIякьлу
Дила уркIилизир сар,
Гьар дугира бархIира
ХIулбала гьалав ил сай.
Дарма кьар
Дарма кьарли дицIибти
МулебкIала дубурти,
Шадли гIямру деркIарти,
МулебкIан багьадурти.
Вавни тIемдикIухIели
Раадли дубуртачи,
БиркIанти зерзердиру
Иларти дарма кьарли.
Шумери, гIинци, ташкIи,
Гаци, низби, янцIури,
Илди лерилра сари
Чумра изайс дармунти.
Ванзала лигIматуни
Ванзализирад сарра
КьацIли нуша дукути,
Дусмазирра гашила
Нуша мицIирдарибти.
Арши иршул замана
Авлахъ тIембикIар кьацIли,
МабакIаб агри кьацIла
Лебай шала дунъяла.
Ванзала лигIматуни
Дахъал сари балутас,
Хъубзурала гъабзадеш
ХъумхIертехIе даимлис.
ХIеб
ХIеблизи агибхIели,
ДучIули сар чатIнира,
ЧатIначил рарх ручIулра
Гьар бархIи гIянручI нура.
Адамтани дубурла
Думжахъу гумайтира
ХIебла ванати забли
Ляркьяхъу гул вавнира.
Хъубзурани дурайсу
Чула хIебла дукI-дураз,
Хьунрани сагадиру
Гьаргалабси карира.
ЦIикури хIевни челгьа
Ранг-рангла галгубани,
ДягIра бет-сад сабулхъан
ЦIикруми пяхIбирули.
Хъубзурала дегIнуби
Дерхъаб сари кIиркали,
Ванзали сарра нуша
Даим кьацIли далхути.
АхIерти дурхIни
Гьар дугира бархIира
Ну хIечи гьалаклира,
Гьадуцили някъбира
Аллагьлизи рулгулра.
Урши дила ахIерси
Дилаван цархIиллара
Чарбухъахъенгу, Аллагь
Чула хъалибаргличи.
ГIянручI чатIаван бучIар
Дила биштIаси уркIи,
Гьанбуршули лебилра
Арбукибти дявтази.
ХIярхIубала майдайчиб
Гъираличил бургъути
Беркеси кьацI агарли,
Ванал буруш агарли
Арали чарбухъарти
Уршби дила ахIерти,
Гьанбуршули лебилра
Арбукибти дергълизи.
Нешла агри
МабакIаб нешла агри,
Ятим биубли дурхIни,
Убай нешли илдала
БиргIяхъу тамай анкъи.
Неш агар риубхIели
Бетахъибгу наб шала
Ишцад шаласи дунъя
Кьакьабиуб наб гьанна.
МабакIаб нешла агри
Риаллира зягIипли,
Илала дяхI чедиис
ГIякьлура гIеббурахъес.
Агара нешанас гьанкI
Миъла удирти шинван
УркIби ясир дуцили,
Ишцад шаласи дунъя
ХIулбас цIябкабиубли.
Дахъал сари дурести
Дявтачила нушала.
Чарбухъабгу я Аллагь
Дудешуни дурхIнала.
БиштIа дурхIнала цIумла
Секьяйда чекасиша,
Уршила хьуна биса
Секьяйда тIашаиша?
Аллагь, тIашдизахъагу
Украинала дургъби,
Биурну кабушибти
КIелра улкала дурхIни.
