Дурхъаси Кьуръайзиб гьанбушибти идбагунала уми
Дурхъаси Кьуръайзиб гьанбушибти идбагунала уми
Адам, Идрис, НухI, Гьуд, СалихI, ЛутI, Ибрагьим, ИсмягIил, ИсхIакь, Якьуб, Юсуф, ШугIайб, Гьарун, Муса, Давуд, Сулайбан, Айюб, Зулькифль, Юнус, Ильяс, АльясагI, Закария, Яхья, ГIиса, МухIяммад ﷺ.
Бусурман адам расултачи ва идбагуначи чараагарли вирхес чебси саби. Илди Аллагьли ﷻ бегIлара дигути ва чеббикIибти саби. Илди чеббикIили халкьаначи бархьибти саби, адамти бархьси динничи кабизахъес багьандан. Гьалабти идбагуни декIарти халкьаначи декIарси замана бархьибтири. МухIяммад Идбаг ﷺ биалли, лебил инсаниятличи вархьибсири. Илала идбагдеш цIакьлизиб кавлуси саби Кьиямала бархIиличи бикайчи. Ил бегIла гIергъиси Идбаг ﷺ лебилра идбагунала мугьур сай. ГIялимтани бурни хIясибли, идбагунала лугIи I24 азирличиб имцIаси саби, илдазибад расулти 3I3 саби. Якьинси лугIи чIянкIли ца Аллагьлицун ﷻ бала.
ЧевяхIси Кьудратла ВегIли идбагдешла лишанти сарливан цархIилти адамтас хасли ахIенти мугIжизатуни дедибтири. Мисаллис, ГIиса Идбагла гIяйса чIичIайчи шурбулхъусири. Муса Идбагли зягIипти сагъбарес ва бебкIибти мицIирбарес вирусири. МухIяммад Идбагли ﷺ баз кIибайбарибсири, гIяскар сунела тIулбазибад дашути шинни бахун, къаркъуби иличил гъайдикIутири. Илини дахъал тамашала секIал дариб. БегIлара халаси мугIжизат саби иличи бархьибси Дурхъаси Кьуръан.
Гьарил идбагли ва расулли сунес гьалавсила хIекьдеш марбирусири ва гIергъисиличила балахъусири. Илди лебтанилра Аллагь ﷻ ца виъни якьинбирутири, Илала хъарбаркьуни ва къадагълуми баяндирутири. Гьарил халкьличи ца яра имцIати идбагуни бурхьутири. Илдани адамтас чебхIебалкIахъес бархьси гьуни чебиахъусири. Нушани лебилра идбагунала уми дагьес хIедирехIе, амма Дурхъаси Кьуръайзиб гьанбушибти 25 идбагла уми дагьес чебси саби.
ЦацабехIти динна гIялимтани Зулькьарнай, Хизри, Лукьман, Юша идбагунази халбирули саби. цархIилтани илди дурхъати авлияунази халбиру.
Идбагуни бегIлара гIяхIти ва ахъси даражала бегIти ЧевяхIсини акIахъубти саби. Илдазибад бегIлара черикIла расулти саби. Илдазибад шел: МухIяммад ﷺ, Ибрагьим, Муса, ГIиса, НухI бегIлара дурхъатази халбиру. Илдас «улуль-азми» бикIар - чIумаси дирхалачебти. Илдазивад бегIлара дурхъаси ва ЧевяхIси Кьудратла ВегIлис дигуси МухIяммад Идбаг ﷺ сай. Ил бегIлара черикIла ва чеввикIибси Расул ﷺ сай. Ил лебил идбагунала пачара сай, ил багьандан саби Аллагьли ﷻ лебил дунъя акIахъубси.
Идбагунала даражаби сари: бархьдеш, бунагьагардеш, дагьрила саркъибдеш ва адамтачи ЧевяхIсини дархьибти даахъес бални. Илдазибад цалра лишан хIебиалли, идбаг виэс вируси ахIен.
Идбагунала даражабачила гIер-гъиси белкIлизиб бурехIе.
