БегIти лаймабикIидая
Ассаламу гIялайкум, хIурматла бусурманти! Нушани балуливан, шутIни-къумбачи бирхаурли, бахъалгъунти нушала узбани чула бегIти лайбикIули саби. ЦацабехIтани ил баркьуди давлаличил бархбалсахъули саби. Давлачеввиалли адамли тухумдеш хъумурту, ирулира бирар. ЦархIилтани хьунри гIяйиблабиру. Гьар шайчивад гIяхIил пикриухъалли, нушанира иргъулра: адам давлачеввиалли яра вайси хьунул къарширикалли, ил имцIали вайла шайчи варсирар.
ЧевяхIсини нушаб хьунулра, дурхIнира, давлара гибти нушази бегIти лайбакIахъес багьандан ахIен. Иш дунъяличир нушала гIямрулизир детарути – илди нушаб гибти имтихIянти сари, дахъалгъунти анцIбукьуназиб нушала Ахиратра илди имтихIянтазибад дигахъуси саби.
Чи-виалра бухънакабаибти бегIти батурли, чина-биалра арякьи сай или аргъибхIели децIигули бирар. Ахиратла бархIиличи гъамдикIни иргъахъули саби илгъуна баркьудили. Бухънакабаили или иш шаласи дунъяличир нуша бегIтачирад гьарахъдиркулра, Ахиратлизиб се биэсара нушаб? Нушара духънакадиутира кьалли, нушаб чили къуллукъбиру?
Мурул адамтани чула хьунрачи яра шутIникъумбачи лехIбизурли илкьяйда бирули саби. БегIлара тамашабизеси, хьунри чула бегIтачила гIелаб гъайбикIули мурул адамтанира илдала гъай гIердурцули сари. Пикри бяхIчиаая: мурул адам шутIни-къумбази ахъили виалли, илизир хьунул адамла къиликъуни дакIудулхъули сари, илгъуна адам жамигIятлизив увяхIиру, кьиматагарирар, илала гъай мучлахIебиру.
БегIтала хIурматбарес гIягIнили биъниличила нушани мурталра иргъули дирехIе, сен-сабил нушала мурул адамти хьунрала шутIникъумбачи лехIбилзули саби. Амма гьар секIайзиб хьунул адамти гIяйиблабирнира бархьси ахIен, мурул адамлизир адамдеш лер диалли ва хьунуйзи Исламли къадагъадирути хIедирахъули виалли, хьунул вайта хIериркьур. Сен нуша мурул адамтачи дугьадилзулра? СенахIенну хьунул адам сунела бегIтачи къаршили кахIерилзан, мура бегIти илис гъамти ахIентиван саби ва илис декIардеш агара илдачил се бетааллира.
ХIурматла узби, пикридухъеная, сецад цIакьани харждариба нушала бегIтани нуша адикьес ва бяркъличи дикахъес багьандан. Нуша багьандан илди сецад бузиба! Урухдиирая Аллагьлизирад!
ЦацабехIтас цIахбилзули ахIен, секьяйда чули бухънабаибти бегIти батурли, саби курортуначи яра илдачибад гьарахъси мерличи арбашниличила бурес. Чинара нушала гъабзадеш, илкьяйда бирив нушала хала бегIтани? Илдани нуша илгъуна бирахъесли дяркъуртирав? Пикридухъеная иличила, хIурматла узби!
Ца секIайчила нушани мурталра хъумуртулра: нуша секьяйда хIердикIули диахIеллира нушала бегIтачи, илкьяйда нушала дурхIни нушачира хIербикIар. Ил масъалализиб исламла багьудила халаси кьадри леб. Илдигъунти дагьриличил вегIиубсилис ШаригIятли бегIтачи илгъуна хIеруди хIебарес гIягIнили биъни бала. Ил багьандан, хIурматла бегIти, хIушала дурхIнас исламла багьуди бедая. БегIтачил хIерирни цацабехIтани цIахдешлизи халбирули саби. Ил багьандан цацабехIти хьунул адамти хъайчикабиибмад мура бегIтазибад декIарли хIербиэс къайгъилизиб бирар. Чебиулраяв, сунечи лягIнат бакIла илбисли секьяйда сунечи лехIбилзути пайдалабирулил? ХIердикIехIе, саби бухънакабаибхIели илдигъунтас чили къуллукъбирул.
Аллагьли ﷻ нуша бархьси гьунчи кадизахъес кумек бараб! Амин!
АНСАР РАБАЗАНОВ
