«Дузес гIягIнили саби лебтасалра ва цахIнар…»
«Дузес гIягIнили саби лебтасалра ва цахIнар…»
Дагъистан республикала Муфтиятла конференц заллизиб «Вызовы для современной дагестанской молодежи» бикIуси «журуга стол» бетерхур. Иличир арадеш мяхIкамбирнила, багьудила, миллатла политикала ва динанала къуллукъунала шайчибси Министерствобала, МВД-ла хIянизартани, блогертани, спортсментани ва жамигIятла хIяракатчибани бутIакьяндеш дариб.
Балбуц бузахъулри динна гIялим Идрис Асадуллаевли. Илини суненира гьаман МяхIячкъалализир жагьилтачил ва школала бучIантачил спортшколабазир, белчIудила заведениебазир гьунибаъниби дурадуркIуси сай, ва илдала масъултачила балуси сай.
«Нушала жамигIятличи къаршитани сегъунти-дигара сурсатуни ва жураби пайдаладирули саби, нушала жагьилтази чус хIяжатти секIал дирахъес багьандан. Миллатличил ва динничил дархдасунти масъулти ирзутила гIердирули, илдани жагьилти биргIябиргули саби ва нушала пачалихъличи, нушала динничи къаршили дурабулхъахъули саби. Гьайгьайрагу, ил багьанданра нушани ил масъала пикрила дураб батес хIедирехIе ва цадиубли къаршидеш дарес чебиркур».
ЖамигIятла хIяракатчи Булач ЧIанкIалаевли бурни хIясибли, Украинализир ва Палестинализир детурхути анцIбукьуни хIисаблизи касили, Сагал дусла байрумти дахъал тIама-гьама агарли дурадеркIалри лайикьли бири. Жагьилти-ургаб дагьри думкьахъути дахъал секIал дакIудиубли сари, ва бусягIят илдачи имцIали пикри бяхIчиаэс чебиркур.
Жагьилти мурталра ита-иша балкIес хIядурти саби, сабабли илдачил мурталра дузес гIягIниси саби. ХIейгеси биалра, ишбархIи жагьилтала дагьриличи Интернетлира социальный сетананира халаси асар бирули саби, халатала насихIятунаниван ахIи.
«Шагьарла жагьилтала центр» МБУ-ла хIянчизар МяхIяммад МяхIяммадгIялиевли буриб: «Дила пикрили, бекIлибиубси динна организация сабливан, ДР–ла Муфтиятли жагьилтала бяркълизи мягIничебси ва белгиси пай кабирхьули саби: илдазир адамтачи диги адилкьули. Нуша лебтасалра аргъес чебиркур пачалихъла, динна ва цархIилти организациябала дарх дузнила хIянчила бекIлибиубси мурадра жагьилтас лайикьси бяркъ бедлугнилизиб биъни».
Цалабикибти жамигIятла хIяракатчиби, блогерти, спортсменти чула пикруми дурули гъайбухъун. Бахъалгъунти бутIакьянчибани Сагаси дусла байрумти жагьилтас гIяхIси гIибрат чебиахъули, дахъал имцIати авара агарли дурадеркIалли гIяхIсири ибси пикри гьалабихьиб.
«Сегъуна-биалра организацияли яра Муфтиятлицун ахIенну жагьилтачил хIянчи дурабуркIес гIягIниси, гьарил хъалибарглисра, гьарил адамлисра ил масъалализив узес чебси саби. Ил бузерила асарчебдешра нуша гьариллизивад дигахъуси саби. Нушала педагогуначил, тренертачил, динна гIялимтачил нушара гьайгьайрагу, дузулра. БегIталара халаси къайгъи биэс гIягIниси саби дурхIнала бяркъ лайикьсили биахъес багьандан», – викIар физкультурала ва спортла шайчивси министрла заместитель ХIяйдарбек ХIяйдарбеков.
«Дузес гIягIнили саби лебтасалра ва цахIнар» – хIясилти каиб журуга столла бутIакьянчибани. Илдигъунти гьунибаънибани ва ихтилатунани ил бузери гIягIниси тяхIярли тIашбатес имканти луга.
БяхI хIядурбарибси Наида Гъуруева
