2023 ибил дусла хIясилти каиб
2023 ибил дусла хIясилти каиб
Ишдусра гьар дус кьяйдали динна ва багьудила "АС-САЛАМ" газетала хIянчизартала бузерила шайчирти хIясилти каиб. Балбуц бетерхур «Гьалмагъдешла Юртлизиб». Ил бехIбихьиб МяхIячкъалала бекIлибиубси мижитла муадзин МухIяммадариф МяхIяммадовли Кьуръа аятуни делчIниличибли.
Газетала бегI гьалабти редактортазирад цали калунси ДР – ла муфтийла советник Айна ХIямзатовани гьанбушиб сегъунти къияндешуни дяхIяэс чебуркъубсирил 1994 ибил дуслизиб бегI гьалаб газета дурайэс бехIбихьибхIели.
Балбуцличи жибарилри хIур-матла гIяхIли: Дагъиста муфтийла заместитель ГIябдуллахIяжи Салимов, ДР – ла миллатла политикала ва динанала къуллукъунала шайчивси министр Энрик Муслимов, жагьилтала шайчирти къуллукъуни дузахъуси динна гIялим Идрис Асадуллаев, МяхIячкъалала имамтала Советла председатель ГIябдулла Ахалов, ДР – ла ЖамигIятла Палатала миллатуни-ургарти ва динни-ургарти бархбасунала шайчибси комиссияла председатель Руслан Луговой, Халкьла Собраниела миллатла политикала, жамигIятла ва динна цахIнабикунала ва парламент-ургарти бархбасунала комитетла председатель Фирудин Ражабов, муфтиятла багьудила шайчибси отделла руководитель Шамиль ГIусманов ва бахъал цархIилтира.
Гъайбухъунтани буриб сецадла мягIничебсил газетала кьадри-кьимат, бусурмантала гIямрулизир гIяхIлашал дарсдешуни диънилизиб, адаб-хIяяла ва рухIлашалси багьуди кайснилизиб, жагьилти динна бархьси гьунчибад чебхIебулкIнилизиб ва наслулис бяркъ бедлугнилизиб.
Э.Муслимовли Министерствола шайзибад «АС-САЛАМ» газета патриот бяркълизи белгиси пай кабирхьнилис, лебил Россияла миллатуни ва динани-ургарти бархбасуни цIакьдирнилис «Миллатуни-ургабси даршудеш ва кьабулдеш чIумабирни багьандан» бикIуси ХIурматла лишанничил шабагъатлабариб.
Балбуцличиб Центральный, Дубуртала, Южный, Северный округунала районтазиб ва шагьуртазиб план бицIахъили, жигарчебси бузериличил декIарбухъунти шабагъатлабариб.
Ахирличиб чIалабушили гIумра хIяжлизи 3 путевка дедиб: Эльмира Юсуповас, Салман ГIябдуразакьовлис ва Шамиль ГIямаровлис. Балбуц балга-дугIяличил хъараур.
